¿Tidën y’andijpy Diosë y’Ana’amënë?

1. Ko Jesús y’ijty yä Naxwiiny, ojts t’anëëmë ja y’ëxpëjkpëty, ets t’amdowdëdë Dios parë dyajminëdë y’Ana’amënë. Tadë ayuk ana’amënë yë’ë y’andijpy tu’ugë gobiernë, mä y’ane’emy tu’ugë rey. Tadë Diosë y’Ana’amënë yë’ë tu’ugë gobiernë di’ib tim tëgatsy. Yajpääty tsäjpotm ets t’ana’amä’änyë Naxwinyëdë. Nandë’ën dyajwä’ätsä’änyë Diosë xyëë ets dyajmëjpëtsëmä’äny. Tyunanëbë Diosë tsyojkënë yä Naxwiiny dë’ën extëm jam tsäjpotm (Matewʉ 6:9, 10).

2. Dios twandaky ko mä y’Ana’amënë yë’ë yajRey’ataambyë Jesús (Lukʉs 1:30-33). Ko Jesús y’ijty yä Naxwiiny, ya’ijxë ko yë’ë y’itä’äny tu’ugë Ana’ambë di’ib oyjya’ay, wä’ätsjä’äy ets di’ib tyuumbyë tëy’äjtën. Ko jyëmbijty tsäjpotm, kyaj netyë yajmooyë kutujkënë ets tyunët Rey mä ja Diosë y’Ana’amën (Ebreeʉsʉty 10:12, 13). Mä jëmëjt 1914, ja mä Jyobaa tmoojy ja kutujkënë Jesús di’ibë nety të t’awanë. Ets mä tadë tiempë, Jesús tyëjkë ana’ambë jam tsäjpotm extëmë Rey di’ib të yajnikäjxpety. (Filipʉs 2:9).

3. Jyobaa të twin’ixyë yetyëjk etsë toxytyëjkëty di’ib xëmë mëmëdoojëp ets nyëjxtët tsäjpotm. Tyä’ädë jä’äyëty t’ana’amä’ändë naxwinyëdë jä’äy mëdë Jesús ets tyunä’ändë extëmë rey ets nandë’ën jyustisë tunä’ändë (Lukʉs 22:28-30; Di’ibʉ Jatanʉp 5:9, 10). Jesús ojts ttijy tuk «mutsk kajpë’ëgë borreegë» pënaty mëët y’ana’amä’ändë. Ja wyinëty 144,000 (Lucas 12:32, NM; Di’ibʉ Jatanʉp 14:1-3).

4. Ko Jesús tyim naa tëjkë Rey jam tsäjpotm, ta tkujëbijpnäjxyë Satanás mët ni’amukë y’axëk anklësëty yä Naxwiiny. Pääty mä tsyondakyë jëmëjt 1914 waanë ni’igyë myä’t’adëtsnë tiempë (Di’ibʉ Jatanʉp 12:9, 12). Myëjwindëkë axëk’äjtënë, tsip, yuu, pä’äm..., tëgekyë tyä’ädë yë’ë yajkypyë ijxwë’ëmën di’ib xytyuknijä’äm ko Jesús tamën y’ane’emy ets ko tyä’ädë ndiempë’äjtëm tëdën kugëxëyanëp (Matewʉ 24:3, 7, 8, 12; Lukʉs 21:10, 11; 2 Timotee 3:1-5).

5. Tim tsojkë Jesús ttunä’änyë tëy’äjtënë ets dyajnaywyä’xä’änyëtyë jä’äy, dë’ën extëm tu’ugë tsyiip kuent’äjtpë dyajnaywya’xyëtyë tsyiip mëdë borreegë. Dyajnaxä’äny extëmë «borreegë» pënatyë nety të tmëmëdoyë Diosë y’Ana’amënë, ets tmo’oya’anyë juky’äjtënë winë xëë winë tiempë yä Naxwiiny. Ets dyajnaxä’äny extëmë «tsyiip» pënatyë nety të tjëjpkudijë Diosë y’Ana’amënë (Matewʉ 25:31-34, 46). Mä tiempë myiny kyëda’aky Jesús yajkutëgoyaampy ni’amukë jä’äy di’ib dë’ën extëmë «tsyiip» (2 Tesalónikʉ 1:6-9). Pën mijts mtsojkënyë’ajtypy etsë Jesús myajnaxëdët extëm tu’ugë «borreegë», tsojkëp xy’ëxpëkëdë Biiblyë etsë net xyajtunët di’ib m’ëxpejkypy (Matewʉ 24:14).

Mä y’ana’amä’änyë Jesús, kyaj pën nyay’axëk’ixä’änyëty ni’amukë jä’äy nyaytsyokä’änëdë

6. Tu’uk tu’ugë pa’is di’ib ja’äjtp yä Naxwiiny y’akmëdäjttëbë gyobiernë. Ets nä’äty tsyiptundë ak yë’ëjëty. Perë tadë Diosë y’Ana’amënë yë’ë wyingudëgats’ataampy tëgekyë gobiernë. Yë’ë naytyu’uk di’ib ana’amäämp abëtsemy Nyaxwinyëdë (Daniel 2:44). Kyaj nyeky jam’atä’änyë tsip, naya’oogë etsë naytsyiik naygyoxë. Ni’amukë jä’äyëty jyuky’atä’ändë yujy tuda’aky ets tmëdatä’ändë tu’ugyë’äjtën (Miqueas 4:3, 4).

7. Ko ja Jesús y’ana’amä’äny 1,000 jëmëjt, ja jä’äyëty di’ib xëmë të tmëdundë Dios jyëmbitanëdë wä’ätsjä’äy ets tëgekyë ja Naxwinyëdë jyëmbitä’äny extëm tu’ugë it lugäärë tsujpë. Ko y’abatët 1,000 jëmëjt, të netyë Jesús ttuundä’äy tëgekyë di’ibë Dios tsyojkypy ets ttunët. Ta net tmo’oyanë Tyeety ja Ana’amënë (1 Korintʉ 15:24). ¿Tiko xykyatukmëtmaytya’agyë mjiiky mëgu’uk etsë mëtnaymyaayëbëty tëgekyë di’ib tyunaambyë tyä’ädë Diosë y’Ana’amënë?

Copyright © 2010 Watch Tower Bible and Tract Society of Pennsylvania. All rights reserved.