¿Pënën Mʉjku’ugópk?

1. Pën mas ni’igyë myëtsip’äjtypyë Dios, yë’ë Mʉjku’ugópk, di’ib mëk ku’anëë ets niwäämbajtp. Tyä’ädë Mʉjku’ugópk nandë’ën yajxëëmo’oy «Satanás» di’ib y’andijpy mëtsip. Wä’ätsë Dios ojts yajkojyëty ets jamë nety mëët tsyëënë tsäjpotm, per ok ta tyuktëjkë mëj’at këjxm’at ets ttsojky ja awdäjtënë di’ibë Dios patëp (Matewʉ 4:8-10).

2. Tyä’ädë Satanás, dyajtuuny tu’ugë tsä’äny parë myaytyaky mëdë Eevʉ, ets mët ko twin’ë’ëny ta ttukmëduundëgooyë Dios. Dë’ëntsoojë Satanás tnibëde’ky ja madakënë di’ibë Dios myëdäjtypy parë y’ana’amët, ets dë’ën dyajjaygyukëyanë ko Dios kyaj mbäät oy y’ane’emy. Ets ko nan ni tu’ugë jä’äy tkamëdunëdë Dios xëmë. Ko dë’ën y’adëtsy ta jyëmbijty Diosë myëtsip. Pääty yajxëëmoojy Mʉjku’ugópk ets Satanás (Génesis 3:1-5; Job 1:8-11; Di’ibʉ Jatanʉp 12:9).

3. Satanás y’ëxtaabyë winmä’äny wi’ix twin’ëënëdë naxwinyëdë jä’äy ets y’awdatëdët (2 Korintʉ 11:3, 14). Tuk nax wi’ix wyin’ëëny, ja mä dyajtunyë relijyonk di’ib kyaj tyëy’äjtënëty. Pën tu’ugë relijyonk kyaj tnimaytya’aky tëy’äjtënë Dios, yë’ë nety tyuunëbë Satanasë tsyojkënë (Fwank 8:44). Tadë jä’äyëty di’ib tyuk’ijtëbë relijyonk di’ib kyaj tyëy’äjtënëty mbäät amumdu’ukjot tmëbëktë ko yë’ë y’awdäjttëp Diosë tëy’äjtënbë, per yë’ë dë’ën myëduundëbë Satanás, pes yë’ë di’ib ana’amp yä Naxwiiny (2 Korintʉ 4:4).

Satanás wyin’i’imbyë jä’äy mët yë’ëgyëjxmë relijyonk di’ib kyaj tyëy’äjtënëty, brujë’äjtk ets ko nax käjpn dyajnay’axëk’ixëdë

4. Satanás nan wyin’i’imbyë jä’äy ko ttuktunyë brujë’äjtk. Näägë jä’äy tmëgäjxtë tsuu poj ets kyuwä’änëdët o t’axëktunëdë wiink jä’äy, yajxëwëj yajxëmayëdët o parë ya’aybyat yajtsoybyatët. Per pën mooyëbë mëjää ets dë’ën ttundët yë’ë Satanás. Pääty pën nyajjotkujk’atä’änëmë Dios, tsojkëp njëjpkudijëtya’ayëm tëgekyë brujë winmä’äny. (Deuteronomio 18:10-12; Apostʉlʉty 19:18, 19).

5. Satanás myëmadakypy nandë’ënë naxwinyëdë jä’äy ko dyajmëj dyajkëjxmëdë mët ko wiink käjpn tsyoony o wiink koloor y’ix’attë, ets ko nandë’ën dyajmëjpëtsëmdë gobiernë. Näägë jä’äy wyinmaytyë ko kyäjpn o kyoloor wi’ix y’ix’attë yë’ë dë’ën waanë oy ets kyaj dyë’ënëtyë wiink nax wiink käjpn. Per kyaj dyë’ënëty extëm wyinmaytyë (Apostʉlʉty 10:34, 35). Wiinkpë net t’awixtë etsë gobiernë dya’oyëdë amay jotmay di’ib ja’äjtp. Dë’ëntsoo tjëjpkudijëdë Diosë y’Ana’amënë di’ib je’eyë mbäät dya’oyë amay jotmay (Di’ibʉ Jatanʉp 11:15).

Ëxpëk ni’igyë Jyobaa y’ää y’ayuk ets dë’ën kyaj xytyunët di’ibë Mʉjku’ugópk tsyojkypy

6. Satanás nan myëmadakypyë jä’äy ko ttuk’atsokyë axëk’äjtënë. Jyobaa xy’anmä’äyëm ets kyaj ndu’unëmë axëk’äjtënë yë’ko nyijä’äp ko mbäät xy’axëktu’unëm (Galasyʉ 6:7, 8). Mbäät näägë jä’äy m’anë’ëmxëty ets xytyunët ti yë’ë tyuundëp. Per jamyats ko pën tsyojkypy ets xytyunëdë axëk’äjtënë yë’ë Satanás (1 Korintʉ 6:9, 10; 15:33).

7. Satanás mbäät nandë’ën dyajtunyë jä’äy ets mnibëdë’ëgëdët o mëtsiptsoonëdët ets mijts xymyastu’udëdë Jyobaa. Mbäät näägë mjiiky mëgu’uk mdukjot’ambekyëty ko xy’ëxpekyë Biiblyë. O mbäädë net nääk je’eyë mnixi’iky mdukxi’igyëty. Per, ¿pën myajjuky’äjtëp? Satanás je’eyë m’atsë’ëgëya’anyëty parë kyaj xy’ëxpëkëdë Jyobaa y’ää y’ayuk. Per katë xyajmada’aky (Matewʉ 10:34-39; 1 Peedrʉ 5:8, 9). Ko xykyatunët di’ibë Mʉjku’ugópk tsyojkypy, mbäät xyajxonda’agyë Jyobaa ets mbäät xya’ixyëty ko mbuwä’këbë y’Ana’amënë (Proverbios 27:11).

Copyright © 2010 Watch Tower Bible and Tract Society of Pennsylvania. All rights reserved.