Dirava Ena Basileia be Dahaka?

1. Iesu be tanobada ai ia noho neganai, ia hakaua taudia ia hadibadia Dirava ena Basileia idia gurigurilaia. Basileia be king ta ese ia lohiaia gavamanina ta. Dirava ena Basileia be gavamani idauna momokani. Ia be guba dekenai ia noho bona tanobada do ia lohiaia. Dirava ena ladana do ia hahelagaia. Dirava ena ura tanobada ai do ia havaraia guba ai ia vara noho hegeregerena.—Mataio 6:9, 10.

2. Iehova ia gwauhamata, Iesu be Iena Basileia ena King ai do ia lao. (Luka 1:30-33) Iesu be tanobada ai ia noho neganai, ia hahedinaraia ia be Lohia goevadaena, mai ena hebogahisi bona kara maoromaoro Lohiana, ai do ia lao. Guba dekenai ia giroa lou neganai, ia be maoromaoro Dirava ena Basileia ena Pavapava ai ia lao lasi. (Heberu 10:12, 13) Lagani 1914 ai, Iehova ese Iesu dekenai ia gwauhamatalaia siahuna ia henia. Unai nega amo, Iesu be Dirava ese ia abia hidi Pavapavana guba dekenai ia lohia noho.—Daniela 7:13, 14.

3. Iehova be tanobada amo abidadama tatau bona hahine haida ia abia hidi danu, guba dekenai idia lao totona. Idia be Iesu ida king taudia, hahemaoro taudia, bona hahelaga taudia edia dagi ai taunimanima do idia lohiaia. (Luka 22:28-30; Apokalupo 5:9, 10) Iesu ese ia ida iena Basileia lalonai do idia lohia taudia ia gwauraia “orea maragi.” Idia ibounai be 144,000.—Luka 12:32; Apokalupo 14:1-3.

4. Iesu be King ai ia lao neganai, maoromaoro Satani bona ena aneru dikadia be guba amo ia negedia diho tanobada kahana dekenai. Unai dainai lagani 1914 amo, tanobada latanai gau ibounai idia dika momokani. (Apokalupo 12:9, 12) Tuari, aniani lasi, daihanai goreredia, bona taravatu utua karadia idia bada idia lao noho--unai ibounai be “toa” ena kahana haida bona ia hahedinaraia hari inai nega be inai tanobada ena dina gabedia.—Mataio 24:3, 7, 8, 12; Luka 21:10, 11; 2 Timoteo 3:1-5.

5. Kahirakahira Iesu ese taunimanima do ia hahemaoro henidia, do ia hapararadia, mamoe naria tauna ese mamoe bona nanigosi ia hapararaia hegeregerena. Unai neganai, “mamoe” be idia hahedinaraia vadaeni idia be ia henunai, ia idia badinaia taudia. Tanobada ai mauri hanaihanai do idia abia. “Nanigosi” be Dirava ena Basileia idia dadaraia taudia. (Mataio 25:31-34, 46) Daudau lasi, Iesu ese nanigosi bamona taudia ibounai do ia haorea. (2 Tesalonika 1:6-9) Bema oi ura Iesu ena “mamoe” ta ai oi lao, namona be Basileia sivaraina oi kamonaia bona unai hegeregerena oi kara.—Mataio 24:14.

Iesu ena lohia henunai, inai heheni karana bona heiriheiri do idia ore

6. Hari tanobada be tano idauidau ai ia parara. Idia ta ta be mai edia gavamani. Unai bese be nega momo idia tuari heheni. To Dirava ena Basileia ese tanobada gavamani iboudiai edia gabu do ia abia. Tanobada ibounai ia lohiaia gavamanina tamona ai do ia lao. (Daniela 2:44) Bena tuari, taravatu utua karadia, bona dagedage do idia ore. Taunimanima iboudiai be maino bona lalo-tamona ai do idia noho.—Mika 4:3, 4.

7. Iesu ena Lagani 1,000 Lohia Negana lalonai, abidadama taudia be do idia goevadae, bona tanobada ibounai be paradaiso ai do ia lao. Lagani 1,000 ena dokonai, Iesu be Dirava ese ia hamaoroa gaudia ibounai do ia karaia ore vadaeni. Bena ia ese Basileia be ena Tamana do ia henia lou. (1 Korinto 15:24) Emu turana bona lalokau taudia dekenai Dirava ena Basileia ese do ia karaia karadia oi herevalaia be namo, ani?

Copyright © 2006 Watch Tower Bible and Tract Society of Pennsylvania. All rights reserved.