Dirava Ena Hesiai Taudia na Bae Ğoeva

1. Iehova Dirava na ğoeva bona helağa. Ia na e uramu ia e toma diho heniamu taudia na bae ğoeva—lauma kahanai, kara ai, lalohadai ai, bona tauani ai. (1 Petro 1:16) Dirava vairanai baita ğoeva hanaihanai na mai hekwarahina. Ita na tanobada mirona lalonai ta nohomu. Bona kara kereredia ikaradia urana danu ta tuari henimu. To basita hesiku.

2. Lauma Kahanai Baita Ğoeva: Bema ita na ta uramu Iehova isiaina baita lao heni, tomadiho koikoi edia hahediba herevadia eiava kara ta basita dogotao. Tomadiho koikoi amo baita siri bona dala ta ai basita durua. (2 Korinto 6:14-18; Apokalupo 18:4) Dirava sivaraina momokanina ta dibamu neganai, baita henari namonamo hereva koikoidia e hahedibalaimu taudia ese bae hakauda kerere na garina.—2 Ioane 10, 11.

3. Eda Kara Bae Ğoeva: Iehova na e uramu ia e toma diho heniamu taudia na nega iboudiai Kristen taudia korikoridia edia kara bae kara. (1 Petro 2:12) Ita ta karamu ğaudia iboudiai na e itamu, kara hehunidia danu. (Heberu 4:13) Mata-bodağa karadia bona ina tanobada ena kara mirodia iboudiai baita dadaraidia.—1 Korinto 6:9-11.

4. Darada Bae Ğoeva: Bema ita laloda na lalohadai ğoevadia amo baita hahonudia, eda kara danu be ğoevamu. (Filipi 4:8) To bema ğau mirodia baita lalohadailaimu, dokonai kara dikadia be varamu. (Mataio 15:18-20) Laloda bae hamiro diba moale karadia idauidau na baita dadarai. Dirava ena Hereva istadilaina karana amo laloda na lalohadai ğoevadia amo baita hahonu diba.

5. Tauanida Bae Ğoeva: Kristen taudia na Dirava ladanai e ğaukaramu dainai, tauanidia bona edia dabua bae ğoeva na namo. Mei rumadia ta laomu murinai, bona aniani do asita animu eiava do asi ta heğaeğaelaimu negadiai, imada na baita huri. Bema asi emu mei rumana, murimuri na tano ai ba tahuni. (Deuteronomi 23:12, 13) Tauani e ğoeva hanaihanaimu neganai ena namo na e habadaiamu. Kristen tauna ena ruma lalona bona murimurina bae ğoeva na namo. Iena gabu taudia padadiai iena noho gabuna toana na baine namo.

6. Eda Hereva Bae Ğoeva: Dirava ena hesiai taudia na hanaihanai hereva momokani bae gwaurai. Dirava ena Basileia lalonai koikoi taudia na basie vareaimu. (Efeso 4:25; Apokalupo 21:8) Kristen taudia ese hereva dikadia na se ğaukaralaimu. Hevaseha hereva mirodia eiava sivarai mirodia na se hakala henimu bona se gwauraimu. Edia hereva ğoevadia daidiai, edia ğaukara eiava sikuli gabudiai bona edia noho gabudiai idia na idau.—Efeso 4:29, 31; 5:3.

Dirava ena hesiai taudia na ğau iboudiai lalodiai bae ğoeva

Copyright © 2006 Watch Tower Bible and Tract Society of Pennsylvania. All rights reserved.