Yegen Ngune Diabolos?

1. Engok ngarene “Diabolos” ouge ian, engame ion opat iquiy ngan ebaka dogit engame ion. “Satan” ouge ian, baruon oa oboa. Ngane ngana engok oiyangin amea ngaben baruon Gott. Adamonin eiy engel ion ngea omo emeg ianweron epoa Gott. Ngaga bet imur eken okamarareiy mo ouwak an teng bwe dogin tengeiyet etaramawir ngea emwi bwe won Gott.—Matthaus 4:8-10.

2. Bitune engel, Satan, edorera Eva ean an ekeiy Schlange. Ean an pana aita iquiy, ogonat aitune bwe enim eo eraban Gott. Satan oboa bet bita eouge panen “Godaun” oa mekin ngea magit ogoda. Satan kidoeiy, oten, an Gott inan eow medenan ion ngea tsimine woun bwe an epo re nim tengeiy. Satan orean bet me eke ikido oten engame ri nan tamek me edob ea Gott. Ean riringen ngune Satan ekeiyien baruon Gott. Ngune dogin eiyin egen bwe Satan me Diabolos.—Oawit Imin 3:1-5; Job 1:8-11; Ekameata 12:9.

3. Satan quoquon derugaiy engame bwe re nim taramawireiy ngeiy. (Karuworin Korinth 11:3, 14) Medenan ion quiaoeiy engame ea etaramawir deo iduwen. Tsinia etaramawir kererieiy iquiy bwe dogin Gott, iduwen in kor ar riring an teng Satan. (Johannes 8:44) Engame ngabuna rat etaramawir opwer ri nan ouge me teng tuebon ngana re taramawireiy Gott iduwen. Me ekeow bwe re riring an teng Satan. Eiy kor “Gott in ebune.”—Karuworin Korinth 4:4.

Etaramawir ngan opwer, anit ani me an mwit edogor derugaiy engame

4.  Anit ani eiy bet ion medenan Satan oreat engame bwe re nim mek iyongin oaeioun. Ro gona emwemwin anin bwe enim ranga ura, me nim omamedo me oturaiy ibun; me pat imin ngan inan meta imur oa riring imin kamadauning. Satan eiy nge eoaeio iruwit imin ngan eriring. Tsinia am oeiboki Gott, am eo bet bwabwiyi imin ia aigetow me riring imin ngana won anit ani.—Garagauweiet Edogor 18:10-12; Makur 19:18, 19.

5. Satan derugaiy bet engame eow ean an ngabeda egagoda me taramawireiyet an epo edogor. Ibun ro ouge bwe eben bwiora me edogor me ngamen ro omo eken ea ibun. Me deo bet iduwen ngune. (Makur 10:34, 35) Engame ibun ro aea deideit edogor man epo edogor bwe re nim aia ia ro gonan ekeow aura keiyeiya. Eow ean riringen ngune, reo tengeiyin monibain Gott. Ta kor ngune medenan ekeowen ata keiyeya.—Daniel 2:44.

Keo a Satan ean ogoroen me kererieiyen angogen Jehova

6. Medenan bet Satan ion derugaiy engame eow ean an ored ura eow eat iteng riring idura. Jehova opana gata bwam keo a tsinit riringet idura dogin bwe tsiet ngana ri nan oturaiy gata. (Galatia 6:7, 8) Engame ibun ri nan tengeiyuw ia wo nim edegeri ura me riring mungane imin. Omaran, ngana, eiy kor Satan ngea tengeiyuw bwe wo nim riring mungane imin.—Adamonin Korinth 6:9, 10; 15:33.

7. Satan gona bet ouwenon omamedoem oa boa em bwe enim gonaw bwe wo nim erowi Jehova. Ibun inimagen ngabuna wa auwe ro gona ia ri nan egirow aw bwe dogin am kererieiy Bibel. Ibun ro gona eke awe bwait ederi. Me ea yegen ngea wo ow eiy tsimorum atsin iturin? Satan teng bwe enim omiowuw bwe wo nim weiyo me eo kererieiy angogen Jehova. Wo nim eo oiya Satan ia enim doganigae! (Matthaus 10:34-39; Adamonin Petrus 5:8, 9) Ean ata keo a Diabolos, ang gonan oeiboki Jehova mo pan mo omeata ngan ang oeweiyo oaeio bwe dogin gagonadon monibain me raitsitsin.—Enogen Man 27:11.

Copyright © 2006 Watch Tower Bible and Tract Society of Pennsylvania. All rights reserved.