Yë’ë Dios mëduumbëty tsojkëp nyaymyëdatëdët wä’äts

1. Jyobaa Dios mëk wä’ätsë’ë. Pääty ttsoky ets ninë’ënë jä’äy myëdunëdë nyaymyëdatëdët wä’äts, tmënëjxëdë jyuky’äjtënë wä’äts tmëdatëdë jyot wyinmä’äny wä’äts, nyini’x kyëbäjk etsë jyënot tyëgot (1 Peedrʉ 1:16). Mëjää mëk yajtunääm ets naymyëdäjtëm wä’äts Dios windum. Njuky’äjtëm tyam mä jya’atyë axëk’äjtën. Nandë’ën ko nbokyjya’ay’äjtëm xymyëmadä’ägä’änëmë axëk’äjtën. Per kyaj mbäät naygyëyäjkëm.

2. Wä’äts’äjtën mä nDiosmëdu’unëm: Pën ntsojkënyë’äjtëm nmëdunä’änëmë Jyobaa, kyaj mbäät nmëbëjk’adëtsëmë tyukni’ijxënë tadë relijyonk di’ib kyaj tyëy’äjtënëty ni ngatu’un’adëtsëmë kyostumbrë. Tsojkëp ndukpëtsë’ëmdutëmë tadë relijyonk di’ib kyaj tyëy’äjtënëty ets ni ti naybyudëkë ngamo’oyëm (2 Korintʉ 6:14-18; Di’ibʉ Jatanʉp 18:4). Tyam ko të nijä’äjëmë Diosë tyëy’äjtën, tsojkëbë net naygyuent’äjtëm ets këdiibë jä’äy xywyin’ë’ënëm di’ib kyaj tyukni’ixëdë tëy’äjtën (2 Fwank 10, 11).

3. Wä’ätspë juky’äjtën: Jyobaa tsyojkypy ets pënaty mëduunëdëp jya’ay’attë oy, wa’an tim nä’äty (1 Peedrʉ 2:12). Yë’ë y’ijxy tyuumpy tëgekyë di’ib ëtsäjtëm ndu’unëm, axtë di’ib ayu’utsyë ndu’unëm (Ebreeʉsʉty 4:13). Kyaj y’oyëty ko jä’äy y’ity tsyëënë oy tyim pënëty mëët ets nan kyaj y’oyëty ndu’unëmë wiingatypy axëk’äjtën di’ib ja’äjtp yä Naxwiiny, tsojkëp njëjpkudijëtya’ayëm (1 Korintʉ 6:9-11).

4. Wä’äts’äjtën mä jot winmä’äny: Pën nmëdäjtëmë jot winmä’äny wä’äts ta nëjx ndu’unëm di’ib ti oy (Filipʉs 4:8). Per pën yë’ë xëmë nwinmä’äyëm di’ib axëëk, ta nëjx ndu’unëmë axëk’äjtën (Matewʉ 15:18-20). Tsojkëp njëjpkudijëmë ixy jawë o noky di’ib ngäjxëm di’ib mbäädë jot winmä’äny dya’axëëgë. Pën n’ëxpëjkëmë Diosë y’ää y’Ayuk, ta nyajtuktujkëmë jot winmä’äny mëdë wä’äts’äjtën.

5. Wä’äts’äjtënë nikëjxy këbajky ets jënoty tëgoty: Kom ëtsäjtëm yë’ë Dios nmëdu’unëm tsojkëp naymyëdäjtëm wä’äts, nmëdäjtëm wä’ätsë nini’x këbäjk etsë wit nijam. Nan tsojkëp ngëbujëm ko nyo’oytya’ay njëdijtä’äyëm, ko ngayä’änëm o ko nixäjëyä’änëmë je’xy peky. Pën mä ntsënä’äyëm kyaj ti jëdijtakn o pëtsëëmdakn, tsojkëp nitäjëmë tadë axëk’äjtën (Deuteronomio 23:12, 13). Pes ko wä’äts ntsënä’äyëm yë’ë dë’ën ya’oy’äjt yajmëk’äjtp. Pënatyë Dios myëduundëp tsojkëp tmëdattëdë jyëën tyëjk wä’äts, tpiw tmä’kxtët tijaty myëdäjttëp, dë’ën jyënoty tyëgoty ets jyënwiiny tyëjkwiiny. Tsojkëp nyigëxë’ëgët mä nax käjpn ko wä’äts tsyëënëdë.

6. Kajxy maytya’agyë wä’ätspë: Yë’ë Dios mëduumbëty tsojkëp xëmë kyäjx myaytyä’äktët tëy’äjtën. Di’ibë jä’äy andakp kyaj tyëkëya’any mä Diosë y’Ana’amënë (Éfesʉ 4:25; Di’ibʉ Jatanʉp 21:8). Pënaty Dios mëduundëp kyaj kyo’oy’ëw kyo’oygyäjxtë. Kyaj tmëdo’ittë anëmaytya’aky di’ib mëdë ko’oygyajxy ets ni kyakuyxyi’iktë, nigëxë’ktëp ko tmëdundë Dios mëdë kyäjx myaytyakënë wä’ätspë dë’ën mä tyundë, mä y’eskuelë’attë ets mä myëjëmbä’ä myëdëjkpä’ä (Éfesʉ 4:29, 31; 5:3).

Yë’ë Dios mëduumbëty tsojkëp nyaymyëdatëdët wä’äts mët oy tyim tiijëty

Copyright © 2010 Watch Tower Bible and Tract Society of Pennsylvania. All rights reserved.