Dirava E Habaduamu Hahediba Herevadia Bona Sene Karadia

Dirava na dia Toi Tamona

1. Dia hahediba herevadia iboudiai bona dia sene karadia iboudiai na didika. To bema idia na tomadiho koikoi amo eiava dia Baibel ena hahediba herevadia heğereğeredia, Dirava ese na se abidia daemu.—Mataio 15:6.

2. Toi Tamona: Iehova be Toi Tamona—taunimanima toi Dirava tamona lalonai, a? Lasi! Iehova, Tamada, na “Dirava Korikori tamona.” (Ioane 17:3; Mareko 12:29) Iesu na Ia Natuna roboana, bona ia na Dirava henunai. (1 Korinto 11:3) Tamana ese Natuna na e hereaiamu. (Ioane 14:28) Lauma helağa na dia tau ta; ia na Dirava ena ğaukara siahuna.—Genese 1:2; Kara 2:18.

Krismas bona Ista na idaunegai tomadiho koikoidia amo ema

Mase taudia itoma diho henidia eiava igari henidia na asi badina

3. Krismas Bona Ista: Iesu na dia December 25 ai e vara. Ia na October 1 heğereğerena e vara, una neganai mamoe inaridia taudia na hanuaboi ai murimuriai mamoe e nariva. (Luka 2:8-12) Iesu ese Kristen taudia na nega ta se hağanidia iena vara dinana bae moalelaia. A ena hahediba taudia na e hamaorodia, iena mase dinana bae laloatao. (Luka 22:19, 20) Krismas bona imoalelaina karadia na idaunegai tomadiho koikoidia edia amo ema. Ista karadia, heğereğere ğatoi bona rabeti iğaukaralaidia karadia, danu unu heto. Kristen taudia ginigunadia ese Krismas bona Ista na se hahelağadiava, bona hari ina nega Kristen taudia ese danu se hahelağadiamu.

4. Vara Dinadia: Vara dinadia moaledia rua hona Baibel ese e herevalai na Iehova asie toma diho heniava taudia ese e kara. (Genese 40:20-22; Mareko 6:21, 22, 24-27) Kristen taudia ginigunadia ese vara dinadia moaledia na se karava. Vara dinadia imoalelaidia karadia na idaunegai tomadiho koikoidia edia amo ema. Kristen taudia korikoridia na dina ma haida lalodiai harihari ğaudia e henimu bona e moale heboumu.

5. Mase Taudia Igari Henidia: Mase taudia na ğau ta basie kara eiava basie mami diba. Basita durudia diba, bona idia ese basie hadikada diba. (Salamo 146:4; Kohelete 9:5, 10) Taunimanima ta e masemu neganai, se masemu laumana ta ia tauanina amo se lasimu, bena mase murinai se maurimu. To nega haida lauma dikadia, e gwauraidiamu demoni, na e koikoimu, mase taudia laumadia ai e hahelaomu. Mase taudia igari henidia eiava itoma diho henidia daidiai e karamu karadia iboudiai na kekerere.—Isaia 8:19.

6. Korosi: Iesu na dia korosi ai e mase. Ia na du eiava au ta ai e mase. Baibel momo lalodiai Greek gado herevana ta e hahanaia “korosi” anina na au tamona. Korosi toana na idaunegai tomadiho koikoidia amo e abia. Kristen taudia ginigunadia ese korosi na se ğaukaralaia eiava se toma diho henia. Una dainai, o laloamu tomadiho lalonai korosi ta baita ğaukaralaia namo, a?—Deuteronomi 7:26; 1 Korinto 10:14.

7. Reana unu hahediba herevadia bona sene karadia haida irakatanidia na auka herea. Reana varavara bona bamo ese lalomu bae ania, o abidaeva ğaudia basio haidau totona. To mai anina bada ğauna na Dirava ihamoalena, dia taunimanima ihamoaledia.—Hereva Lada-isidia 29:25; Mataio 10:36, 37.

Copyright © 2006 Watch Tower Bible and Tract Society of Pennsylvania. All rights reserved.