Dirava E Hamoaleamu Ruma Bese Maurina

1. Baibel na e gwaumu tau na iena ruma bese kwarana. (1 Korinto 11:3) Tau na adavana tamona mo baine abia. Namona na taravatu heğereğerena ai bae headava.—1 Timoteo 3:2; Tito 3:1.

2. Tau ese adavana baine lalokau henia ia sibona e helalokaumu heğereğerena. Baine kara henia Iesu ese ia murinai e rakamu taudia e kara henidiamu heğereğerena. (Efeso 5:25, 28, 29) Adavana na basine dadabaia eiava dala ma ta ai basine hadikaia. To, namona na baine hanamoa bona baine matauraia.—Kolose 3:19; 1 Petro 3:7.

Tama lalokauna ese ena ruma bese taudia na tauanina kahanai bona lauma kahanai e durudiamu

3. Tama na baine ğaukara goada ena ruma bese baine naria totona. Adavana bona natuna adia aniani, edia dabua, bona noho gabuna baine henidia. Tama ese lauma kahanai ena ruma bese bae abi ğaudia danu baine henidia. (1 Timoteo 5:8) Ia ese Dirava bona ena ura idibana karanai ena ruma bese baine gunalaia.—Deuteronomi 6:4-9; Efeso 6:4.

4. Headava hahinena na adavana baine durua namonamo hahinena. (Genese 2:18) Namona na natudia ihadibadia ğaukarana ai adavana baine durua. (Hereva Lada-isidia 1:8) Iehova na e uramu hahine na mai lalokauna ida ena ruma bese baine naria. (Hereva Lada-isidia 31:10, 15, 26, 27; Tito 2:4, 5) Namona na adavana baine matauraia.—Efeso 5:22, 23, 33.

5. Dirava na e uramu natu ese tamadia bona sinadia bae kamonai henidia. (Efeso 6:1-3) Ia na e uramu tama sina ese natudia bae hadibadia bona bae hamaoromaorodia. Tama sina na natudia ida bae kone noho bona idia ida Baibel bae stadilaia hebou, unu amo hemami kahanai bona lauma kahanai bae abi ğaudia na bae henidia. (Deuteronomi 11:18, 19; Hereva Lada-isidia 22:6, 15) Namona na tama sina ese natudia matadia e hakanimu neganai, dia lalo-dika eiava dağedağe ai bae karaia.—Kolose 3:21.

Dirava na e uramu tama sina ese natudia bae hadibadia bona bae hamaoromaorodia

6. Headava taudia asi e noho hebou namonamomu neganai, mani Baibel ena sisiba bae badina toho. Baibel ese e hagoadadamu lalokau baita hahedinaraia bona dika baita gwau tao. (Kolose 3:12-14) Baibel na se gwaumu headava ihapararana na hekwakwanai marağidia ihamaoromaorodia dalana. To hahine na reana adavana idiho tanina karana baine abia hidi bema (1) tau na se ura vaitanimu ena ruma bese baine durua, (2) tau ena dağedağe bada herea dainai ia tauanina eiava ena mauri baine hadikaia diba, eiava (3) tau ena dağedağe bada dainai Iehova baine toma diho henia karana na e koua vaitanimu.—1 Korinto 7:12, 13.

7. Headava taudia na bae heabidadama heheni. Heudahanai tauna na Dirava bona adavana e kara dika henidiamu. (Heberu 13:4) Headava murimurinai mahuta hebou karana na Baibel ese e gwauraiamu headava ihadokona badina tamona, una neganai headava lou dalana e kehoamu. (Mataio 19:6-9; Roma 7:2, 3) Bema taunimanima na dia Baibel ese e gwauraiamu badina na dainai edia headava e hadokomu bena ma e headava loumu, Iehova ese una kara na e inai heniamu.—Malaki 2:14-16.

Copyright © 2006 Watch Tower Bible and Tract Society of Pennsylvania. All rights reserved.