¿Pënën Jesukristʉ?

1. Jesús jamë nety tsyëënë tsäjpotm extëm tu’ugë anklës mä kyakëda’akynyëm yä Naxwiiny. Yë’ë tim jawyiinë Dios ojts yajkojyëty; pääty yajtijy Diosë kya’axkopk U’unk (Kolosʉ 1:15; Di’ibʉ Jatanʉp 3:14). Jyobaa naytyu’ugë Jesús ojts dyajkojy kyaj pën pyudëjkë. Per ko net ojts dyajkojtä’äy tëgekyë di’ib ja’äjtp yä Naxwiiny ets jam tsäjpotm, yë’ë pudëjkë Jesús, päätyë Jesús yajtijy oybyutu’unëbë (Proverbios 8:22-31; Kolosʉ 1:16, 17). Jesús yajtuunë nandë’ënë Dios extëmë yajkajxynyäjxpë. Päätyë Jesús yajtijy «ja Ayuk» (Fwank 1:1-3; Di’ibʉ Jatanʉp 19:13).

2. Dios yajtëgäjts ja Jesusë jyuky’äjtënë ta tpëjtaky mä Mariiʉ y’u’unk tëjk. Päätyë Jesús kyaj tteety’ajtyë naxwinyëdë jä’äy ets kyaj tmëdäjty ja poky etsë tëgo’oyën. Tëgëk peky jya’aty tidën ko Dios tkejxyë Jesús yä Naxwiiny: 1) yë’ë parë tnimaytyakyë Dios tëy’äjtën mëët (Fwank 18:37), 2) yë’ë parë tpëtaky tu’ugë ijxpajtën di’ib mbäät mbanëjxëm ko tmëmadaktääjy tëgekyë amay jotmay ets kyaj tyëgoojy (1 Peedrʉ 2:21) ets 3) yë’ë parë dyojxyë jyuky’äjtënë ets n’awä’ätspëtsë’ëmëm mä poky ets mä o’kën. ¿Tiko nety jyëjp’amëty ets dyoxëdë jyuky’äjtënë? (Matewʉ 20:28.)

3. Adán ja tim jawyiimbë yetyëjk, kyaj tmëmëdooyë Diosë y’ana’amën, ta ttuuny di’ibë Biiblyë tyijpy poky. Päätyë Dios tyuknikäjxpajtë o’kënë (Génesis 3:17-19). Kyaj tneky myëmadaky tkuytyunëdë Diosë y’ana’amën yë’ko të nety pyokytyuunë. Wanaty wanaty ojts myëjä’äyënë, axtë ko ojts y’o’knë. Ni’amukë ja y’u’unk y’ënä’k ttukninäjxy ja poky. Pääty ëtsäjtëm nandë’ën nbä’ämbajtëm, nmëjjä’äyëm ets n’o’këm. ¿Wi’ixë net y’awä’ätspëtsëmët ja naxwinyëdë jä’äy? (Romanʉs 3:23; 5:12.)

4. Jesús wä’äts jä’äy y’ijty dë’ën extëmë Adán. Per mä kyaj ojts kyijxyë mëdë Adán, ja mä Jesús tmëmëdoojy yajxonë Dios, myëmëdoo axtë mä twinguwä’kë o’kën. Ets pääty yë’ë mbäädë nety dyaky ja jyuky’äjtënë wä’ätspë, ets xyju’uybyëtsë’ëmëm mä ja Adangë pyoky. Biiblyë jyëna’any ko «tkëbejty tkumëdoojy ja nyitsokënë nidëgekyë naxwinyëdë jä’äyëty». Dë’ëntsoo ja Adangë y’u’unk y’ënä’k mbäädë nety y’awä’ätspëtsemy mä të yajtuknikäjpxpattë o’kën. Ni’amukë pënaty pyëjtaktëbë mëbëjkënë mä Jesús mbäät yajpokymya’xtë ets tpäättët ja juky’äjtënë winë xëë winë tiempë (1 Timotee 2: 5, 6; Fwank 3:16; Romanʉs 5:18,19).

Ko Jesús y’ijty yä Naxwiiny ojts ya’ëxpeky, tyuunë mëj’äjtënë ets axtë kyëyäjkë jyuky’äjtënë mët ëtsäjtëmgyëjxm

5. Ko Jesús y’ijty yä Naxwiiny, ojts dya’agëda’agyë pä’äm jä’äy, ojts tmo’oyë kya’ay y’ukën di’ib yu’o’këdëp ets ojts dë’ënyë dyajwë’ëmë mëk poj. Axtë ojtsë o’kpë dyajpëde’eky. ¿Tiko ttuunyë mëj’äjtënë? 1) Yë’ko pya’ayoo ja jä’äyëty di’ib ayoodëp ets pyudëkëyan. 2) Ja mëj’äjtënë di’ib tyuun yë’ë ya’ijxë ko yë’ë Dios y’U’unk’atyëty. Ets 3) ja mëj’äjtënë di’ib nandë’ën tyuun yë’ë ya’ijxë ti tyukmëdunaambyë naxwinyëdë jä’äy di’ib mëdoop ko tyëkët ana’ambë extëmë Rey (Matewʉ 14:14; Markʉs 2:10-12; Fwank 5:28, 29).

6. Jesús o’k, per ta Dios yajpëdë’kë extëmë jä’äy di’ib kyaj ya’ixy ets ta jyëmbijty tsäjpotm (1 Peedrʉ 3:18). Ok, ta Dios pyëjtakë ets tyunët Rey. Tim tsojkë Jesús dyajjëjptëgoya’anyë ayo’on etsë axëk’äjtënë di’ib ja’äjtp yä Naxwiiny (Salmo 37:9-11; Proverbios 2:21, 22; 2 Peedrʉ 2:9).

Copyright © 2010 Watch Tower Bible and Tract Society of Pennsylvania. All rights reserved.