Hewisa Ena’õ Tola Falukha’õ Agamo Sindruhu andrõ?

1. Yesu zamobõrõ sambua agamo niha Keriso sindruhu. Andrõ wa ba ginõtõ da’e, sinangea wa ha sambua boto, ma ngawawa, moroi ba za mosumange si ndruhu moroi khõ Lowalangi Yehowa. (Yohane 4:23, 24; Efeso 4:4, 5) Sura Ni’amoni’õ zamahaõ wa lõ atoto zanõndra bawa gõli sise’ise andrõ saekhu ba wa’auri.—Mataio 7:13, 14.

2. Sura Ni’amoni’õ zama’ele’õ wa na no ahori mate ndra sinenge andrõ, oya wamahaõ selungu ba oya mbuabua si lõ faudu ba gamuata niha Keriso ba lõ ida’ida’i wamaogõ ya’ia ba gangowuloa niha Keriso andrõ. Ato niha ba ladõnisi dõdõ niha samati andrõ ba wolo’õ khõra moroi ba wolo’õ khõ Keriso. (Mataio 7:15, 21-23; Halõwõ zinenge 20:29, 30) Da’õ mbõrõ wa oya sibai agamo ni’ilada si fabõ’õbõ’õ sangotõi niha Keriso. Hewisa ena’õ aboto ba dõdõda niha Keriso sindruhu andrõ?

3. Tandra si tebai tobini moroi ba niha Keriso sindruhu andrõ ya’ia wa so khõra wa’omasi soroma ba gotaluara zamõsana. (Yohane 13:34, 35) Lõ tefahaõ ira ba gera’era wa ya’ira zabõlõ sõkhi moroi ba soi bõ’õ ba ma ba zifabõ’õ uli khõra. Lõ’õ gõi tefahaõ ira wamatiusa niha moroi ba soi bõ’õ. (Halõwõ zinenge 10:34, 35) Andrõ wa lõ fao ira ba wasuwõta. Niha Keriso sindruhu zamõsana ira simane talifusõ matua ba talifusõ alawe.—Yohane I, 4: 20, 21.

Niha Keriso sindruhu faoma la’omasi’õ nawõra, la’osinangegõ sibai li Zura Ni’amoni’õ, ba laturiagõ Mbanua Lowalangi

4. Tandra bõ’õ moroi ba agamo sindruhu andrõ ba ya’ia wa fefu ndroto-ndrotonia ba la’osinangegõ sibai wamondrondrongo li Zura Ni’amoni’õ andrõ. Latema ia wa Taroma li Lowalangi ba lafaduhusi tõdõ hadia niw̃a’õnia. (Yohane 17:17; Timoteo II, 3:16, 17) Ba dõdõra ba abõlõ moguna Daroma li Lowalangi moroi ba nifakhoi dõdõ ma si to’õlõ niha. (Mataio 15:1-3, 7-9) La’odõdõgõ sibai ena’õ faudu ba Zura Ni’amoni’õ lala wa’aurira ero ma’õkhõ. Andrõ wa tenga sambua ni’ombakha’õra ba aefa da’õ ba tanõ bõ’õ nifaluara.—Tito 1:15, 16.

5. Agamo sindruhu andrõ gõi ba samosumange tõi Lowalangi. (Mataio 6:9) Yesu zangombakha’õ tõi Lowalangi, Yehowa, ena’õ irege tola la’ila niha bõ’õ. Niha Keriso sindruhu andrõ sinangea gõi lafalua zimanõ. (Yohane 17:6, 26; Roma 10:13, 14) Haniha ira zi so ba mbanua si torõi ndra’ugõ zangombakha ba niha bõ’õ tõi Lowalangi andrõ?

6. Niha Keriso sindruhu sinangea laturiagõ Mbanua Lowalangi andrõ. Simanõ nilau Yesu. Lõ manõ ifamalõ wanutunõ Banua Lowalangi andrõ. (Luka 8:1) Ifatenge ndra nifahaõnia ena’õ laturiagõ duria somuso dõdõ andrõ ba zi sagõrõ uli danõ. (Mataio 24:14; 28:19, 20) Niha Keriso sindruhu andrõ faduhu dõdõra wa ha Banua Lowalangi zi tola manga’asogõ fa’atulõ ba fa’ahono si lõ mamalõmalõ ba guli danõ andre.—Sinunõ 146:3-5.

7. Dozi nifahaõ Yesu tenga moroi ba niha guli danõ si lõ sõkhi andre ira. (Yohane 17:16) Lõ sifao ira ba halõw̃õ wa’onekhe niha guli danõ ba ba wa’udusa ba nawõra niha. La’arõu’õ ira ba gamuata, ba ba mbuabua, ba gera’era si mõi famakiko ni to’õlõigõ ba guli danõ andre. (Yakobo 1:27; 4:4) Hadia aboto ba dõdõu ira zi sambua owuloa agamo ba mbanua si so ya’ugõ sangokhõgõ tandra wa’aniha Keriso sindruhu andre?

Copyright © 2008 Watch Tower Bible and Tract Society of Pennsylvania. All rights reserved.