 |
Beliefs | Future | Medical | Topics | Contact Us | Publications | Languages |
Faigi gõi
SIDUHU hezo da’õ? Sanandrõsa ba wa’auri sabõlõ moguna sasese lasofu niha. Te no’irai tumbu ba wangra-ngerau ngawalõ ganofula simane da’e:
Hezo õsõndra wanema li ba ngawalõ ganofula simanõ? Ba naha wangirõ’õ buku nibaso-baso zato ba ma banaha wamawa buku, tola õsõndra ngahõnõ mbuku sanguma’õ so khõnia wanema li ba da’õ. Ba hiza’i asese manõ wa õsi mbuku si sambua lõ faoma zinõndrara nõsi mbuku bõ’õnia. So gõi ngawalõ mbuku wa ba zi samuza inõtõ sõkhi taw̃a’õ, ba lõ ara aefa da’õ ba lõ moguna, ba ma la’atulõ’õ nõsinia ba ma zui lagati.
Hiza i so sambua mbuku same’e fanema li si tola tafaduhusi tõdõ. Buku da’e õsinia siduhu. Yesu Keriso zanguma’õ ba wangandrõnia khõ Lowalangi, ”Taroma limõ ziduhu.” (Yohane 17:17) Iada’e, aboto ba dõdõda wa Taroma li andrõ ya’ia Zura Ni’amoni’õ. Ba mbuku da’e, tola tasõndra wanema li Zura Ni’amoni’õ sifahatõ ba dõdõda, satulõ ba ngawalõ ganofula moroi yaw̃a.
HANA WA SO GANOFULA SIMANÕ: Uli danõ si so ita iada’e no si fahõna fa’alõsõkhi ba fa lõ atulõ. Oya agama samaha’õ wa famakao si gõna ita no somasi Lowalangi.
HADIA NIFAHA’Õ ZURA NI’AMONI’Õ: Tenga Lowalangi zamobõrõ fa’alõsõkhi. ”Bõi manõ taw̃a’õ ilau zi lõ sõkhi Lowalangi ba ifatõrõ zi lõ atulõ Si lõ ambõ fa’abõlõ!” niw̃a’õ Yobi 34:10. So gohitõ dõdõ Lowalangi sifahõna fa’omasi ba niha. Andrõ ifaha’õ ita Yesu ba wangandrõ, ”He Ama khõma si so ba zorugo, ya . . . tobali banuau fefu niha. Ya itõrõ zomasi ndra’ugõ hulõ ba zorugo ya simanõ gõi ba guli danõ.” (Matai’o 6:9, 10) I’angeragõ tõdõ sibai ita Lowalangi, irege ifalua wa’ate’ala sebua ena’õ alua gohitõ dõdõ-Nia.—Yohane 3:16.
Faigi gõi Moze I 1:26-28; Yakobo 1:13; ba Fetero I 5:6, 7.
HANA WA SO GANOFULA SIMANÕ: Tebai mu’erai ha wa’ato niha si no mate bõrõ wasuwõta. Fefu ita no tarasoi ngawalõ wamakao.
HADIA NIFAHA’Õ ZURA NI’AMONI’Õ: Ifa’ele’õ Lowalangi wa ifalua dania wa’atulõ ba zi sagõrõ uli danõ. Barõ wamatõrõ-Nia, ya’ia da’õ famatõrõ moroi ba zorugo, fefu niha ”lõ sa’ae lafaha’õ ira wasuwõta”. Ya’ira ba ”labali’õ faku zi’õlira”. (Yesaya 2:4) Ihori dania Lowalangi fefu ngawalõ zi lõ’atulõ ba famakao. Sura Ni’amoni’õ zamabu’u, ”Ba i’osi dania daw̃a hõrõ fefu, ba hõrõra, ba lõ fa’amate sa’ae, ba lõ fa’abu dõdõ, ba lõ fege’ege, ba lõ fa’afõkhõ sa’ae, meno numalõ zi fõfõna andrõ.”—Fama’ele’õ 21:3, 4.
Faigi gõi Sinunõ 37:10, 11; 46:9; ba Mikha 4:1-4.
HANA WA SO GANOFULA SIMANÕ: Oya agama ba guli danõ samaha’õ wa hew̃a’ae mate mboto ba lõ mate noso. So zi faduhu tõdõ wa si no mate andrõ tola ifosikho niha sauri ba ma ihuku niha si lõ sõkhi Lowalangi, ifakao ira ba galitõ narako siholahola irugi zi lõ aetu.
HADIA NIFAHA’Õ ZURA NI’AMONI’Õ: Ba ginõtõ wa’amate, niha andrõ lõ ya’ira sa’ae. ”Ba si no mate, ba lõ hadia ia la’ila,” niw̃a’õ Zangombakha 9:5. Lõ fa’aboto ba dõdõ ba niha si no mate, lõ larasoi hadia ia, bõrõ da’õ lõ lafosikho—ba ma latolo—niha sauri.—Sinunõ 146:3, 4.
Faigi gõi Moze I 3:19 ba Sangombakha 9:6, 10.
HANA WA SO GANOFULA SIMANÕ: Omasi auri ita. Omasi na auri ita faoma niha ni’omasi’õda. No sinangea na awakhõ sibai dõdõda ena’õ falukha ita niha si no mate ni’omasi’õda.
HADIA NIFAHA’Õ ZURA NI’AMONI’Õ: Ato niha si no mate ba tesusugi. No ifabu’u Yesu wa ”ba . . . dozi si so ba lewatõ ba mõi ira yaw̃a”. (Yohane 5:28, 29) Simane ohitõ dõdõ Lowalangi ba mbõrõta, dozi niha ni susugi moroi ba lewatõ latema dania wa’auri ba waradaiso andrõ. (Luka 23:43) Ba nifabu’u andrõ ba zi so fõnada, niha si lõfarõi andrõ so khõra wa’abõlõ mboto ba fa’auri si lõ aetu. Sura Ni’amoni’õ zanguma’õ, ”Satulõ tõdõ zokhõ tanõ dania, ya’ira zowanua ba danõ, si lõ mamalõmalõ.” —Sinunõ 37:29.
Faigi gõi Yobi 14:14, 15; Luka 7:11-17; ba Hal. Zin. 24:15.
HANA WA SO GANOFULA SIMANÕ: Arakhagõ fefu niha si so agama no to’õlõ mangandrõ. Ba hiza’i ato zanguma’õ wa fangandrõra lõ ifondrondrongo Lowalangi.
HADIA NIFAHA’Õ ZURA NI’AMONI’Õ: Ifaha’õ ita Yesu ena’õ bõi tafuli-fuli furi wehede ba wangandrõ. ”Na mangandrõ ami” iwa’õ ”ba bõi mi’oya’õ li.” (Matai’o 6:7) Na omasi ita ifondrondrongo wangandrõda Lowalangi, ena’õ mangandrõ ita ba zi faudu ba zomasi Ia. Bõrõ da’õ moguna sibai ta’alui hadia zomasi Lowalangi, ba ta faudugõ wangandrõda ba zomasi Ia andrõ. Yohane I 5:14 ibe’e wamotokhi ba dõdõ, ”Na so ni’andrõda hadia ia, si faudu ba zomasi Ia, ba ifondrondrongo khõda.”
Faigi gõi Sinunõ 65:3; Yohane 14:6, 14; ba Yohane I 3:22.
HANA WA SO GANOFULA SIMANÕ: Ato zi faduhu tõdõ wa fo’ana’a, fa’ateturia, ma fa’asõkhi mboto zi tola manga’asogõ fa’owuawua dõdõ khõra. Bõrõ da’õ wa lagohi sibai ia. He w̃a’ae simanõ ba ta’ila i wa lõ lasõndra wa’owuawua dõdõ.
HADIA NIFAHA’Õ ZURA NI’AMONI’Õ: I’ombakha’õ Yesu lala wanõndra fa’owuawua dõdõ, ”Ya’ahowu zi numana tõdõ.” ma ”sangodõdõgõ wangalui fa’auri nosonia.” (Kitab Suci Terjemahan Dunia Baru) (Matai’o 5:3) Fa’owuawua dõdõ si lõ aetu, awena tola tasõndra ia na tatõrõ lala ba wangalui soguna khõda fondrege zebua—fa’olofo ba ziduhu andrõ sanandrõsa khõ Lowalangi ba ohitõ dõdõ-Nia ba khõda. Siduhu andrõ tesõndra ba Zura Ni’amoni’õ. Fa’aboto ba dõdõ ziduhu andrõ, tola itolo ita ba wangila hadia zabõlõ moguna—ba si lõ moguna. Na ta odanedane zi duhu andrõ ba wangai angetula ba ma ba nifaluada, ba mofozu wa’aurida.—Luka 11:28.
Faigi gõi Amaedola 3:5, 6, 13-18 ba Timoteo I 6:9, 10.
Famotokhi ba dõdõ si no tesura moroi yaw̃a, ha famotokhi sadogodogo moroi ba Zura Ni’amoni’õ ba zi õnõ ganofula moroi yaw̃a. Hadia omasi nasa ndra’ugõ õsõndra wa’aboto ba dõdõ? Na ya’ugõ samõsa ”sangodõdõgõ wangalui fangorifi noso,” lõ zilõ edõna ndra’ugõ. Te no irai õbe’e wanofu simane da’e: Na si ndruhu so ba dõdõ Lowalangi ita, hana wa itehegõ manõ tola alua ngawalõ zi lõ sõkhi ba ma famakao ba zi ha’uga nga’õtõ fa’auri niha? He’uwisa ena’õ si tedou sõkhi lala wa’auri nõsi nomogu? Sura Ni’amoni’õ ibe’e wanema li safõnu ba si tola itema tõdõda moroi ba ganofula simanõ, ba ba ganofula tanõ bõ’õnia gõi.
Ba hiza, ato niha iada’e manufa dõdõra wamareso Sura Ni’amoni’õ. Tetaõ ba dõdõra me awe’e-we’e ia, mendrua manõ me oya zi lõ aboto ba dõdõra nõsinia. Hadia edõna ndra’ugõ latolo ba wanõndra ngawalõ wanema-nema li ba Zura Ni’amoni’õ? Ira Sasi Yehowa la oroma’õ khõu dua lala ba wanolo ya’ugõ.
Sifõfõna, buku Hadia Ni’andrõ Lowalangi Moroi Khõda? mufa’anõ ba wanolo niha si lõ inõtõ ba wamareso fanema li moroi ba Zura Ni’amoni’õ ba ngawalõ ganofula sabõlõ moguna. Lala si sambua, ba ya’ia da’õ famaha’õ ni’amualagõ moroi ba Zura Ni’amoni’õ nifalua ba nomo. Lõ la’andrõ game’ela, Sasi Yehowa samõsa niha si sõkhi tõdõ ba satuatua ba wamaha’õ Taroma li Lowalangi mõi ia sakali samigu ba nomou ba ma ba naha tanõ bõ’õ si faudu ba dõdõu ba wamatunõ õsi Zura Ni’amoni’õ. Ato niha ba zi sagõrõ uli danõ, zi no manõndra bua moroi ba wamaha’õ simane da’e. Ato ba gotaluara no lahalõ gangetula fondrege zi sõkhi, ”No usõndra ziduhu!”
Da’e ia gokhõta fondrege zebua bõli nisõndrau. Siduhu moroi ba Zura Ni’amoni’õ no i’efa’õ ita moroi ba halõw̃õ gafõkha, ba wa lõ era-era, ba fa’ata’u, ba ibe’e gõi khõda wanõtõna, ohitõ dõdõ, ba fa’omuso dõdõ. Imane Yesu, ”Aboto ba dõdõmi ziduhu, ba i’efa’õ ami siduhu andrõ.”—Yohane 8:32.
Nifa’anõ ba ndrõfi 2008 |
 |