 |
Beliefs | Future | Medical | Topics | Ëxtääytyëgëts | Publications | Languages |
Käjx nandu’unë
¿MNIJAWËYAAMPY wi’ix ya’’atsoojëmbity di’ib mayë jä’äy nayajtëëjëdëp? Wa’an mijts kë’ëm nandu’un të mnayajtëyëty:
¿Pën mbäät t’atsoojëmbityë tyä’ädë yajtë’ëwën? Ko mijts xyajtëwët niganäägë jä’äy mbäät tëgatsyaty m’atsoyëty, axtë pën myajtëëbyë wijy jya’ay o jä’äy di’ib may’aty wintsë’ëgë ijtp mbäät tëgatsyaty y’atsowdë ets ni’igyë mgujo’obëdët.
Per ta tu’ugë liibrë di’ib tëy’äjtën myaytya’aky ets kyaj y’anda’aky. Jesukristë ko tëgok tmënu’kxtakyë Tyeety ojts t’anëëmë: “Tëy jantsyxë ja ngajpxy m’ayuujk” (Juan 17:17, ØXN). Tadë Diosë kyajxy y’ayuk yajpääty mä Biiblyë. Di’ib yä anikëjxy të dyajtëy tëdujk peky yë’ë di’ib yam nijawëyä’änëm wi’ixë Biiblyë t’atsoojëmbity tëy’äjtën myëët.
¿TIKO DU’UN NAYAJTË’ËJËM? Yë’ko tyamë naxwinyëdë të tyuktiky mëdë axëk’äjtën etsë naytyëytyunë. Mayë relijyonk tyukni’’ixë ko Diosën tsyejpy ets n’ayo’ojëm, ets ko yë’ë xytyëytyu’unëm.
BIIBLYË DU’UN TYUKNI’’IXË. Dios ninä’ä tkayaja’’atyë axëk’äjtën. Job 34:10 jyëna’any: “¡Jagam y’ity etsë Diosë tëy’äjtënbë ttunëdë axëk’äjtën, ets di’ib myëdäjtypy tukë’ëyë mëk’äjtën ttunët di’ib kyaj tyëy’äjtënëty!”. Dios xytsyojkëm pääty të ttuknibëjtäägë dyajminä’änyë y’Ana’amën. Jesus du’un ojts xytyukni’’ijxëm nu’kxtakëm: “Dios Teety, miity mëdyiibë tsajpjooty tsënaaybyëny [...]. Wan ja’a m’ana’amëny yä miny. Wan ja’a mtsojkëny yä naaxwiiny yajkuytyuny [...] du’un neby jiiby tsajpjooty yajkuytyunyëny” (Mateo 6:9, 10, NTM). Dios jantsy naytyukjotmaytyuunëp mët ëtsäjtëm, pääty tkejxyë y’U’unk yä naxwiiny ets y’adëwët di’ib të ttuknibëjtäägë (Fwank 3:16).
Käjx nandu’unë Génesis 1:26-28; Santya̱’a̱gʉ 1:13 etsë 1 Peedrʉ 5:6, 7.
¿TIKO DU’UN NAYAJTË’ËJËM? Yë’ko miyonk’amë jä’äy kujk y’ooktë mä tsip tyunyëty. Ets ni’amukë wi’ixëm ngu’ayo’ojëm.
BIIBLYË DU’UN TYUKNI’’IXË. Dios të twanda’aky dyajminä’änyë jotkujk’äjtën yä Naxwiiny. Ko ja y’Ana’amën myinët kyaj jä’äy “tnekynyi’ëxpëkëyä’ändë ni’igyë tsip”, pes du’un “dyajjëmbitä’ändë y’espäädë extëmë aräädë” (Isaías 2:4). Dios nan yajjëjptëgoyaambyë ayo’on etsë naytyëytyunë. Mä Biiblyë du’un twanda’aky: “Esë Dios yajtëts’xëdët tëgekyë ja wyinëë. Kyaj y’ok’ijnët ja o’kën, jë’ëy yaxën o ja pëjk ado’onën, ja’a ko tëgekyë di’ibë të y’ity [extëmë ayo’on etsë naytyëytyunë], të ja nyaxy kyexy” (Di’ibʉ Jatanʉp o Apocalipsis 21:3, 4).
Käjx nandu’unë Salmo 37:10, 11; 46:9 etsë Miqueas 4:1-4.
¿TIKO DU’UN NAYAJTË’ËJËM? Yë’ko mayë relijyonk tyukni’’ixëdë ko tap ti nmëdäjtëm jodoty di’ib pëtsëëmp ko n’o’këm ets nyejxy wiinktsoo juky’äjtpë. Ta net di’ib jënandëp ko o’kpë mbäät t’axëktunyë juukypyëty o ko Dios tyëytyuumbyë axëkjä’äy ko tpëjta’aky mä ayodakn ets jap y’ayowët winë xëë winë tiempë
BIIBLYË DU’UN TYUKNI’’IXË. Ko tu’ugë jä’äy y’ooky kyaj mä nyekyyajpääty. Eclesiastés 9:5 jyëna’any ko “o’kpë nitii tkanekywyinmaytyë”. Kyaj ti tjawëdë ets kyaj ti mbäät ttundë, pääty kyaj mbäät t’axëktunyë juukypyëty ets nan kyaj mbäät tpudëkë (Salmo 146:3, 4).
Käjx nandu’unë Génesis 3:19 etsë Eclesiastés 9:6, 10.
¿TIKO DU’UN NAYAJTË’ËJËM? Yë’ko kyaj pën jya’oogä’äny, ni’amukë njajuky’atä’änëm mëdë jiiky mëgu’uk di’ib ntsojkëm. Pääty nwin’ixä’änëm jatëgokë jiiky mëgu’uk di’ib të y’o’knë.
BIIBLYË DU’UN TYUKNI’’IXË. Mayë jä’äy di’ib të y’o’k të tyëgooynyë jyukypyëkä’ändë jatëgok yä naxwiiny. Biiblyë jyëna’any: “Ku ja jää’y tmadojëdët Dios U’unk y’ayuujk pën wëndëgoy ejtnëdëp, jëts ja pyëtsë’ëmdët jap oo’kpë jutjotpy” (Juan 5:28, 29, ØXN). Tadë o’kpë di’ib pëdë’ëgandëp jyuky’atä’ändë jatëgok yä Naxwiiny ets t’ixä’ändë wi’ixë naxwinyëdë jyëmbity jantsy tsuj du’un extëmë Dios ojts ttuknibëjtäägë y’itët. Pënaty tyam kyaj tmastu’uttë Dios jyuky’atä’ändë xëmëkyëjxm ets ninä’ä kyanekypyä’ämbatä’ändë. Mä Biiblyë jyëna’any: “Pënaty juky’äjttëp tëy’äjtën myëët tja’’atä’ändë naxwinyëdë, ets ttuktsëënëyä’ändë xëmëkyëjxm” (Salmo 37:29).
Käjx nandu’unë Job 14:14, 15; Lukʉs 7:11-17 etsë Apostʉlʉty 24:15.
¿TIKO DU’UN NAYAJTË’ËJËM? Yë’ko oy di’ibë relijyongë jä’äy ttuk’itët ak myënu’kxtaktëbë Dios. Per may wyinmaytyë ko kyaj ya’’atsoojëmbityë nyu’kxtakën.
BIIBLYË DU’UN TYUKNI’’IXË. Jesus ojts tnigajxy ko kyaj natim’yë’ëyëm nijëmbijt ni’adëjëm ja ää ayuk ko nu’kxtakëm. Du’un jyënany: “Jëts ku dë’ën jade’en ja Dios x’ajot’ättët, kidi ja xkäjpxjëmbettë xkäjpx’adëjtë midi të xja’ukäjpxtë” (Mateo 6:7, ØXN). Pën ntsojkëm etsë Dios tmëdowëdë nu’kxtakën tsojkëp nmëgäjxëm extëm yë’ë ttukjotkëdä’ägët. Pääty oy ko nijä’äjëm wi’ixë Dios ttseky njuky’äjtëm parë tmëdowëdë nu’kxtakën. Pes mä 1 Fwank 5:14 jyëna’any: “Kyaj ntsë’k njä’äm ko n’amdo’om ti ja Dios, mët ko nijä’äm ko ti n’amdo’om di’ibë ijtp ti’igyë di’ibë yë’ë tsyejpy, yë’ë xymyëdo’om”.
Käjx nandu’unë Salmo 65:2; Fwank 14:6, 14 etsë 1 Fwank 3:22.
¿TIKO DU’UN NAYAJTË’ËJËM? Yë’ko mayë jä’äy wyinmaytyë ko di’ib mbäät yajjotkujk’atëdë yë’ë ko tmëdattëdë meeny sentääbë o ko oypyënëty myëjkugäjxëdët o mët ko tmëdattëdë tsuj’äjtën. Päätyë net mayë jä’äy tpa’o’ktëwdë du’umbë juky’äjtën, per kyaj tpäättë jotkujk’äjtën.
BIIBLYË DU’UN TYUKNI’’IXË. Jesus ojts tnigajxy wi’ix nbatëmë jotkujk’äjtën ko jyënany: “Jotkujk pënaty nayjä’ädëp ko tsojkëp y’ittët oy mëdë Dios” (Mateo 5:3, NM). Net n’ijtëm jotkujk pën n’ixy’äjtëm ni’igyë Dios, nijä’äjëm ja tyëy’äjtën ets tijaty tyuknibëjtakëp parë ëtsäjtëm. Tyä’ädë tëy’äjtën yajpääty mä Biiblyë ets yë’ë xypyudëjkëm parë nijä’äjëm ti di’ib jëjp’am mbäät nbëjtakëm ets ti kyaj. Di’ib mbäät xymyo’oyëmë jotkujk’äjtën, yë’ë ko nas’ijxëm etsë Biiblyë xynyë’ëmo’oy xytyu’umo’oyëm ets xywyinmä’änymyo’oyëm (Lukʉs 11:28).
Käjx nandu’unë Proverbios 3:5, 6, 13-18 etsë 1 Timotee 6:9, 10.
Të wanaty xynyijawë wi’ixë Biiblyë t’atsoojëmbityë tadë tëdujkpë yajtë’ëwën. ¿M’aknijawëyaampy ni’igyë? Pën m’itäämp oy mëdë Dios, seguurë ko m’aknijawëyaampy. Wa’an mnayajtëyëty, ¿tiko Dios tnas’ixë axëk’äjtën etsë ayo’on pën naytyukjotmaytyuunëp mët ëtsäjtëm? O wa’an xynyijawëya’any wi’ix mbäät y’oyë mtsënä’äy mjuky’äjtën. Biiblyë mbäät mbudëkëty ets mbäät t’atsoojëmbity tukë’ëyë yajtë’ëwën.
Per mayë jä’äy kyaj nëgoo ttsojkënyë’attë tkäjxä’ändë Biiblyë mët ko mayë maytya’aky tmëminy ets tsip tjaygyukëdët. ¿Mtsojkënyë’ajtypy ets pën mbudëkëdët parë xynyijawët wi’ixë Biiblyë tyukni’’ixë? Jyobaa tyestiigëty mbäät mbudëkëdë.
Tuk peky di’ib yajtuundëp yë’ë tadë liibrë, ¿Ti tëy’äjtën jantsy tukni’ijxëbë Biiblyë? Tyä’ädë liibrë të kyojy etsë jä’äy pyudëkëdët di’ib kyaj nëgoo tiempë tmëdaty parë tnijawët wi’ixë Biiblyë t’atsoojëmbity tijaty nayajtëëjëp. Ja tuk peky wi’ixë jä’äy yajpudëkë, yë’ë ko yajtuk’ëxpëktë Biiblyë namay’äjtën. Mbäät mya’ëxpekyëty tu’ugë Jyobaa tyestiigë mä mdëjk o mä mijts xytsyeky mninëjxëdët, mbäät myajninejxy sëmään sëmään ets waanë xy’ëxpëkëdë Biiblyë. Miyonk’amë jä’äy pyudëkëdë ko du’un y’ëxpëktë, ets may di’ib y’axäjëdëbë ëxpëjkën jyënä’ändë: “Tëts nbäätyë tëy’äjtën”.
Nitii mëët kyaya’ijxkijxyë ko nbatëm ja tëy’äjtën di’ib yajpatp mä Biiblyë. Pes ko nijä’äjëm ja tëy’äjtën mbäät n’ijtëm agujk jotkujk, mbäät n’awijx njëjp’ijxëm ja oy’äjtën ets nan mbäät n’awä’ätspëtsë’ëmëm mä tijatyë jä’äy myëbëjktëp o yajkäjxtëp di’ib kyaj tyëy’äjtënëty. Jesus du’un jyënany: “Es m’ixy’attëp ja tëy’äjtën, es yë’ë tëy’äjtën yë’ë myajwë’ëmëdëp awä’ätstuuy” (Fwank 8:32).
Të kyojy 2008 |
 |