Wi’ix nmëwingo’onëmë Dios ko nmënu’kxtakëm

1. Nu’kxtakën yë’ë y’andijpy ko nmëtmaytyakëmë Dios yujy tuda’aky. Tsojkëp nmënu’kxtakëmë Dios xëmë. Pën nu’kxtakëm, nëjxëp njä’äjëm wingon extëm tu’ugë mëtnaymyaayëbë di’ib mëk ntsojkëm. Oyë Jyobaa jyantsy myëjëty ets kyumëjääjëty, myëdoogujkëp ko nmënu’kxtakëm. ¿Mënu’kxtakypyë Dios xëmë? (Salmo 65:2; 1 Tesalónikʉ 5:17.)

2. Tuk peky wi’ix mbäät nya’ijxëm ko nmëjjä’äjëmë Dios ja ko nmënu’kxtakëm. Pääty yë’ëyë naytyu’ugë Jyobaa Dios di’ib mbäät nmënu’kxtakëm. Ko Jesús y’ijty yä Naxwiiny, yë’ë xëmë myënu’kxtakë tyeety, kyaj pënë wiinkpë tmënu’kxtaky. Ëtsäjtëm nandë’ën mbäät ndu’unëm (Matewʉ 4:10; 6:9). Per tsojkëp nu’kxtakëm xëmë xyëëgëjxmë Jesús. Dë’ëntsoo nety nya’ijxëm ko nwintsë’këm ja kutujkënë di’ib yë’ë myëdäjtypy, ets ko nmëdäjtëmë mëbëjkën ko yë’ë të xykyu’o’këm ets të xyju’uybyëtsë’ëmëm (Fwank 14:6; 1 Fwank 2:1, 2).

3. Ko nmënu’kxtakëmë Dios jap tsyoonëdë tadë ää ayuk mä jot korasoon. Kyaj y’oyëty agëbajky njäjtëm wi’ix nu’kxtakëm ets nan kyaj y’oyëty nba’ijxëm mä tsäjkajxy nyoky (Matewʉ 6:7, 8). Mbäät nu’kxtakëm oytyim määty, wa’an tim nä’äty ets oytyim wi’ixëty je’eyë ko ndu’unëm mëdë wintsë’kën. Dios myëdoobyë nu’kxtakën axtë di’ib ndu’unëm jodoty winmä’änyoty (1 Samuel 1:12, 13). Ko kë’ëm naynyinu’kxtakëm oy ko ndu’unëm mä tu’ugë lugäärë adëkëtuuybyë mä kyaj pën xy’ijxëm (Markʉs 1:35).

4. ¿Tijaty mbäät xynyinu’kxtäägë? Tëgekyë di’ib mbäät m’oytyunyëty parë mëdë Dios mnaymyayëdët (Filipʉs 4:6, 7). Tadë nu’kxtakën di’ib mä padrenuestro tnigajxy ko tsojkëp ninu’kxtakëmë Jyobaa xyëë ets di’ib yë’ë tyuknibëjtakëp ttunä’äny. Nandë’ën mbäät n’ando’ojëm ets xymyo’oyëm tijaty xytyëgoy’äjtxëm, tma’xëdë nboky’äjt ngaytyey’äjtëm ets xypyudëjkëm parë njëjpkudijëmë axëk’äjtën (Matewʉ 6:9-13). Ko nu’kxtakëm yë’ë mbäät n’ando’ojëmë Dios di’ib yë’ë tyukjotkëdakypy ets kyaj yë’ëjëty je’eyë di’ib ëtsäjtëm ntsojkëm (1 Fwank 5:14).

5. Mbäät mnu’kxta’aky nä’ä tyim jënä’änyë mjot mgorasoon tmo’oya’anyë dioskujuyëmë Dios o tmëjkumaya’any (1 Crónicas 29:10-13). Nu’kxtä’äk xëmë ko xymyëdatëdë amay jotmay ets ko xyjawëdë mëbëjkënë tyëgoya’any (Salmo 120:1; 1 Peedrʉ 5:7). Ko mgayä’änët nan oy ko mnu’kxtä’ägët (Matewʉ 14:19). Jyobaa xy’anmä’äyëm ets nu’kxtakëm «oy tyim nä’äty» (Kolosʉ 4:2, OTJ).

6. Pën pokytyu’unëm mëjwiin kajaa, tsojkëp nmënu’kxtakëmë Jyobaa wa’an xynyas’ayo’ojëm ets xypyokymya’kxëm. Dios ijtpë «listë ets xypyokymya’kxä’änëm» per net ko nmayäjtsëmë nboky’äjtëm ets ndu’unëmë mëjää ets kyaj neky tyu’unëmbijtëm (Salmo 86:5, NM; Proverbios 28:13).

7. Jyobaa yë’ëyë myëdoo’ijtypyë oyjya’ayë nyu’kxtakën. Parë Jyobaa tmëdo’itëdë mnu’kxtakën, tsojkëbë dë’ën xytyunëdë mëjää ets mjuky’atët dë’ën extëmë Diosë y’ana’amënë jyëna’any (Proverbios 15:29; 28:9). Ko mnu’kxtä’ägët tsojkëp xytyunët mëdë yujy’at tuda’aky’at (Lukʉs 18:9-14). Ets ta net xykuytyunët di’ibë Dios të xy’andoy. Dë’ëntsoo xya’ixëdët ko mëdäjtypyë mëbëjkënë ets ko mnu’kxtakp amumdu’ukjot. Netë Jyobaa t’atsojëmbitëdë mnu’kxtakën (Ebreeʉsʉty 11:6).

Copyright © 2010 Watch Tower Bible and Tract Society of Pennsylvania. All rights reserved.