Wi’ix xypyäädëdë relijyongë tëy’äjtënbë

1. Jesús je’eyë dyajnaxkëdaky tu’ugë relijyongë tëy’äjtënbë. Pääty tyam je’eyë jya’aty tu’ugë relijyonk di’ib jyantsy myëduundëbë Jyobaa Dios (Fwank 4:23, 24; Éfesʉ 4:4, 5). Tadë Biiblyë tyukni’ixë ko niwaanë jä’äy di’ib nëjxtëp mä ja tu’ujë xu’utspë di’ib mënëjxp mä juky’äjtën (Matewʉ 7:13, 14).

2. Biiblyë të nety jyëna’any, ko ja apostëlëty y’o’ktääynyëdët tyëkëya’any mä ja Jesusë y’ëxpëjkpëty wanaty wanatyë tukni’ijxënë etsë tu’unënë di’ibë Kristʉ kyaj tyukni’ijxë. Ets ko jam’atäämp ja jä’äyëty di’ib yajtëgoyandëp ja ëxpëjkpëty ets ttukmastu’udä’ändë ja Kristʉ (Matewʉ 7:15, 21-23; Apostʉlʉty 20:29, 30). Pääty n’ijxëm mayë relijyongë tëgatsyatypyë di’ib naynyigäjxëp ko tpanëjxtë Kristʉ. ¿Wi’ix mbäät n’ëxkäjpëm pënaty jyantsy pyanëjxtëbë Kristʉ?

3. Ko nyaytsyokëdë nixim niyam yë’ë di’ib mas yajnigëxë’këdëp ko tjantsy pyanëjxtë Kristʉ (Fwank 13:34, 35). Kyaj të yajtukni’ixëdë ets nyayjawëdët mëj këjxm mä jä’äy di’ib wiink koloor ix’äjtp. Nan kyaj të yajtukni’ixëdë t’axëk’ixtëdë jä’äy di’ib wiink nax wiink käjpn tso’omp (Apostʉlʉty 10:34, 35). Pääty kyaj ttuktëkëdë tsip. Pënaty jyantsy pyanëjxtëbë Kristʉ dë’ën nyayjawëdë tukjiiky tukmëgu’ukpëm nixim niyam (1 Fwank 4:20, 21).

Pënaty jyantsy pyanëjxtëbë Kristʉ naytsyojkëdëp nixim niyam, myëj’ijxtëbë Biiblyë ets y’ëwä’x kyäjxwä’xtëbë Diosë y’Ana’amënë

4. Ja tukpeky di’ib yajtuk’ëxkäjpë tadë relijyongë tëy’äjtënbë, yë’ko tadë jä’äy di’ib tyuk’ijtëdëp wyintsë’këdëp mëkë Biiblyë, ets y’axäjëdëp extëmë Diosë y’ää y’Ayuk ets myëbëjktëp wi’ix jyëna’any (Fwank 17:17; 2 Timotee 3:16, 17). Parë yë’ëjëty, ni’igyë jyëjp’amëtyë Diosë y’Ayuk ets kyaj dyë’ënëtyë naxwinyëdë jä’äyë jyot wyinmä’äny o kyostumbrë (Matewʉ 15:1-3, 7-9). Tyuundëbë mëjää ets jyuky’attë tu’uk tu’ugë xëë nyaxy extëmë Biiblyë jyëna’any. Pääty, kyaj tëgatsy y’ëwä’x kyäjxwä’xtë ets tëgatsyë net y’adë’ëtstë (Titʉ 1:15, 16).

5. Pënaty tyuk’ijtëdëbë relijyongë tëy’äjtënbë nan tsojkëp tmëj’ixtëdë Diosë xyëë (Matewʉ 6:9). Jesús tyuk’ixy’äjtë jä’äyëtyë Diosë xyëë, Jyobaa, ets pënaty tyam jyantsy pyanëjxtëbë Kristʉ tsojkëp nandë’ën ttundët (Fwank 17:6, 26; Romanʉs 10:13, 14). ¿Pënaty mä mnax mgäjpn kyäjxwä’xtëbë Diosë xyëë?

6. Pënaty jyantsy pyanëjxtëbë Kristʉ tsojkëp t’ëwä’x tkäjxwä’xtëdë Diosë y’Ana’amënë. Jesús dë’ën ttuuny. Yë’ë xëmë ojts tnigajxy tnimaytya’agyë tadë Ana’amënë (Lukʉs 8:1). Nandë’ën ojts ttuk’ane’emy ja y’ëxpëjkpëty parë abëtsemy Nyaxwinyëdë nandë’ën t’ëwä’x tkäjxwä’xtët (Matewʉ 24:14; 28:19, 20). Pënaty jyantsy pyanëjxtëbë Kristʉ myëbëjktëp ko Diosë y’Ana’am Kyutujkën yë’ë je’eyë di’ib yajminaambyë tu’ugyë’äjtënë ets dyajjëga’agä’änyë tsë’k jä’än yä Naxwiiny (Salmo 146:3-5).

7. Jesusë y’ëxpëjkpëty kyaj ttuktëk ttukwä’ägëdë axëk’äjtënë di’ib tyuundëbë naxwinyëdë jä’äy (Fwank 15:19). Kyaj ttuktëk ttukwä’ägëdë politikë winmä’äny ets nan kyaj ttuktëkëdë ko jä’äy nyaynyibëdë’ëgëdë mä tijaty dyajtsiptä’äktë. Oy jya’ay’attë ets kyaj ttundë axëk’äjtënë di’ibë naxwinyëdë jä’äy tyukjuky’äjttëp (Santya̱’a̱gʉ 1:27; 4:4). ¿M’ixy’ajtypy tu’ugë relijyonk di’ib kyuytyuumpy extëm yä të yajnigajxy ets dya’ixëdë ko tjantsy pyanëjxtë Kristʉ?

Copyright © 2010 Watch Tower Bible and Tract Society of Pennsylvania. All rights reserved.