Dirava Ena Basileia be Dahaka?

1. Iesu tanobada ai e nohova neganai, ia ese murinai e rakava taudia e hamaorodia Dirava ena Basileia bae ğuriğurilaia. Basileia na pavapava ta ese e lohiaiamu gavamanina ta. Dirava ena Basileia na gavamani idau hereana. Ia na guba ai e haginia bona ina tanobada baine lohiaia. Ia ese Dirava ladana baine hahelağaia. Ia amo Dirava ena ura tanobada ai baine hekara gubai e karamu na heto.—Mataio 6:9, 10.

2. Dirava na e gwauhamata Iesu na Iena Basileia Pavapavana ai bainela. (Luka 1:30-33) Iesu tanobada ai e nohova neganai, e hamomokania ia na hebogahisi bona hahemaoro maoromaoro Lohiana bona Lohia ğoevadaena ai bainela. Guba e lou lao neganai, ia na dia maoromaoro Dirava ena Basileia Pavapavana ai e halaoa. (Heberu 10:12, 13) Lağani 1914 ai, Iehova ese Iesu na e gwauhamatalai henia dagina e henia. Una nega amo, Iesu na guba ai e lohiamu, ia na Iehova ena abi hidi Pavapavana.—Daniel 7:13, 14.

3. Iehova ese tanobada amo abidadama tataudia bona hahinedia haida danu e abidia hidi guba baela. Iesu ida taunimanima bae lohiadia, idia na pavapava, hahemaoro taudia, bona hahelağa taudia ai baela. (Luka 22:28-30; Apokalupo 5:9, 10) Iesu ese ena Basileia lalonai ia bae bamoa lohiadia na e gwauraidia “seri maraği.” Edia namba na 144,000.—Luka 12:32; Apokalupo 14:1-3.

4. Iesu pavapava ai ela neganai, maoromaoro Satana bona ena aneru dikadia na guba amo e tahodia dobi tanobada ai. Una dainai lağani 1914 amo, tanobada ai ğau iboudiai na vada eme dika herea. (Apokalupo 12:9, 12) Tuari, doe, dai-hanai goreredia, bona kara havara e badamu—ini iboudiai na ‘toa’ ta e hahedinaraiamu, anina na Iesu na vada e lohiamu bona ina tanobada oromana na dina gabediai vada eme kau.—Mataio 24:3, 7, 8, 12; Luka 21:10, 11; 2 Timoteo 3:1-5.

5. Kahirakahira Iesu ese taunimanima baine hahemaoro henidia, mamoe ireğuna tauna ese mamoe bona nani e hapararadiamu heğereğerena baine hapararadia. Una neganai “mamoe” na edia kara amo vada e hamomokania idia na ia henunai ia e badinaiava taudia. Idia na tanobada ai mauri hanaihanai bae abia. “Nani” na Dirava ena Basileia e dadaraia taudia. (Mataio 25:31-34, 46) Kahirakahira, Iesu ese nani heğereğeredia taudia iboudiai baine haoredia. (2 Tesalonika 1:6-9) Bema oi na o uramu Iesu ena “mamoe” ta ai baola, namona na Basileia sivaraina ba kamonaia bona o dibadiamu ğaudia na ba badina.—Mataio 24:14.

Iesu ena lohia henunai, inai heheni bona heiriheiri na bae ore

6. Ina tanobada na tano idauidau ai vada e parara. Ta ta sibodia mai edia gavamani. Nega momo unu tano na sibodia e hetuari hehenimu. To Dirava ena gavamani ese taunimanima edia gavamani gabudia baine abi. Una na tanobada ibounai baine lohiaia gavamanina tamona. (Daniel 2:44) Bena tuari, kara dika, bona dağedağe na basie vara lou. Taunimanima iboudiai na maino bona lalo-tamona ai bae noho hebou.—Mika 4:3, 4.

7. Iesu ena Lağani Daha Lohiana lalonai, abidadama taudia na bae ğoevadae, bona tanobada ibounai na paradaiso ai bainela. Unu lağani daha bae ore neganai, Iesu na Dirava e gwaurai ğaudia iboudiai na vada baine kara vaitani. Bena Basileia na Tamana baine henia lou. (1 Korinto 15:24) Dirava ena Basileia ese baine kara ğaudia na turamu bona o lalokau henidiamu taudia boma hamaorolaidia, ani?

Copyright © 2006 Watch Tower Bible and Tract Society of Pennsylvania. All rights reserved.