Hatõ’õgõ Khõ Lowalangi Ba Wangandrõ

1. Fangandrõ ba no fahuhuosa khõ Lowalangi sifao fangide’ngide’õ. Sinangea lõ mamalõmalõ ndra’ugõ wangandrõ khõ Lowalangi. Ba zimano ba aboto ba dõdõu wa ahatõ ndra’ugõ khõ-Nia simane ba nawõu ni omasi’õu. Fondrege zolakhõmi ba sebua fa’abõlõ Yehowa, ba he w̃a’ae simanõ ba ifondrondrongo fefu wangandrõda. Hadia lõ mamalõmalõ mangandrõ ndra’ugõ khõ Lowalangi?—Sinunõ 65:3; Tesalonika I, 5:17.

2. Fangandrõ ba no faosatõ moroi ba wamosumangeda Lowalangi. Andrõ wa ha khõ Lowalangi, Yehowa mangandrõ ita. Me so Yesu ba guli danõ, ba lõ manõ aetu mangandrõ ia khõ Namania, ba tenga ba mbõ’õ. Sinangea ena’õ talau zimanõ. (Mataio 4:10; 6:9) He na simanõ, fefu wangandrõda ha ba dõi Yesu ta’andrõ ia. Da’e zangoroma’õ wa ta’osinangegõ dadaoma Yesu awõ wa mamati ita ba zumange fangõhõlinia andrõ.—Yohane 14:6; Yohane I, 2:1, 2.

3. Ba ginõtõ mangandrõ ita ba ena’õ fahuhuo ita moroi ba dõdõda khõ Lowalangi. Andrõ bõi talau wangandrõ ni tanõ ba dõdõ ba ma nibaso ba mbuku wangandrõ. (Mataio 6:7, 8) Tola mangandrõ ita gofu hewisa manõ wetaroda sifao fangide’ide’õ, gofu hadia ginõtõ, ba gofu heza manõ. Ifondrondrongo sa wangandrõ Lowalangi he ha fangandrõngandrõ dõdõda. (Samueli I, 1:12, 13) Sõkhi sa na ta’alui naha sahono ba sarõu moroi ba niha bõ’õ na fangandrõda andrõ angandrõw̃ada samõsa.—Mareko 1:35.

4. Hadia manõ zi tola õ’ohe ba wangandrõ? Gofu hadia manõ zi tola manuhini fahuwusada khõ-Nia. (Filifi 4: 6, 7) Fangandrõ si no tobali dumaduma i’oroma’õ wa ena’õ mangandrõ ita sanandrõsa ba dõi ba ba gohitõ dõdõ Yehowa. Tola gõi ta’andrõ ena’õ ibe’e zoguna ba mbotoda, ena’õ i’efa’õ horõda, fanolo ba wolaw̃a fanandraigõ. (Mataio 6:9-13) Fangandrõda ba bõi ha bawangandrõ somasi ita. Na mangandrõ ita ena’õ ha si faudu ba zomasi Lowalangi ni’andrõda.—Yohane I, 5:14.

5. Tola mangandrõ ndra’ugõ gofu hezo ginõtõ ni o’ou dõdõu ba wangandrõ saohagõlõ ma ba wanuno Lowalangi. (Nga’õtõ I, 29:10-13) Ena’õ mangandrõ ndra’ugõ ba ginõtõ so gabula dõdõ ba na tetandraigõ wamatiu. (Sinunõ 55:23; 120:1) Simanõ gõi wa sinangea mangandrõ ndra’ugõ fatua lõ manga’õ. (Mataio 14:19) Yehowa zogaoni ya’ita ena’õ mangandrõ ita ”ero inõtõ”.—Efeso 6:18.

6. Ba da’õ moguna sibai ta’odõdõgõ wangandrõ na no talau horõ sebua. Ba ginõtõ simanõ ena’õ ta’angarõfili wa’ahakhõ dõdõ ba fangefa’õ horõ moroi khõ Yehowa. Na ta bokai fõna Lowalangi fefu horõda ba ta’odõgõdõgõ sibai wa lõ tafuli talau horõ andrõ, ba ”ibologõ dõdõ-Nia” Lowalangi.—Sinunõ 86:5; Amaedola 28:13.

7. Ha fangandrõ niha satulõ tõdõ nifõ ndrondrongo Lowalangi. Ena’õ ifondrondrongo wangandrõngandrõu Lowalangi, lõ tola lõ’õ õ’odõdõgõ sibai wamaudugõ lala wa’auriu ba wolo’õ oroisa-Nia. (Amaedola 15:29; 28:9) Sinangea õ ide’ide’õ ndra’ugõ na mangandrõ’õ. (Luka 18:9-14) Moguna sibai õfaigi lala wamaudugõ buabuau ba wangandrõu. Me no simanõ no sitobali famaduhu’õ wa so khõu wamati awõ wa sindruhundruhu moroi ba dõdõu hadia zalua ba wehedeu. Aefa da’õ ba awena ifondrondrongo gangandrõw̃au Yehowa.—Heberaio 11:6.

Copyright © 2008 Watch Tower Bible and Tract Society of Pennsylvania. All rights reserved.