Nifaduhusi Tõdõ ba Sito’õlõ Niha Si Lõ Mangohahau’õ Tõdõ Lowalangi

Lowalangi ba tenga si Sambuatõlu

1. Lõ fefu ni faduhusi dõdõ ba ma ni to’õlõigõ niha no si lõ sõkhi. He wa’ae simanõ lõ itehegõ Lowalangi na fefu da’õ moroi ba agamo selungu ma si lõ faudu ba wamahaõ Zura Ni’amoni’õ.—Mataio 15:6.

2. Sambuatõlu: Hadia Sambuatõlu Yehowa—Tõlu mboto ba ha samõsa Lowalangi? Tenga! Yehowa, Ama, ya’ia ba no ”Lowalangi si ha sambua ba sindruhu”. (Yohane 17:3; Mareko 12:29) Yesu ba no Ono sia’a khõ-Nia, si so barõ mbawa Lowalangi ia. (Korindro I, 11:3) Ebua Nama moroi khõ Nono. (Yohane 14:28) Eheha ni’amoni’õ ba tenga sambua boto; da’õ ba no fa’abõlõ moroi khõ Lowalangi.—Moze I, 1: 2; Halõwõ zinenge 2:18

Fanunu fandru (Natal) ba Owasa Fasa (”Easter”) no soroi ba ngawalõ agamo selungu ba gõtõ fõna

Lõ danedane ba wamosumange niha si no mate ba ma ta ata’ufi ira

3. Fanunu Fandru (Natal) ba Owasa Fasa (”Easter”): Lõ tumbu Yesu ba zi 25 mbaw̃a si Felendrua. He wa’ae lõ itõrõ sibai, tumbu ia ba zi 1 mbaw̃a si Fulu, inõtõ khõ ndra kubalo wanaro biribirira baero kandra ba zi bongi. (Luka 2: 8-12) Lõ irai i’o’ou Yesu niha Keriso ena’õ la’owasaini luo wa’atumbunia. Da’e i ni’ombakha’õnia khõ ndra nifahaõnia ena’õ la’owasaini ma lafalua wanõrõ tõdõ wa’amatenia. (Luka 22: 19, 20) Fanunu Fandru (Natal) awõ ngawalõ nito’õlõgõigõ andrõ khõnia no moroi ba zi hawa’oya ngawalõ agamo selungu da’õ ba ginõtõ me fõna. Faoma ira ngawalõ zi to’õlõ ba Gowasa Fasa, simane fangoguna’õ adulo ba ma kawelu. Niha Keriso si fõfõna ba lõ la’owasaini wanunu fandru ba ma Owasa Fasa, ba simanõ gõi niha Keriso sindruhu andrõ ba ginõtõ da’e.

4. Luo wa’atumbu: Mendrua alua wanõrõ tõdõ luo wa’atumbu si no tesura bakha ba Zura Ni’amoni’õ nifalua niha si lõ ma mosumange Yehowa. (Moze I, 40:20-22; Mareko 6:21, 22, 24-27) Niha Keriso si fõfõna ba lõ la’owasaini luo wa’atumbu. Fangowasaini luo wa’atumbu andrõ no si’oroi ba ngawalõ agamo selungu da’õ ba ginõtõ fõna. Niha Keriso sindruhu andrõ mamuala ba fao ba wa’omuso dõdõ ba ginõ’inõtõ bõ’õ bakha ba zi dõfi fa’ara.

5. Fa’ata’u ba niha si no mate: Niha si no mate ba lõ tola lalau hadia ia ba ma la’ila hadia ia. Lõ tola tatolo ira, ba lõ gõi tola lafa’ala ita. (Sinunõ 146:4; Sangombakha 9:5, 10) Mate noso; lõ noso sauri na no mate niha. (Hezekieli 18:4) Itataria ba mala’ika si lõ sõkhi andrõ, nifotõi bekhu, la’obekhu zi no mate andrõ ira. Gofu hadia ia ni to’õlõgõigõ sanandrõsa ba wa’ata’u ma ba wame’e fasumangeta ba niha si no mate ba no sifasala da’õ.—Yesaya 8:19.

6. Rõfa: Tenga ba geu niforõfa mate Yesu. Mate ia ba zi sara tõla geu, ma ba zi sara toga. Li ndrawa Heleni ni fo’eluaha ”rõfa” ba ngawalõ Zura Ni’amoni’õ tefo’eluha ia sara tõla geu. Tandra rõfa andrõ ba no si’oroi ngawalõ agamo selungu da’õ me fõna. Lõ la oguna’õ ba lõ lafosumange rõfa andrõ niha Keriso si fõfõna. Hiza, na õ’angeragõ tõdõu hadia atulõ na mu’oguna’õ rõfa ba wamosumange Lowalangi?—Moze V, 7:26; Korindro I, 10:14.

7. Tola manõ abua wondrõi ngawalõ zi no tefaduhusi tõdõ ba si no muto’õlõgõigõ andre. Ira talifusõ ba ma awõ tola manõ la’alui lala ena’õ lõ õfabõ’õni lala wamatiu. Ba hew̃a’ae simanõ fangohahau’õ tõdõ Lowalangi abõlõ moguna moroi bawangomusoi’õ tõdõ niha.—Amaedola 29:25; Mataio 10:36, 37.

Copyright © 2008 Watch Tower Bible and Tract Society of Pennsylvania. All rights reserved.