1. Mijts kajaa kujk xynyijawë oy’äjtënë di’ib miimp mä Biiblyë. Tyä’ädë ëxpëjkënë mbäätxyëp mjapudëkëty etsë mjä’äy’äjtënë xya’oyët wanaty wanaty extëmë Dios ttsoky (Éfesʉ 4:22-24). Etsë tyä’ädë ëxpëjkënë jëjp’am nandë’ën parë xypyäädëdë juky’äjtënë winë xëë winë tiempë (Fwank 17:3). Perë mëgu’uk nan tsojkëp tmëdowëdë tyä’ädë jembyë ää ayuk parë mbäät tsyo’oky. Pääty ni’amukë pënaty jyantsy myëdunandëbë Dios tsojkëp tnigäjx tnimaytyä’äktët. Dios yë’ë dë’ën nyi’ana’amëp (Romanʉs 10:10; 1 Korintʉ 9:16; 1 Timotee 4:16).
2. Mbäät ogä’änë mwin’ixy xytyukmëmaytya’agyë di’ib kujk xynyijawë. Tukmëmaytyä’ägë mbajiiky mbamëgu’uk, mëtnaymyaayëbë, pënaty mëët m’eskuelë’attë o pënaty mëët mdundë. Mëtmaytyä’äk mëdë oyjya’ay’äjtënë ets mëdë ma’xtujkën (2 Timotee 2:24, 25). Jamyats ko jä’äy ni’igyë t’ixy ttuny wi’ix pën jyuky’aty ets kyaj dyë’ënëty wi’ix pën kyajxy myaytya’aky. Pääty, ko oy mjuky’atët mbäät tyuny etsë wiink jä’äy tmëdoo’itëdë ää ayuk di’ib mdukmëmaytyakypy (Matewʉ 5:16; 1 Peedrʉ 3:1, 2, 16).
3. Ok ta net mijts mya’ixä’äny pën mbäät mnëjxnë ëwä’x käjxwä’xpë mëdë Jyobaajë tyestiigëty di’ib mëët mnaymyukyëty. Jëjp’am ets dë’ën xytyunët net mwinbatët mä Diosë kyäjpn (Matewʉ 24:14). ¡Wi’ixyëp ndim xondakëm koxyëp mbäät pën xy’okpudëkë ets tmëdunëdë Jyobaa parë tpäädëdë juky’äjtënë winë xëë winë tiempë! (1 Tesalónikʉ 2:19, 20). |
