Wi’ixë Dios ttsoky ets jyuky’attëdë familyë

1. Mä Biiblyë jyëna’any ko yetyëjk di’ib të pyëjknë yë’ë ijtp këbäjk mä fyamilyë (1 Korintʉ 11:3). Tu’uk je’eyë nyëdo’oxy tmëdatët ets tsojkëp syëbilpëktët (1 Timotee 3:2; Titʉ 3:1).

2. Yë’ë yetyëjk di’ib të pyëjknë tsojkëp ttsokëdë y’u’unk nyëdo’oxy dë’ën extëm yë’ë kë’ëm nyaytsyokyëty. Dë’ën extëmë Jesús ttsoky ja jä’äyëty di’ib panëjxëdëp (Éfesʉ 5:25, 28, 29). Ninä’ä tkawop tkatsiigët ets ni tka’axëktunët. Ni’igyë tmëjkumayët ets twintsë’ëgët (Kolosʉ 3:19; 1 Peedrʉ 3:7).

U’unkteetyë oyjya’aybyë myoobyë fyamilyë ti tëgoy’äjtxëp ets tyuk’ëxpejkypy nandë’ënë Diosë y’ää y’ayuk

3. Yë’ë u’unkteety tsojkëp tyunët mëk ets t’ijx’it tkuent’atëdë fyamilyë. Tsojkëp tmo’oyëdë nyëdo’oxy etsë y’u’unk y’ënä’kë kya’ay y’ukën, wyit nyijam, etsë jyëën tyëjk. Nan tsojkëbë fyamilyë ttuk’ëxpëkëdë Diosë y’ää y’ayuk (1 Timotee 5:8). Yë’ë patëp tpudëkëdë fyamilyë ets ttuknijawët tijatyë Dios tyuknibëjtakëp (Deuteronomio 6:4-9; Éfesʉ 6:4).

4. Toxytyëjk di’ib të pyëjknë tsojkëp nandë’ën tpudëkëdë y’u’unk nya’ay (Génesis 2:18). Tsojkëp tpudëkët mä t’ëwijy tkäjxwij’yë y’u’unk y’ënä’k (Proverbios 1:8). Jyobaa tsyojkypy etsë toxytyëjk di’ib të pyëjknë tkuent’atëdë fyamilyë xonda’aky’ää xonda’akyjyot (Proverbios 31:10, 15, 26, 27; Titʉ 2:4, 5). Tsojkëp nandë’ën twintsë’ëgëdë y’u’unk nya’ay mëjwiin kajaa (Éfesʉ 5:22, 23, 33).

5. Dios tsyojkypy etsë u’unk ënä’k tmëmëdowdëdë tyääk tyeety (Éfesʉ 6:1-3). Etsë u’unktääk u’unkteety t’ëwij tkäjxwijtëdë y’u’unk y’ënä’k ets tnë’ëmo’oy ttu’umo’oyët. Nandë’ën tjuuttëdë tiempë ets t’ëxpëktëdë Biiblyë mëdë y’u’unk y’ënä’k, tpudëkëdët ets tmëwingondët ni’igyë Dios ets t’ix ttundët wi’ixë y’u’unk y’ënä’k oy nyayjawëdët (Deuteronomio 11:18, 19; Proverbios 22:6, 15). Ninä’ä mbäät tkatëytyundë y’u’unk y’ënä’k ko tjëjwijtsëmbittët (Kolosʉ 3:21).

Dios y’awijxypy etsë u’unktääk u’unkteety t’ëwij tkäjxwijëdë y’u’unk y’ënä’k ets tjëjwijtsëmbittët

6. Ko jä’äy di’ib të pyëktë kyanaymyënëjxëdë oy mä tsyënä’äy jyuky’äjtënë, tsojkëp tkuytyunëdë Biiblyë kyäjxwijënë, pes yë’ë xy’anmä’äyëm ets n’ijtëm tsojkpë jä’äy ets pojpëma’xpë jä’äy (Kolosʉ 3:12-14). Biiblyë kyaj dyajnigutukë etsë jä’äy nyaymyastu’udëdët mët ko tmëdattë yinaty wanatyë amay jotmay. Perë tadë toxytyëjk mbäät kë’ëm dyaj’yo’oyë jyot wyinmä’äny pën myastu’udaambyë nya’ay, per net pënë 1) tyä’ädë yetyëjk kyaj t’ixä’änyë fyamilyë o kyaj dyakä’äny tijaty tëgoy’äjtp 2) pën tim mëk awä’än ets axtë mbäädë nyëdo’oxy dyajpä’ämdëkë o axtë jyuky’äjtënë tpëtakë jotmayjëjp’am 3) pën tim mëk tyukmëtsip’atyëtyë ëxpëjkënë ets pën kyaj nya’ay nya’ixyëty tmëdunëdë Jyobaa (1 Korintʉ 7:12, 13).

7. Yë’ë jä’äy di’ib të pyëktë tsojkëp nyaywyintsë’ëgëdët nixim niyam. Ko jä’äy y’ity tsyëënë mëdë wiink yetyëjk o mëdë wiink toxytyëjk dë’ën tmëbokytyunyë Dios ets nandë’ën di’ib mëët të pyeky (Ebreeʉsʉty 13:4). Biiblyë yajnigutujkëp etsë jä’äy ya’ajääywyä’xtët, per net pënë tadë toxytyëjk o yetyëjk ijt tsënaapy mëdë wiinkpë, netën mbäät ya’ajääywyä’xtët ets wyë’ëmët awä’ätstum oy jatëgok pyëjktëgatsët (Matewʉ 19:6-9; Romanʉs 7:2, 3). Jyobaa mëk t’axëk’ixy ko pën ya’ajääywya’xy mët waanë ti ets pyëjktëgatsy jatëgok (Malaquías 2:14-16; 1 Korintʉ 7:10).

Copyright © 2010 Watch Tower Bible and Tract Society of Pennsylvania. All rights reserved.