Hadia Gohitõ Dõdõ Lowalangi Ba Guli Danõ?

1. Andrõ wa iwõwõi danõ andre Yehowa ena’õ tola owuawua dõdõ niha wa’auri khõnia yawa gõtõgõtõ wa’ara. Omasi ia na la’onahiagõ guli danõ andre niha satulõ tõdõ ba fahõna wa’owuawua dõdõ. (Sinunõ 115:16; Yesaya 45:18) Tenga nifakiko guli danõ; lõ tebulõ guli danõ irugi zi lõ aetu.—Sinunõ 104:5; Sangombakha 1:4.

2. Fatua lõ ifazokhi niha Lowalangi, Ifili sambua naha side’ide moroi ba danõ ifazõkhi sagõrõ kabu faradaiso si sõkhi sibai. Ifotõi ia kabu Edena. Ba da’e ifataro ndra matua ba ira alawe sifõfõna andrõ, Adamo ba Khawa. Ohitõ dõdõ Lowalangi ya’ia da’õ ena’õ tumbu khõra ndraono ba la fõnui guli danõ. Landrohundrohugõ wangohalõwõgõi ya’ia irege si sagõrõ uli danõ andre tobali ia faradaiso.—Moze I, 1:28; 2:8, 15.

Faradaiso si taya

3. Si so hõrõ Gadamo ba Khawa me no la odõdõgõ wanawõ oroisa Lowalangi. Andrõ wa iheta ira Yehowa moroi ba kabu Edena. Faradaiso ba taya. (Moze I, 3:1-6, 23) He wa’ae simano ba lõ olifu Yehowa gohitõ dõdõ-Nia ba guli danõ andre. Fawu’u li Ia wa ibali’õ ia faradaiso, ni’onahiagõ niha gõtõgõtõ wa’ara. Hewisa Ia wamalua ya’ia?—Sinunõ 37:29.

4. Fatua lõ tobali faradaiso guli danõ andre, ba ihori ua fefu niha si lõ sõkhi. (Sinunõ 37:38) Alua da’e ba Hamagedo, ya’ia da’õ wasuwõta andrõ khõ Lowalangi ba wangohori si lõ sõkhi. Ba aefa da’õ ba tebe’e ba gurunga Zatana 1.000 fakhe wa’ara. Eluahania lõ hadõi sa’ae niha si lõ sõkhi nitehegõ wamakiko tanõ. Ha soi Lowalangi ni’orifi.—Fama’ele’õ 16:14, 16; 20:1-3.

5. Aefa da’õ mamatõrõ Yesu Keriso tobali Razo ba guli danõ andre 1.000 fakhe wa’ara. (Fama’ele’õ 20:6) Ba i’alõ’alõsi wangeheta horõ andrõ moroi ba gera’erada ba ba mbotoda. Tobali ita niha so ahonoa simane Adamo ba Khawa fatua lõ nifaluara hõrõ. Aefa da’õ ba lõ sa’ae fõkhõ, fa’atua, ba fa’amate. Tefadõhõ zofõkhõ, ba niha si no atua ba ifuli awuyuwuyu.—Yobi 33:25; Yesaya 33:24; Fama’ele’õ 21:3, 4.

6. Sagõtõ famatõrõ Yesu si hõnõ fakhe andrõ, niha si lõ farõi mohalõw̃õ ira wombali’õ faradaiso zi sagõrõ uli danõ andre. (Luka 23:43) Simanõ gõi ngahõngahõnõ niha bõ’õ si no mate tesusugi ira ba wa’auri ba guli danõ. (Halõwõ zinenge 24:15) Ba na lafalua hadia ni’andrõ Lowalangi khõra, ba auri manõ ira irugi zi lõ aetu. Ba na lõ’õ, ba tefakiko ira irugi zi lõ aetu.—Yohane 5:28, 29; Fama’ele’õ 20:11-15.

7. Me simanõ ba ohitõ dõdõ Lowalangi ba guli danõ andre ba mbõrõta ba mofozu. Hadia edõna ndra’ugõ fao ba wanema howuhowu andre ba zi so fõna? Na simanõ ba moguna tohugõ wamahaõ ya’ugõ fa’aboto ba dõdõ Yehowa ba õ’o’õ fefu hadia ni’andrõ-Nia. Na mõi ndra’ugõ ba wa owulo ba Nahia Gowuloa ndra Samaduhu’õ Yehowa ba tetolo sibai ndra’ugõ ba wamalua ya’ia.—Yesaya 11:9; Heberaio 10:24, 25.

Na no awai Hamagedo, ba te’azõkhi guli danõ andre tobali faradaiso

Copyright © 2008 Watch Tower Bible and Tract Society of Pennsylvania. All rights reserved.