Haniha Yesu Keriso?

1. Ba zorugo nahia Yesu ba mboto eheha fatua lõ mõi ia ba guli danõ. Ya’ia ba no bõrõta nifazõkhi Lowalangi, da’õ wa tefotõi ia Ono ”sia’a” khõ Lowalangi. (Kolose 1:15; Fama’ele’õ 3:14) Yesu andrõ ba no Ono Lowalangi si ha sambua ni fazõkhi-Nia samõsa. Fatua lõ tobali ia niha i’oguna’õ ia Yehowa tobali ”satua zotomo”-Nia ba wombõi fefu hadia ia danõ bõ’õ ba zorugo ba ba guli danõ. (Amaedola 8:22-31; Kolose 1:16, 17) I’oguna’õ gõi ia Lowalangi Sama’ema taroma li-Nia. Da’õ mbõrõ wa tefotõi Yesu andrõ ”Taroma li Lowalangi”.—Yohane 1:1-3; Fama’ele’õ 19:13.

2. Ifatenge Nono-Nia Lowalangi ba guli danõ ya’ia me ifawu’a wa’aurinia ba dalu Maria. Andrõ wa lõ ama Yesu andrõ niha guli danõ. Da’õ mbõrõnia walo fao khõnia horõ nga’õtõ andro gofu hadia ia awõ wa lõ mo’ahonoa. Tõlu danedane wa Ifatenge Yesu ba guli danõ Lowalangi: (1) Ba wamahaõ ya’ita sindruhu andrõ khõ Lowalangi (Yohane 18:37), (2) irorogõ walõ farõi so’ahonoa andrõ si tobali dumaduma khõda ena’õ ta’o’õ (Fetero I, 2:21), ba (3) ba wa me’e fa’aurinia salahida ba wangefa’õ ya’ita ba horõ ba ba wa’amate. Hana wa moguna da’e?—Mataio 20:28.

3. Me lõ i’o’õ goroisa Lowalangi, niha sifõfõna andrõ, Adamo, ifalua hadia niw̃a’õ ba Zura Ni’amoni’õ andrõ nifotõi ”horõ”. Andrõ ibe’e hukuma fa’amate khõnia Lowalangi. (Moze I, 3:17-19) Me lõ sa’ae i’o’õ gamakhoita Lowalangi, andrõ wa tenga sa’ae so’ahonoa ia. Itugu ara ba ba itugu atua ia ba mate. Adamo ba irõi horõ ondrõita andrõ ba ndraononia fefu. Da’õ gõi mbõrõ wa ya’ita itugu atua, mofokhõ, ba mate. Hewisa niha guli danõ ena’õ tola te’orifi?—Roma 3:23; 5:12.

4. Yesu ba no niha so ahonoa simane Adamo. He wa’ae simanõ, ba tenga simane Adamo, Yesu ba sindruhu afõnu wolo’õnia khõ Lowalangi he wa’ae itaõgõ wanandraigõ sabõlõbõlõ. Bõrõ da’õ wa tola ibe’e wa’aurinia so ahonoa ba wamu’a horõ Gadamo. Da’e ia nitõtõi ba Zura Ni’amoni’õ sitobali ”hõli”. Me simanõ ba nga’õtõ Gadamo ba tola te’efa’õ ira ba wanguhuku saekhu ba wa’amate. Fefu niha samati khõ Yesu ba tola te’efa’õ ngawalõ horõra ba latema wa’auri si lõ aetu.—Timoteo I, 2:5, 6; Yohane 3:16; Roma 5:18, 19.

Halõwõ Yesu ba mamahaõ, ba oya ifazõkhi dandra sahõlihõli dõdõ, ba si tõra moroi ba da’õ ba ibe’e wa’aurinia salahida.

5. Me so Yesu ba guli danõ ba ifadõhõ zofõkhõ, ibe’e gõ ba zolofo, itenawa mbade. Si tõra moroi ba da’õ ba isusugi zi no mate. Hana wa oya ifazõkhi dandra sahõlihõli dõdõ? (1) Ahakhõ sibai dõdõnia ba niha sangarõngarõ, ba omasi ia wanolo ya’ira. (2) Tandra sahõlihõli dõdõ andrõ zangoroma’õ wa ya’ia Ono Lowalangi. (3) I’oroma’õ hadia nifaluania dania ba niha solo’õlo’õ ba ginoto mamatõrõ ia tobali Razo ba guli danõ.—Mataio 14:14; Mareko 2:10-12; Yohane 5:28, 29.

6. Mate Yesu ba isusugi ia Lowalangi ba mboto eheha, ba mangawuli ia ba zorugo. (Fetero I, 3:18) I’otarai da’õ, no ibali”õ ia Razo Lowalangi. Lõ ara tõ ba ihori Yesu fefu zi lõ sõkhi ba famakao moroi ba guli danõ andre.—Sinunõ 37:9-11; Amaedola 2:21, 22.

Copyright © 2008 Watch Tower Bible and Tract Society of Pennsylvania. All rights reserved.