Tu’unënë di’ibatyë Dios y’axëk’ijxypy

1. Yë’ë Dios mëduumbëty tsyojktëbë oy’äjtënë, per tsojkëp nandë’ën t’axëk’ixtëdë axëk’äjtënë (Salmo 97:10; 1 Peedrʉ 3:11). Tyä’ädë yë’ë y’andijpy njëjpkudijëmë tu’unënë di’ibë Dios y’axëk’ijxypy. ¿Extëm tijatyëty?

2. Poky mä ijt tsënaaky: Ko jä’äy y’ity tsyëënë mä kyajnëm syëbilpeky, o ko tsyëënë mëdë jëyujk animal, o mëdë wyingon mëgu’uk ets ko tsyëënëdë yetyëjk ak yetyëjk o ko tu’ugë kasäädë jä’äy tsyëënë mëdë wiinkpë, tëgekyë tyä’ädë mëj poky parë Dios (Levítico 18:6; Romanʉs 1:26, 27; 1 Korintʉ 6:9, 10). Pën tu’ugë yetyëjk mët tu’ugë toxytyëjk tsënääy juky’äjttëp ets kyaj të syëbilpëktë, wa’an sëbilpëktë, ets pën kyaj, wa’an tnaymyastu’udëdë (Ebreeʉsʉty 13:4).

Dios y’axëk’ijxpyë më’uk, ma’tsk, kuyaty o ëyë’k di’ib meeny myëët etsë mëk awä’än’at di’ib yajtuundëgoopy

3. Anëë, kuyaty o ëyë’k di’ib meeny myëët, ma’tsk: Jyobaa Dios kyaj mbäät y’anda’aky (Titʉ 1:2). Pääty pënaty tsyojktëp etsë Dios kyupëkëdët kyaj mbäät y’andä’äktë (Proverbios 6:16-19; Kolosʉ 3:9, 10). Tëgekyë kuyaty di’ib meeny myëët yajjëmbijtypyë jä’äy atsojkpë. Pääty pënaty Dios myëduundëp kyaj tniguyattë meeny (Éfesʉ 5:3-5). Nan kyaj myaatstë ets kyaj ti tjuytyë pën nyijä’ädëp ko meetsy ets nan kyaj ti dë’ënyë tmënëjxtë pën kyaj t’amdowdë (Éxodo 20:15; Éfesʉ 4:28).

4. Mëk awä’än’at di’ib yajtuundëgoopy: Tadë mëk awä’än’at di’ib kyaabë jyëjpkuwijtsënë mbäät yajtuundëgoy (Génesis 4:5-8; Santya̱’a̱gʉ 1:19, 20). Pënaty dë’ën jä’äy’äjttëp kyaj mbäät mëdë Dios nyaymyayëty (Salmo 11:5; Proverbios 22:24, 25). Kyaj y’oyëty nyajjëmbijtëm axëëk ak axëëk ko pën wi’ix xytyu’unëm (Proverbios 24:29; Romanʉs 12:17-21).

5. Käjxpojk etsë brujë’äjtk: Näägë jä’äy tmëgäjxtë tsuu poj ets pyudëkëdët mä jä’äy dyajtsoybyety. Etsë wiinkpëty tkäjxpoktë myëtsipëty ets pyä’ämbattët o axtë dya’ooktë. Tëgekyë tyä’ädë tu’unën yë’ë dë’ën nyikëjxm’äjtypyë Satanás. Pääty, pënatyë Dios myëduundëp kyaj mbäät ttundë tëgekyë tyä’ädë (Deuteronomio 18:9-13; Di’ibʉ Jatanʉp 21:8). Pën mbäät xykyuwä’änëm mä tadë jä’äy di’ib käjxpojkp yë’ë Jyobaa ko n’ijtëm mëët wingon (Proverbios 18:10).

6. Më’uk: Ko n’ukëmë binë, serbesë o oy tyim di’ibëtyë nëë di’ib yajmukp kyaj y’axëëgëty, per net pën n’ukëm waanë (Salmo 104:15; 1 Timotee 5:23). Perë Dios yajkubojkypy ko n’ukni’igyëm o ko nmuktëgo’oyëm (1 Korintʉ 5:11-13; 1 Timotee 3:8). Më’uk mbäät myaj’yubety myajpä’ämbetyëty ets mbäät dyajmä’ätyë mtsënä’äy mjuky’äjtënë. Nan mbäät pojënë tijaty mduktunyëty (Proverbios 23:20, 21, 29-35; Éfesʉ 5:18).

7. Tadë jä’äy di’ib tyuunk’äjtypyë axëk’äjtën di’ibë Dios jënäämp ko kyaj y’oyëty «kyaj y’ittët mä Diosë kyutujkën» (Galasyʉ 5:19-21). Pën mijts mjantsy tsyojkypyë Dios ets myajjotkujk’ataampy, mbäät m’awä’ätspëtsemy mä tëgekyë tyä’ädë tu’unën (1 Fwank 5:3). Axëk’ix di’ibë Dios jënäämp ko axëëk (Romanʉs 12:9). Naymyayëdë mëdë jä’äy di’ib jä’äy’äjtp extëmë Dios ttsoky (Proverbios 13:20; Ebreeʉsʉty 6:12). Yë’ë nmëgu’uk’äjtëm di’ib myëdäjtypy kajaa Diosë y’ëxpëjkën mbäät xypyudëjkëm mëjwiin kajaa (Santya̱’a̱gʉ 5:14). Per pën ni’igyë mbäät mbudëkëty yë’ë Dios ko xymyënu’kxtä’ägët (Filipʉs 4:6, 7, 13).

Copyright © 2010 Watch Tower Bible and Tract Society of Pennsylvania. All rights reserved.