1. Irugi da’e ba no oya õfahaõ ndra’ugõ ngawalõ zi sõkhi moroi ba Zura Ni’amoni’õ. Fa’aboto ba dõdõ da’e ena’õ sitobali fondrou’õ wangohia’õu buabua wa’aniha Keriso. (Efeso 4:22-24) Fa’aboto ba dõdõ simanõ moguna sibai ena’õ õsõndra wa’auri si lõ aetu. (Yohane 17:3) Ba hiza, moguna gõi larongo niha bõ’õ duria si sõkhi andre ena’õ tola gõi te’orifi ira. Fefu niha Keriso sindruhu lõ tola lõ’õ mõi ira wame’e famaduhu’õ ba niha bõ’õ. Da’e no oroisa Lowalangi.—Roma 10:10; Korindro I, 9:16; Timoteo I, 4:16.
2. Tola õbõrõtaigõ wangombakha ngawalõ zi sõkhi andre si no õ’ila, wondrozigõ niha sahatõ khõu. Tutunõ da’õ ba nõsi nomou, khõ zi fahuwu, khõ nawõu ba zekola, khõ nawõu wohalõw̃õ. Ena’õ sohauhau tõdõ ba sebolo tõdõ na õfalua ia. (Timoteo II, 2:24, 25) Akha itõrõ tõdõ wa asese ba ato niha abõlõ lanehegõ mbuabua zi samõsa niha moroi ba wamondrongo hadia niw̃a’õnia. Andrõ wa buabua si sõkhi zi tola mondrõnisi niha bõ’õ ba wamondrondrongo turia nifa’emau khõra.—Mataio 5:16; Fetero I, 3:1, 2, 16.
3. Ba ginõtõnia, tola sa’ae õbõrõtaigõ wangombakha si fao ndroto-ndroto gowuloa ndra Samaduhu’õ Yehowa ba zi sambua nahia. Ofanõw̃au sabõlõ moguna da’e ba wa’atedoumõ. (Mataio 24:14) Sindruhundruhu wa no sambua fa’omuso dõdõ na tola õtolo niha bõ’õ ena’õ tobali ira enoni Yehowa ba lasõndra wa’auri si lõ aetu!—Tesalonika I, 2:19, 20. |
