¿Ti tëyʼäjtën jantsy tukniʼijxëbë Biiblyë?

TI DIʼIB mnijäʼäp ko xykyajxyë perioodikë, xyʼixyë telebisionk o xymyëdoyë raadyë? ¡Yëʼë jantsy yajmaytyakpë axëkʼäjtën, tsip ets mä tyuny jyatyëty tijaty diʼib atsëʼk ajäʼäp! Okwinmayë net mä amay jotmay diʼib mëdäjtypy. Mbäät mëk myajmay myajtäjʼyëtyë yuu päʼäm o ko yʼooky tuʼugë mjiiky mëguʼuk o mëtnaymyaayëbë. Mbäät dëʼën mnayjawëty extëmë Job, tuʼugë oyjyaʼay diʼib ojts jyënaʼany ko jyäʼäbë jäj jëmuʼumën mët ja amay jotmay diʼib myëdäjt (Job 10:15).

Waʼan mnayajtëyëty:

• ¿Tyäʼädëtsë Dios xytyukmëtsojk ets diʼib tyukmëtsojk niʼamukë jäʼäy?
• ¿Mäts mbäät nbäätyë naybyudëkë ets nmëmadäʼägëdëtsë jotmay?
• ¿Waʼandaa näʼä jyaʼatëdë jotkujkʼäjtën yä Naxwiiny?

Tëgekyë tyäʼädë yëʼë diʼibë Biiblyë yʼatsoojëmbijtaapy.

BIIBLYË TYUKNIʼIXË KO DIOS YËʼË TYÄʼÄDË JOTKUJKʼÄJTËN YAJMINAAMPY YÄ NAXWIINY.

“Esë Dios yajtëtsʼxëdët tëgekyë ja wyinëë. Kyaj yʼokʼijnët ja oʼkën, jëʼëy yaxën o ja pëjk adoʼonën.” (Diʼibʉ Jatanʉp o Apocalipsis 21:4)

“Tadë tekymyäʼät kyëxpatäʼäny mumaty extëmë jatsyuʼu.” (Isaías 35:6)

“Ja wiints yʼijxpëkäʼäny.” (Isaías 35:5)

“Pën wëndëgoy ejtnëdëp, jëts ja pyëtsëʼëmdët jap ooʼkpë jutjotpy.” (Juan 5:28, 29, ØXN)

“Ni tuʼuk diʼib tsëënëyäämp kyajënäʼänäʼäny: Pëjkëbëts.” (Isaías 33:24)

“Ninäʼä kyanekyʼayowët mët ja yuu.” (Diʼibʉ Jatanʉp 7:16)

NAYTYUKPUDËKËDË TIJATYË BIIBLYË TUKNIʼIJXËP

Katë mwinmääygyojy ko diʼib të xyʼixy, dyëʼënëty extëmë tsuu kumäʼäy. Dios yëʼëdën të twandaʼaky, etsë Biiblyë nyimaytyakypy wiʼixë Dios dyaʼadëwäʼäny.

Per kyaj yëʼëyëty jeʼeyë. Biiblyë nan nyimaytyakypy wiʼix tyam mbäät njukyʼäjtëm agujk jotkujk. Okwinmayë amay jotmay diʼib mëdäjtypy. Waʼan mjotmaytyunyëtyë meeny sentääbë, mfamilyë, yuu päʼäm o ko yʼooky tuʼugë mjiiky mëguʼuk. Biiblyë mbäät xypyudëjkëm ets nmëmadakëmë amay jotmay, ets nan xyjotkujkmoʼoyëm ko tʼatsoojëmbijtäʼäy diʼib nayajtëʼëjëm, extëm diʼib yä abatkëʼëy.

• ¿Tiko nʼayoʼojëm?
• ¿Wiʼix mbäät nwinguwäʼk njëjpkuwäʼkëmë amay jotmay diʼib ndukjukyʼäjtëm?
• ¿Ti mbäät nduʼunëm etsë nfamilyëʼäjtëm yʼitët agujk jotkujk?
• ¿Wiʼix njäjtëm ko nʼoʼkëm?
• ¿Waʼandaa näʼä nëjx nʼijxëmë nmëguʼukʼäjtëm diʼib të yʼoʼknëdë?
• ¿Tiko mbäät nʼijtëm seguurë ko Dios kyuytyunaampy diʼib të twandaʼaky?

Ko kujk xykyajxy axtë yä, yëʼë myaʼijxëp ko mtsojkënyëʼajtypy xynyijawëyaʼany tidënë Biiblyë tukniʼijxëp. Tyäʼädë liibrë yëʼë mbudëkëdëp ets xynyijawët. Mʼixaampy ko tim abatkëʼëy myinyë yajtëʼëwën diʼib yaʼatsoojëmbijtp mä parrafo. Miyonkʼamë jäʼäy tʼoyʼixtë ko dëʼënë Jyobaa tyestiigëty tʼëxpëktë Biiblyë, ko tmëminyë yajtëʼëwën ets yaʼatsoojëmbity mä parrafo, nʼawijxtëbëts ets mijts nandëʼën xyʼoyʼixët. Dios mgunuʼxëdëp ko dëʼënë tsojkënë xymyëdaty parë xynyijawëyaʼany ti tëyʼäjtën jantsy tukniʼijxëbë Biiblyë.

IXYʼATË MBIIBLYË

TADË Biiblyë ja tmëminy 66 liibruʼunk, myëmiimbyë kapitulo etsë bersikulo parë pojënë xypyäädët. Ko mä tyäʼädë liibrë yajnigajxy tuʼugë tekstë diʼib mä Biiblyë, diʼib tim jawyiinë numero miimp yëʼë kapitulo, etsë myëmajtskpë numero yëʼë bersikulo. Extëm nʼokpëjtakëm “2 Timotee 3:16”, yëʼë myaytyakypy ja myëmajtskpë neky diʼibë Pääblë tyuknigajx ja Timotee, kapitulo 3, bersikulo 16.

Pën mʼëxtaabyë tekstë diʼib miimp mä tyäʼädë liibrë, ta tsojk xyjatäʼäny xyajtunëdë Biiblyë. Oyxyëp ko nandëʼën xymyëdatyë kostumbrë ets xykyäjxëdë Biiblyë ijtp. Ko xykyäjxët tëgëk kapitulo o mëgoxk kapitulo jabom jabom të naty xykyäjxtäʼäy ko yʼabatët tuk jëmëjt.