Fa’auri Zi Sambua Omo Sangohahau’õ Tõdõ Lowalangi

1. Sura Ni’amoni’õ zanguma’õ wa fo’omo ira matua zi tobali hõgõ ba nõsi nomonia. (Korindro I, 11:3) Samõsa wo’omo ira matua ba ha samõsa gõi ngambatõnia. La tõrõ lala satulõ ba wamalua fangowalura si faudu ba huku si no mufa’anõ.—Timoteo I, 3:2; Tito 3:1.

2. Fo’omo ira matua no sinangea i’omasi’õ ngambatõnia simane fangomasi’õnia botonia. Sinangea ihaogõ wondrorogõ ngambatõnia simane fondrorogõ Yesu fefu ba zolo’õ ya’ia. (Efeso 5:25, 28, 29) Tebai ibõzi ngambatõnia ba ma hadia ia ngawalõ wamakaõ bõ’õ. Moroi na ilau da’õ, sinangea i’oroma’õ wasumangeta ba fangosinangegõnia ya’ia.—Kolose 3:19; Fetero I, 3:7.

Ama solomasi ba no sanga’asogõ soguna ba nõsi nomonia he soguna ba mboto ba ba wa’auri

3. I’odõdõgõ sibai wahalõw̃õ ama ba ba wondrorogõ si sambua omonia. Sinangea ihõnaigõ mbalazora, nukhara, ba omo nahia ngambatõnia ba iraonania. Samõsa ama gõi ba sinangea ihõnaigõ zoguna ba wa’auri nõsi nomonia. (Timoteo I, 5:8) I’iagõ fõna ba wanolo õsi nomonia wamahaõ ya’ira ena’õ aboto ba dõdõra Lowalangi ba ohitõ dõdõ-Nia.—Moze V, 6:4-9; Efeso 6:4.

4. Ngambatõ ira alawe sinangea tobali sanolo si sõkhi khõ wo’omonia. (Moze I, 2:18) Sinangea itolo wo’omonia ba wamahaõ ba bawamamaha iraonara. (Amaedola 1:8) I’andrõ Yehowa khõ ngambatõ ira alawe ba wondrorogõ õsi nomonia si fao fa’omasi. (Amaedola 31:10, 15, 26, 27; Tito 2:4, 5) Ba sinangea i’osinangegõ wo’omonia soroi sibai ba dõdõnia.—Efeso 5:22, 23, 33.

5. I’andrõ Lowalangi ba ndraono ena’õ la’o’õ li zatuara. (Efeso 6:1-3) Itõtõna ba zatua ena’õ lafahaõ ba labe’e degudegu ba ndraonora. Moguna lebe’e ginõtõra satua ba ndraonora ba sifao ira ba wamahaõ ba Zura Ni’amoni’õ, ba lanehegõ sibai hadia zoguna ba wa’auri ba ba gera’era dõdõra. (Moze V, 11:18, 19; Amaedola 22:6, 15) Satua ba tebai labe’e degudegu ba ndraonora sifao fõnu ba bõzibõzi si lõfa’ahakhõ dõdõ.—Kolose 3:21.

Itõtõna Lowalangi ba zatua ena’õ lafahaõ ndraonora ba labe’e degudegu khõra

6. Ba na so zitobali fa’abu dõdõ ba zi faronga me lõ fahasara dõdõra moroi yomo, ba sinangea la odõdõgõ sibai wanandrõsaigõ khõra menemene moroi ba Zura Ni’amoni’õ. Sura Ni’amoni’õ zamarou ya’ita ena’õ ta’oroma’õ wa’õmasi ba fangefa’õ lalõ. (Kolose 3:12-14) Taroma li Lowalangi ba lõ i’o’ou wabalisa si tobali lala wangeheta ya’ita ba gabula dõdõ si ha ma’ifu. Ba hew̃a’ae simanõ ba samõsa ndra alawe ba tola ihalõ gangetula wondrõi fo’omonia na (1) fo’omonia ba sabe’e hõgõ lõ ibe’e zoguna ba nõsi nomonia, (2) fo’omonia ba afaito sibai irege tefakao mbotonia ba fa’aurinia ahatõ ba wa’amate, ba ma (3) fo’omonia abõlõ sibai ifa’udusi ia irege tebai ifalua wamosumange Yehowa.—Korindro I, 7:12, 13.

7. Si no tefabõbõ ba warongasa tebai farõi ira zamõsana. Fohorõ ba no sitobali lalõ fõna Lowalangi ba lalõ gõi khõ ngambatõra zamõsana. (Heberaio 13:4) Fahorõ ba niha bõ’õ baero ngambatõra zamõsana da’e niwa’õ ba Zura Ni’amoni’õ zi tobali danedane nitehegõ wa tola itibo’õ wo’omonia ma ngambatõnia ba mangowalu ia ba niha bõ’õ. (Mataio 19:6-9; Roma 7:2, 3) Lõ manõ omasi Yehowa na itibo’õ ngambatõnia niha si lõ danedane ba Zura Ni’amoni’õ ba mangowalu ia ba niha bõ’õ.—Maleakhi 2:14-16.

Copyright © 2008 Watch Tower Bible and Tract Society of Pennsylvania. All rights reserved.