Guriguri amo Dirava Lao Henia Kahirakahira

1. Guriguri be mai manau ida Dirava hereva henia karana. Namona be Dirava oi guriguri henia loulou. Unai amo do oi mamia ia badinai oi noho, turana namona ta badinai oi noho hegeregerena. Iehova be herea bona ena siahu be bada herea, to iseda guriguri ia hakala henia! Dirava oi guriguri henia loulou, a?—Salamo 65:2; 1 Tesalonika 5:17.

2. Guriguri be iseda tomadiho karana ta. Unai dainai, namona be Dirava, Iehova, sibona do ita guriguri henia. Iesu be tanobada ai ia noho neganai, nega ibounai ena Tamana ia guriguri henia, ma ta lasi. Namona be ita danu be unai bamona ita karaia. (Mataio 4:10; 6:9) To, namona be iseda guriguri iboudiai be Iesu ena ladana ai ita gwauraia. Unai amo ita hahedinaraia iena dagi ita matauraia bona ena boubou, mauri davalaia boubouna ita abidadama henia.—Ioane 14:6; 1 Ioane 2:1, 2.

3. Ita guriguri neganai, namona be eda lalona amo Iehova ita hereva henia. Namona be eda guriguri be ita laloatao gauna lasi eiava guriguri bukana ta amo ita duahia lasi. (Mataio 6:7, 8) Hemataurai daladia ta ai ita guriguri diba, nega bona gabu idauidau ai. Dirava be iseda lalona ai ita gwauraia guriguridia ia kamonaia diba. (1 Samuela 1:12, 13) Taunimanima idia regerege lasi gabuna ta ita tahua be namo, ita sibona eda guriguri gwauraia totona.—Mareko 1:35.

4. Dahaka gaudia oi gurigurilaia diba? Ia ida emui turana karana ia hanamoa eiava ia hadikaia diba gaudia ibounai. (Filipi 4:6, 7) Iesu ese ia hahedibalaia gurigurina amo ia hedinarai, namona be Iehova ena ladana bona palani totona ita guriguri. Iseda tauanina durua gaudia totona, iseda dika gwauatao totona, bona hedibagani negana ai heduru totona ita guriguri diba. (Mataio 6:9-13) Namona be iseda guriguri be ita sibona eda ura totona lasi. Namona be ita gurigurilaia gaudia be Dirava ena ura hegeregerena.—1 Ioane 5:14.

5. Emu lalona ena hemami dainai Dirava oi ura tanikiu henia eiava hanamoa negadia ai, oi guriguri henia diba. (1 Sivarai 29:10-13) Hekwakwanai oi davaria neganai bona emu abidadama idia tohoa neganai, namona be oi guriguri. (Salamo 55:22; 120:1) Emu aniani oi do ania lasi neganai oi guriguri be maoro. (Mataio 14:19) Iehova ese ita ia hamaoroa “nega ibounai” ita guriguri.—Efeso 6:18.

6. Kara dika hereana ta ita karaia neganai, ita guriguri be gau badana. Unai nega ai namona be Iehova ita noia, ita ia hebogahisi henia bona iseda dika ia gwauatao. Bema ia dekenai iseda kerere ita gwauraia bona ita hekwarahi do ita karaia lou lasi totona, Dirava be ia “noho hegaegae dika do ia gwauatao.”—Salamo 86:5, NW; Aonega Herevadia 28:13.

7. Iehova be kara maoromaoro taudia edia guriguri sibona ia kamonai henia. Oiemu guriguri ia kamonaia totona, namona be iena taravatu oi badinaia noho mai emu goada ibounai ida. (Aonega Herevadia 15:29; 28:9) Namona be mai manau ida oi guriguri. (Luka 18:9-14) Oi gurigurilaia gauna hegeregerena oi hekwarahi be namo. Unai amo oi hahedinaraia oi be mai emu abidadama bona oi gwauraia gauna be mai emu momokani ida oi gwauraia. Unai neganai sibona, Iehova ese emu guriguri do ia haerelaia.—Heberu 11:6.

Copyright © 2006 Watch Tower Bible and Tract Society of Pennsylvania. All rights reserved.