Haniha Lowalangi? - Situs Internet Resmi Saksi-Saksi Yehuwa

Situs Internet Resmi Saksi-Saksi Yehuwa

Beliefs

Future

Hadia Ni’andrõ Lowalangi moroi Khõda?

Famahaõ 2

Haniha Lowalangi?
	Haniha Lowalangi sindruhu andrõ, ba haniha dõi-Nia? (1, 2)
	Hadia nga’eu ni oboto-Nia? (3)
	Hadia mbuabua-Nia fondrege zebua? (4)
	Hadia faudu na ta’oguna’õ nadu ba famaedo ba wamosumangeda Lowalangi? (5)
	Hadia zi dua mbalõ lala wamahaõ ena’õ aboto ba dõdõda Lowalangi? (6)

1. Ato niha ba oya ngawalõ ni fosumangera. Sura Ni’amoni’õ zangombakha khõda wa ha samõsa Lowalangi SINDRUHU. Ya’ia zombõi fefu ngawalõ hadia ia he si so ba zorugo ba ba guli danõ. Me no Ya’ia zame’e fa’aurida, andrõ wa no sinangea ha Ya’ia samõsa nifosumangeda.—Korindro I, 8:5, 6; Fama’ele’õ 4:11.

2. Oya gamalalato dõi fasumangeta khõ Lowalangi ba ha sambua dõi. Tõi da’õ ba YEHOWA. Ba zi ha wa’oya ngawalõ Zura Ni’amoni’õ ba no latayaigo dõi Lowalangi andrõ ba lafalini ba no lafake dõi amalalatõ bõ’õ simane SO’AYA ba LOWALANGI. Sindruhunia ba mbõrõta me tesura Zura Ni’amoni’õ, ba so mato 7.000 wa’oya tesura dõi Yehowa andrõ!—Moze II, 3:15; Sinunõ 83:19.

3. Yehowa ba so mboto, ha wa tenga simane botoda. ”Lowalangi ba no Eheha,” niwa’õ Zura Ni’amoni’õ. (Yohane 4:24) Eheha ba no sambua wa’auri sabõlõ moadu moroi ba wa’aurida. Lõ niha si no mangila Lowalangi. Ba zorugo nahia Yehowa, ba tola i’ila fefu ngawalõ hadia ia. (Sinunõ 11:4, 5; Yohane 1:18) Na simanõ, hadia ia geheha ni’amoni’õ andrõ? Eheha ni’amoni’õ ba tenga so boto simane Lowalangi. Da’õ ba no fa’abõlõ moroi khõ Lowalangi.—Sinunõ 104:30.

4. Sura Ni’amoni’õ zamokai khõda amuata Yehowa. Sura Ni’amoni’õ zangoroma’õ khõda wa buabua-Nia fondrege zebua ba ya’ia da’õ fa’omasi, fa’atulõ, fa’atuatua, ba fa’abõlõ. (Moze V, 32:4; Yobi 12:13; Yesaya 40:26; Yohane I, 4:8) Sura Ni’amoni’õ zanutunõ wa sahakhõ tõdõ Ia, si sõkhi tõdõ, edõna Ia i’efa’õ lalõda, sebua tõdõ, ba sebolo tõdõ. Ya’ita, simane iraono solo’õlo’õ, lõ tola lõ’õ ta’odõdõgõ wolo’õ Ya’ia.—Efeso 5:1, 2.

Tafahaõ ita ba wa’aboto ba dõdõ Lowalangi moroi ba nifazõkhi-Nia ba moroi ba Zura Ni’amoni’õ

5. Hadia faudu na ta tuhi danõ ba ma talau mangandrõ ba nadu, gambara ba ma ba wamaedo ba wamosumangeda? Lõ’õ. (Moze II, 20:4, 5) Yehowa zanguma’õ wa ha Ya’ia manõ ni fosumangeda. Lõ ifosasi ba mbõ’õ lakhõmi-Nia he gofu ha’õkhõ ba ma gofu hadia ia. Lõ fa’abõlõ ba nadu wanolo ya’ita.—Sinunõ 115:4-8; Yesaya 42:8.

6. Hewisa ena’õ tola aboto sibai ba dõdõda Lowalangi? Sambua lala ya’ia da’õ na ta nehegõ ngawalõ ni fazõkhi-Nia ba ta’abakha’õ wo’angeragõ bakha ba dõdõ hadia nidunõdunõra khõda. Fefu nifazõkhi Lowalangi i’oroma’õ khõda wa so khõ-Nia wa’abõlõ ba fondrege wa’atuatua. Ta’ila wa’omasi-Nia ba ngawalõ fefu zi no i’azõkhi. (Sinunõ 19:2-7; Roma 1:20) Lala bõ’õ si tola ma me’e khõda fa’aboto ba dõdõ Lowalangi ya’ia da’õ na tafahaõ ita ba Zura Ni’amoni’õ. Ba Oya idunõdunõ khõda Sura Ni’amoni’õ hewisa ia Lowalangi andrõ. Itutunõ gõi khõda hadia gohitõ dõdõ-Nia ba hadia zomasi Ia tafalua.—Amosi 3:7; Timoteo II, 3:16, 17.

Nifa’anõ ba ndrõfi 1998
Copyright © 2008 Watch Tower Bible and Tract Society of Pennsylvania. All rights reserved.