Dirava ese E Inai Henimu Karadia

1. Dirava ena hesiai taudia ese kara namodia na e ura henimu. To, dika i inai henina danu bae manadalaia. (Salamo 97:10) Una anina na Dirava e inai henimu karadia bae dadarai. Unu kara haida be dahaka?

2. Mata-bodağa: Asi e headava taudia e eno boumu, heudahanai, animal ida eno bou, ruma bese taudia ida eno bou, bona tatau tatau ida bona hahine hahine ida e eno boumu karadia iboudiai na Dirava ikara dika henina karadia dikadia. (Levitiko 18:6; Roma 1:26, 27; 1 Korinto 6:9, 10) Bema tau ta bona hahine ta na do se headava to e noho heboumu, namona na bae parara eiava taravatu heğereğerena ai bae headava.—Heberu 13:4.

Dirava ese inuinu kekero, henaohenao, laki gadaradia, bona dağedağe karadia na e inai henimu

3. Koikoi, Laki Gadaradia, Henaohenao: Iehova Dirava na basine koikoi diba. (Tito 1:2) Iena lalo namo e uramu bae abia taudia ese koikoi na bae dadaraia. (Hereva Lada-isidia 6:16-19; Kolose 3:9, 10) Laki gadaradia iboudiai lalodiai matağaniğani na mia. Una dainai Kristen taudia na laki gadaradia iboudiai, heğereğere lotto, hosi reisi, bona bingo gadaradia lalodiai na se vareaimu. (Efeso 5:3-5) Bona Kristen taudia na se henaohenaomu. Henaohenao kohudia na se hoimu eiava gwau maoro do se abi neganai ğau na se abi kavamu.—Esodo 20:15; Efeso 4:28.

4. Badu Dikadika, Dağedağe: Badu basita biagua neganai dağedağe karadia bae vara diba. (Genese 4:5-8) Dağedağe tauna na Dirava turana ai basinela diba. (Salamo 11:5; Hereva Lada-isidia 22:24, 25) Dava-abi eiava ma haida edia dika davana ihalouna karana na kerere.—Hereva Lada-isidia 24:29; Roma 12:17-21.

5. Mea Bona Babalau: Taunimanima haida na lauma edia siahu e noimu gorere bae hanamo totona. A haida be mea e ruhamu inaidia ihagoreredia eiava ihamasedia totona. Unu kara iboudiai na Satana ese e havaramu. Una dainai Kristen taudia na unu kara iboudiai lalodiai basie vareai. (Deuteronomi 18:9-13) Haida ese ihadikada dainai bae ruha meadia amo baine gimada ğauna hereadaena na Iehova dekedekenai baita noho.—Hereva Lada-isidia 18:10.

6. Inuinu Kekero: Uain, bia, eiava ma inuinu muramuradia taidia baita inu na dia kerere. (Salamo 104:15; 1 Timoteo 5:23) To, Dirava matanai inuinu momo bona inuinu kekero karadia na kekerere. (1 Korinto 5:11-13; 1 Timoteo 3:8) Inuinu momo karana ese tauanimu bona emu ruma bese baine hadikadia diba. Una kara dainai ma hedibağani haida ese danu bae hamorumu harağa diba.—Hereva Lada-isidia 23:20, 21, 29-35.

7. Dirava ese dikadia e gwauraimu ğaudia e karamu taudia na “Dirava ena Basileia basie abia” diba. (Galatia 5:19-21) Bema oi na Dirava o lalokau henia momokanimu bona o uramu ba hamoalea, oi na unu kara amo na ba heruha diba. (1 Ioane 5:3) Dirava ese dikadia e gwauraimu ğaudia i inai henidia karana ba manadalaia. (Roma 12:9) Kara namodia e karamu taudia ba bamodia. (Hereva Lada-isidia 13:20) Lo Kristen taudia ese oi na bae durumu diba. (Iakobo 5:14) A kara hereadaena na, ğuriğuri amo Dirava enai ba tabekau.—Filipi 4:6, 7, 13.

Copyright © 2006 Watch Tower Bible and Tract Society of Pennsylvania. All rights reserved.