Dirava be Daika? - Iehova Ena Witnes Taudia: Watchtower Society Ena Web Site

Iehova Ena Witnes Taudia: Watchtower Society Ena Web Site

Beliefs

Future

Dirava be E Uramu Dahaka Baita Kara?

Kaha 2

Dirava be Daika?
	Dirava korikorina be daika, bona ladana be daika? (1, 2)
	Ia oromana be ede bamona? (3)
	Iena kara hereadaedia be dahaka? (4)
	Ia ta toma diho heniamu lalonai kaivakuku bona laulau baita ğaukaralai namo? (5)
	Ededia dala rua amo Dirava baita dibaia diba? (6)

1. Taunimanima na ğau momo e toma diho henidiamu. To Baibel ese ita e hamaorodamu Dirava KORIKORINA na tamona. Ia ese guba bona tanobada ğaudia iboudiai e havaradia. Ia ese mauri e henida dainai, namona na Ia sibona mo baita toma diho henia.—1 Korinto 8:5, 6; Apokalupo 4:11.

2. Dirava ena dagi ladadia na momo to ia ladana na tamona. Una lada na IEHOVA. Baibel momo lalodiai, Dirava ladana na e kokia bena gabunai na dagi ladadia LOHIABADA eiava DIRAVA e ato. To Baibel e torea neganai, ina lada Iehova na nega 7,000 heğereğerena e torea!—Esodo 3:15; Salamo 83:18.

3. Iehova na mai tauanina, to dia ita eda heğereğerena. Baibel na e gwaumu, “Dirava na Lauma.” (Ioane 4:24) Lauma na e maurimu oromana ta, ita eda mauri e hereaiamu maurina. Taunimanima ta ese Dirava se itaia. Iehova na gubai e nohomu, to ğau iboudiai baine ita diba. (Salamo 11:4, 5; Ioane 1:18) O lauma helağa be dahaka? Ia na dia Dirava heğereğerena tauna ta. To ia na Dirava ena ğaukara siahuna.—Salamo 104:30.

4. Baibel ese Iehova ena kara na ita e hahedinarai henidamu. E hahedinaraiamu iena kara hereadaedia na lalokau, hahemaoro maoromaoro, aonega, bona siahu. (Deuteronomi 32:4; Iobu 12:13; Isaia 40:26; 1 Ioane 4:8) Baibel ese danu e hadibadamu ia na hebogahisi, kara namo, dika igwautaodia, harihari bada, bona haheauka Diravana. Namona na natu mai edia kamonai heğereğeredia, ia baita tohotohoa.—Efeso 5:1, 2.

E havara ğaudia amo bona Baibel amo Dirava ta dibaiamu

5. Kaivakuku, laulau, eiava toa baita toma diho henidia eiava baita ğuriğuri henidia maoro, a? Lasi! (Esodo 20:4, 5) Iehova na e gwaumu ia sibona mo baita toma diho henia. Ia hairaina na ma tau ta eiava ğau ta basine henia. Kaivakuku na asi siahudia ita bae duruda.—Salamo 115:4-8; Isaia 42:8.

6. Dirava be ede baita dibaia namonamo toma? Dala ta na ia e kara ğaudia baita itadia namonamo bona unu ğau amo ta dibamu ğaudia baita lalohadailai. Dirava e havara ğaudia ese e hahedinarai henidamu iena aonega bona siahu na bada herea. Iena lalokau na e kara ğaudia iboudiai lalodiai e hedinaraimu. (Salamo 19:1-6; Roma 1:20) Dirava baita dibaia dalana ma ta na Baibel baita stadilaia karana amo. Baibel lalonai ia ese sivarai momo amo e hadibadamu ia be Dirava ede bamona. Ia ena ura badana bona e uramu baita kara karadia danu e hahedinarai henidamu.—Amos 3:7; 2 Timoteo 3:16, 17.

Lagani 2001 ai E Halasia
Copyright © 2006 Watch Tower Bible and Tract Society of Pennsylvania. All rights reserved.