1. Bibel eiy an adu Gott ion ngea ouwak pumwen. Tekeiy kor deretta eran atsin tangit an auwe Etongit eoning ea ngain. Pana gata iduwen bwe dogin angogen Gott—eiy iyegen ngeiy me eken oweiyo ean. Opana gata otuwen ata nim arowonga imin ngan eo mo oten onaniet ibiboki. Ta Bibel opana gata eken am riring mo oeibiboki Gott.—Psalm 1:1-3; Jesaja 48:17, 18.
2. Murane Bibel eare eow iturit engame 40 ngabun eo tsietabo kaiya ean araquit edae 1,600 eobweni, oaweiyidan iat 1513 B.C.E. Eamamo eow ean oaran 66 dabuk kadudu. Ngabuna re eare murane Bibel enenei ura atsin turin Gott. Re eare an kamarar me deo aeora. Me Gott ianweron, me deo tamo engamen eat eb, ngea burodaut murane Bibel.—Karuworin Timotheus 3:16, 17; Karuworin Petrus 1:20, 21.
3. Gott eriring murane Bibel bwe enim emwi garen me riringen me enim eranga. Anung ebak Bibel ngana eogiten tuk eareda ea dabuk memak. Deo engame memak nan ibiboki eiyuw ia re eduw ia wo kererieiy Bibel, me wo nim eo oiya bita bwe nim duguw. Ngune tsimorum yamwen epe ean am nim gonan tsied Gott me riring an teng inimagen baruen ngabuna ro boa.—Matthaus 5:10-12; Johannes 17:3. |
