Kostumbrë etsë mëbëjkën di’ibë Dios kyaj ttukjotkëda’aky

Dios kyaj yë’ëjëty tu’ugë Trinidad

1. Kyaj tëgekyë kostumbrë etsë mëbëjkënë y’axëëgëty. Per di’ibë Dios kyaj tkupeky yë’ë tadë kostumbrë etsë mëbëjkënë di’ib tso’omp mä relijyonk di’ib kyaj tyëy’äjtënëty o di’ib kyaj myiny mä Biiblyë (Matewʉ 15:6).

2. Trinidad: ¿Yë’ë Jyobaa tu’ugë Trinidad, njënä’änëm, tu’ugë Dios, je’eyë ko nidëgëëgë jä’äy? Kyaj. Jyobaa, yë’ë Teety, ets yë’ë je’eyë tukpäjk Dios (Markʉs 12:29; Fwank 17:3). Jesús yë’ë Diosë kya’axkopk’U’unk, ets myëmëdoobyë tyeety (1 Korintʉ 11:3). Yë’ë Teety ni’igyë kutujkënë tmëdaty ets kyaj dyë’ënëtyë U’unk (Fwank 14:28). Tadë espiritë santë kyaj yë’ëjëty tu’ugë jä’äy; yë’ë Diosë mëjää (Génesis 1:2; Apostʉlʉty 2:18).

Dios’u’unk xëë jam tsyoony mä relijyongë tëëyëbë di’ib kyaj tyëy’äjtënëty

Kyaj tiko mbäät n’awdäjtëmë o’kpë ets ntsë’këm

3. Dios’u’unk xëë etsë Amääy xyëë: Jesús kyaj myaxu’unk’äjty 25 äämbë disyembrë, ja myaxu’unk’äjty naa tu’uk äämbënë oktuubrë, ja tiempë mä netyë borreegë kuent’äjtpë myä’ädë aamyoty (Lukʉs 2:8-12). Jesús ninä’ä ojts tkani’ana’amë ets yajnixëdunët mä myaxu’unk’äjty. Di’ib nyi’ana’amë yë’ë ets yajjamyatsëdë y’o’kën xyëë (Lukʉs 22:19, 20). Tëgekyë kostumbrë di’ibë jä’äy tyuundëp ko Dios’u’unk xëë jam tsyoony mä relijyongë tëëyëbë di’ib kyaj tyëy’äjtënëty. Nandë’ën tëgekyë kostumbrë di’ib mä Amääy xyëë, extëmë täjnäjxk o ko jä’äy kyaj tsyu’utstë. Pënaty tëëyëp pyanëjxtë Jesús kyaj tmëjtuundë Dios’u’unk xëë ets ni tka’amääy’äjttë Amääy xyëë, nandë’ën di’ib tyam jyantsy pyanëjxtëbë Jesús kyaj dë’ëmbë ttundë.

4. Naynyixëdunë mä xëë jëmëjt y’abety: Majtsk je’eyë jä’äy yajnimaytya’aky mä Biiblyë di’ib naynyixëduunë ko xyëë jyëmëjt dya’abejty, per yë’ë tadë jä’äy di’ib kyaj tmëduundë Jyobaa (Génesis 40:20-22; Markʉs 6:21, 22, 24-27). Pënaty tëëyëp pyanëjxtë Jesús kyaj tmëjtuundë ko ja xyëë jyëmëjt dya’abajttë. Tadë kostumbrë jam tsyoony mä relijyongë tëëyëbë di’ib kyaj tyëy’äjtënëty. Pënaty tyam jyantsy pyanëjxtëbë Kristʉ naynyamooyëdëp tijaty ets ijt xoondëp oy tyim nä’äty.

5. O’kpë tsë’ëgë: Yë’ë o’kpë kyaj mbäät ti ttundë ets ni ti tkajawëdë. Ëtsäjtëm kyaj mbäät nbudëjkëm, ets yë’ëjëty kyaj mbäät xy’axëktu’unëm (Salmo 146:4; Eclesiastés 9:5, 10). Ko n’o’këm kyaj ti pyëtsemy mä nini’x këbäjk di’ib nëjxp winktsoo juky’äjtpë. Pën nä’äty nayajnäjxëdëp dë’ën extëmë o’kpë anmë, yë’ë tadë axëk anklës di’ib yajtijtëp ka’oybyëty. Tëgekyë kostumbrë di’ibë jä’äy tyuumpy ko o’kpë ttsë’ëgë kyaj y’oyëty (Isaías 8:19).

6. Kruus: Jesús y’o’ky mä tu’ugë kepyë tëybyë kyaj kryuuskëjxyëty. Di’ib mä mayë Biiblyë të yajkäjxnaxy kruus, mä grieegë y’ayuk yë’ë y’andijpy tu’ugë kepyë tëybyë. Ets extëm tyamë jä’äy dyajnikajtë tadë kruus ja myiny mä relijyongë tëëyëbë di’ib kyaj tyëy’äjtënëty. Pënaty tëëyëp pyanëjxtë Jesús kyaj tmëdäjttë kruus ets ni tka’awdäjttë. Pääty wi’ix m’okjënä’äny, ¿oydaa nyajtu’unëmë kruus ko n’awdäjtëmë Dios? (Deuteronomio 7:26; 1 Korintʉ 10:14.)

7. Tsip yajmastutä’äy näägë kostumbrë etsë mëbëjkën di’ib yä të yajnigajxy. Mbäät axtë mbajiiky mbamëgu’uk o mëtnaymyaayëbë mdukutëkëty ets kyaj xyajtëgatsëdë mëbëjkënë. Per ni’igyë jyëjp’amëty nyajjotkujk’äjtëmë Dios ets kyaj dyë’ënëty ko nyajjotkujk’äjtëmë nmëgu’uk’äjtëm (Proverbios 29:25; Matewʉ 10:36, 37).

Copyright © 2010 Watch Tower Bible and Tract Society of Pennsylvania. All rights reserved.