Enoni Lowalangi No Si Tebai Ra’iõ

1. Lowalangi Yehowa no si lõ ra’iõ ba ni’amoni’õ. Ba manõtõna Ia ena’õ samosumange Ya’ia lõ manõ ra’iõ ira—he ba dõdõ, he ba gamuata, he ba gera’era, ba he ba mboto. (Fetero I, 1:16) Moguna sibai te’osindruhugõ wamaigi lala ena’õ lõ manõ si ra’iõ ita ba wamaigi Lowalangi. No ba guli danõ si ra’iõ so ita iada’e. Si fasõndra gõi ita ba wolaw̃a aoloma dõdõda samõsa ba wolau si lõ atulõ. He wa’ae simanõ ba tebai alulu ita.

2. Tõdõ si lõ ra’iõ: Na omasi ita mõi enoni Yehowa, ba tebai sa’ae falemba dõdõda ba wamahaõ ba ma ba zi no to’õlõ ifalua agamo selungu gofu hadia manõ. Sinangea taheta ita moroi ba agamo selungu ba tebai talului khõnia gofu hewisa ia. (Korindro II, 6:14-18; Fama’ele’õ 18:4) I’anema’õ me no so wa’aboto ba dõdõda zindruhu andrõ fa’aboto ba dõdõ Lowalangi, moguna ta’angelamaisi sa’ae ena’õ lõ lafaelungu ita dozi niha solohe famahaõ faya andrõ.—Yohane II, 10, 11.

3. Amuata si lõ ra’iõ: Edõna Yehowa ena’õ fefu za mosumange Ya’ia ba la falua mbuabua wa’a niha Keriso si lõ falimosa gafu hadia ginõtõ. (Fetero I, 2:12) Inehegõ fefu hadia ia nilauda, ba he gõi nifaluada ba zi tobini andrõ. (Heberaio 4:13) Sinangea sibai ta’erogõ wamalua fohorõ ba amuata bõ’õnia si ra’iõ moroi ba guli danõ andre.—Korindro I, 6:9-11.

4. Era’era si lõ ra’iõ: Na ta fo’õsi gera’erada faoma era’era si lõ ra’iõ ba satulõ, ba sõkhi gõi gamuatada. (Filifi 4:8) Ba hiza na da’õ manõ nibe’eda fõna duduma hõrõda ngawalõ mbuabua si ra’iõ ba mowua ia amuata si lõ sõkhi. (Mataio 15:18-20) Ena’õ ta’erogõ ngawalõ zomusomuso dõdõ guli danõ andre sana’unõi era’erada. Da ta fo’õsi gera’erada faoma era’era si si sõkhi na tafahaõ ita ba Daroma li Lowalangi.

5. Boto si lõ ra’iõ: Me ya’ira no so salahini Lowalangi, dozi niha Keriso ba sinangea la’angelamaisi mbotora ba he gõi nukhara ba zi ta’unõ. Lõ tola lõ’õ tasasai dangada na no aefa ta tibo’õ zita’unõda, ba sinangea gõi tasasai dangada fatua lõ manga ba ma tababaya gõ. Na lõ mufazõkhi naha wanibo si ta’unõ, ba tako’o ba danõ zi ta’unõ andrõ. (Moze V, 23:12, 13) Fo’amõlisi ena’õ lõ ra’iõ mboto andre, itolo ita irege arõu khõda zi mõi bõrõ wõkhõ mbotoda. Omo Niha Keriso sinangea si sõkhi fama’anõ ba ni’ehaogõ he yomo ba he baero nomo. Sabõlõ enahõi na tobali dumaduma si sõkhi nomoda ba mbanua si so ya’ita.

6. Fehede si sõkhi: Enoni Lowalangi sinangea huhuora manõ zindruhu. Solau faya tebai mõi ba Mbanua Lowalangi andrõ. (Efeso 4:25; Fama’ele’õ 21:8) Fefu niha Keriso ba tebai la oguna’õ wehede sogoro ita. Lõ omasi ira wamondrondrongo ba ma fanutunutunõ budebude hokha ba ma nidunõdunõ saila ita famondrongo. Bõrõ me lõ fao zira’iõ ba wehedera, tohude ira bõrõ me fabõ’õ ira ba nahia wohalõw̃õra, ma ba zekola ba ba gotalua zi fahatõ omo khõra.—Efeso 4:29, 31; 5:3.

Enoni Lowalangi no si tebai ra’iõ ira ba ngawalõ hadia ia

Copyright © 2008 Watch Tower Bible and Tract Society of Pennsylvania. All rights reserved.