¿Wi’ixë Jyobaajë tyestiigëty y’ityë tyuunk tukniwääbë?

1. Tadë tuunk di’ib tyam tyuundëbë Jyobaajë tyestiigëty ja tsyondaky naa 1870. Tim jawyiin ja nety yajtijtë Biiblyë Ëxpëjkpë, per mä tadë jëmëjt 1931 yajxëëmooytyë Jyobaajë tyestiigëty, extëm yajpääty mä Biiblyë (Isaías 43:10). Y’ëxpëjktsondaky niwaanë Jyobaajë tyestiigëty, ta dë’ënyë dë’ënyë nyimayëndë axtë të jyäjnë miyonk’am di’ibë net tyam ëwä’x käjxwä’xtëp 230 pa’is naxy.

2. Nimaybyë Jyobaajë tyestiigëty nyaymyukëdë tëgëk okë tu’ukpë sëmään. Myajwoop ets mnëjxët mä tyu’ukmuktë (Ebreeʉsʉty 10:24, 25). Tadë ëxpëjkënë di’ib jap näjxp yajpääty mä Biiblyë, tsyonda’aky ets kyugëxë mëdë nu’kxtakën, ets nandë’ën mëdë «ëy di’ibë mëët ja Dios yajmëjawë» mët tëgekyë jot korasoon (Éfesʉ 5:18, 19). Mbäät tyëkë oy pyënëty, kyaj jap pën ya’amdoyë meeny (Matewʉ 10:8).

3. Nimaybyë Jyobaajë tyestiigëty nyaymyukëdë mä tu’ugë Tëjk mä y’Ëxpëktë. Tyä’ädë Tëjk mä y’Ëxpëktë adëyë kyojyëty, ets yë’ë Testiigëty të tkojtë namay’äjtën. Jap kyaj xy’ixä’änyë kruus o oy tyim di’ibëtyë awinax. Tadë meeny sentääbë di’ib yajtuundëp, jap tjuuttë mä tadë meeny di’ib yajnayäjkp. Jap tap y’ity tu’ugë käjë mä nyipetyë meeny di’ib yajnayäjkp ets pënatyë tsojkënë myëdäjtypy tnayakä’ändë meeny mbäät jap tpëjtä’äktë (2 Korintʉ 9:7).

4. Mä jya’aty tu’uk tu’ugë naymyujkën jap’äjtpë mëjä’äytyëjk di’ib ijx’ijt kuent’äjtp. Yë’ëjëty myënëjxtëbë jëjp’am’äjtënë mä ya’ëxpëktë (1 Timotee 3:1-7; 5:17). Myëdäjttëbë tuumbë di’ib pudëjkëdëp mä ja naymyujkën (1 Timotee 3:8-10, 12, 13). Per ni yë’ë mëjä’äytyëjk ets ni tuumbë di’ib pudëjkëdëp kya’ity mëj mä ja jä’äy nyaymyukëdë (2 Korintʉ 1:24). Kyaj yajxëëmo’oytyë tëgatsy (Matewʉ 23:8-10). Kyaj wyit nyijam tpëjtä’äktë tëgatsy, nan kyaj t’axäjëdë myëju’uny ko tyundë. Yë’ë mëjä’äytyëjk xonda’aky y’ää xonda’aky jot dyaktë ja Diosë y’ëwij kyäjxwijënë mä ja jä’äy nyaymyukëdë. Tnë’ëmo’oy ttu’umo’oytyë jä’äy ets tjotkujk mo’oytyë jä’äy ko tpäättë amay jotmay (Santya̱’a̱gʉ 5:14-16; 1 Peedrʉ 5:2, 3).

5. Jyobaajë tyestiigëty jëmëjt jëmëjt nandë’ën tyu’ukmuktë jantsy nimay. Jyäjtmujktä’äytyë ninë’ën nyamyukëdë mäjatyë käjpn, parë tmëdoo’itä’ändë ëwij käjxwijënë jëjp’ambë di’ib miimp mä Biiblyë. Kogoo dë’ën tyu’ukmuktë ta nyëbattë pënaty myëdunandëbë Dios (Matewʉ 3:13-17; 28:19, 20).

6. Nueva York jap y’ityë kyopkë Jyobaajë tyestiigëty. Jap yajpäätyë mëjä’äytyëjk di’ib myëdäjttëp kajaajë Diosë y’ëxpëjkën ets yë’ë y’ijxtaapy wi’ix tyundë Jyobaajë tyestiigëty abëtsemy Nyaxwinyëdë, yajtijtë Grupë di’ib Wooyo’opy. Abeky jya’aty 100 naxyë lugäär, mä jä’äy tyundë namay’äjtën, dyajpëtsëmdë tëgekyë ëxpëjkpajtën di’ib mä Biiblyë ta net t’agajxwä’xtë, ets nandë’ën ttukniwits ttuknimayëdë wi’ix ya’ëwä’x yajkäjxwä’xëdë Diosë y’ää y’ayuk. ¿Tiko xykyatuknibëjtäägë ets nëjx xykyu’ixyë tyä’ädë lugäär mä tyundë Testiigëty?

Copyright © 2010 Watch Tower Bible and Tract Society of Pennsylvania. All rights reserved.