¿Pënën Dios?

1. Mayë jä’äy t’awdattë tijaty. Perë Biiblyë xy’anmä’äyëm ko je’eyë jya’aty tu’ugë Dios di’ib TËY’ÄJTËN. Yë’ë tëgekyë yajkoj di’ib ijtp yä Naxwiiny ets di’ib jam’äjtp tsäjpotm, ets kom yë’ë të xymyo’oyëmë juky’äjtën, yë’ën naytyu’uk di’ib patëp n’awdäjtëm (1 Korintʉ 8:5, 6; Di’ibʉ Jatanʉp 4:11).

2. Mä Biiblyë yajpatp kanäk nax wi’ixë Dios yajtijy, per je’eyë tmëdaty tu’ugë xyëë, txë’aty JYOBAA. Mä mayë Biiblyë të yajjo’otsyë Diosë xyëë ets je’eyë të yajpëta’aky Wintsën o Dios. Per ko yajjääyë Biiblyë, ja nety jap myiny kujayë tadë xëë Jyobaa naa 7,000 okën (Éxodo 3:15; Salmo 83:18, NM).

3. Jyobaa myëdäjtypyë nyini’x kyëbäjk, je’eyë ko kyaj dyë’ënëty extëmë nini’x’äjtëm. Biiblyë jyëna’any: «Dios yë’ë dë’ën espiritë. Kyaj mbäät n’ijxëm» (Fwank 4:24, OTJ). Tu’ugë espiritë yë’ë tu’ugë juky’äjtënë di’ib mas y’oyëty ets kyaj dyë’ënëtyë njuky’äjtënë’äjtëm. Ninä’änëm tu’ugë naxwinyëdë jä’äy tka’ixyë Dios. Ets oyë Jyobaa tsyëënë tsäjpotm y’ijxtaapy tëgekyë (Fwank 1:18; Ebreeʉsʉty 4:13). ¿Ets tidën y’andijpy espiritë santë? Yë’ë Diosë myëjää, kyaj yë’ëjëty tu’ugë jä’äy extëmë Dios (Salmo 104:30; 1 Tesalónikʉ 4:8).

4. Tadë Biiblyë xytyukmëmaytyakëmë Jyobaa jya’ay’äjtënë. Myaytyakypy ko di’ibë jya’ay’äjtënë wä’kpëtsëëmp yë’ë tsyojkënë, tëy’äjtënë, wijy’äjtënë etsë mëk’äjtënë (Romanʉs 11:33, 34; 1 Fwank 4:8; Di’ibʉ Jatanʉp 11:17; 16:5). Nandë’ën tmaytya’aky ko Dios pa’ayoop, mëk oyjya’ay, pokymya’xp, yäjkpëjä’äy ets ma’xtujkp. Pääty kom yë’ë xy’u’unk’äjtëm tsojkëp njä’äy’äjtëm dë’ën extëm yë’ë (Éfesʉ 5:1, 2).

Mbäät n’ixy’äjtëmë Dios ko n’ijxëmë kyojy pyëta’aky ets ko ngäjxëmë Biiblyë

5. ¿Mbäät niwindakëm ets nmënu’kxtakëmë awinax o kruus? Kyaj (Apostʉlʉty 17:24, 25, 29). Jyobaa jyëna’any ko yë’ëyë naytyu’uk mbäät n’awdäjtëm. Yë’ë nipën mëët tkayajwa’xyë myëj’äjtënë. Ets tadë awinax nan kyaj tmëdatyë mëjää parë xypyudëjkëm (Salmo 115:4-8; Isaías 42:8; 1 Korintʉ 8:4).

6. ¿Wi’ix mbäät mas oyë Dios n’ixy’äjtëm? Tuk nax yë’ko n’ijx ndu’unëm tëgekyë di’ib yë’ë të dyajkojtä’äy mbawinmä’äyëm këkpäät wi’ixë tyä’ädë kojy pëta’aky tnimaytya’agyë Dios. Kyojy pyëjta’agyë Dios yë’ë xytyuk’ijxëm ko myëdäjtypyë mëjää etsë wijy’äjtënë. Es mä tëgekyë di’ib të dyajkojy jam n’ijxëmë tsyojkën (Salmo 19:1-6; Romanʉs 1:20). Ja tuk nax wi’ix mbäät n’ixy’äjtëmë Dios net ko n’ëxpëjkëmë Biiblyë. Jap yajnimaytya’aky mas ni’igyë wi’ixë tyä’ädë Dios jya’ay’aty. Nandë’ën xytyukmëmaytyakëm ti Dios tyuknibëjtakëp ets ti tsyojkypy ndu’unëm (Amós 3:7; 2 Timotee 3:16, 17).

Copyright © 2010 Watch Tower Bible and Tract Society of Pennsylvania. All rights reserved.