Eken Ngune Monibain Gott?

1. Ngago tuk eat eb, Jesu owereri amebuna dangon bwe re nim dedaro bwe dogin monibain Gott. Emoniba eiy edogor ngea tubwin eiy Uea. Monibain Gott eiy edogor ion ngea ekae. Oweijoratow ianweron me nan moniba ea bitune eb. Inan otota, oa inan riring egen Gott bwe nim ebwigaga. Mi nan ouga an teng Gott bwe enim riring aen eow eat eb tekeiy riringetow ianweron.—Matthaus 6:9, 10.

2. Gott oduwen ngana Jesu nan ekeiy Uean Monibain ngeiy. (Lukas 1:30-33) Ngag Jesu tuk eat eb, eiy oduwen ngana nan eiy engame ngea omo, emwi, me amen imwit engok. Ngag redodawen ianweron, eo ta ngagan ekeiy Uean Monibain Gott. (Ebraer 10:12, 13) Ian 1914 Jehova oiya Jesu eoaeio ion ngea ogiten oduwen a. Ean ngaga, Jesu monibain ianweron tekeiy an Jehova iyiy bwe enim eiy Uea.—Daniel 7:13, 14.

3. Jehova iyiy bet ibun ngabun edabweduwora eman me an atsin eat eb bwe re nim rogaw ianweron. Ri nan moniba epoa Jesu tekeiy ura Uea, amen mwit engok, priester dogit epon engame. (Lukas 22:28-30; Ekameata 5:9, 10) Jesu emwemwin bet amebuna amen moniba ian monibain bwe “epo kadudu.” Ebak-ura 144,000.—Lukas 12:32; Ekameata 14:1-3.

4. Ean ngaga Jesu eiyien Uea, oraijeduen Satan me an engel ngabun baka atsin ianweron me oraijeduen ura eadu eat eb memak. Ngune ngea dogin, an anung baka imin ine eat eb atsin ean 1914. (Ekameata 12:9, 12) Eake, emedoquan, earak, an kaneda ibaka mungane ura memak “iteman” ngana Jesu megidan ian Monibain me bitune edae tuken kor ian magit ibum.—Matthaus 24:3, 7, 8, 12; Lukas 21:10, 11; Karuworin Timotheus 3:1-5.

5. Iat epar Jesu nan mwit angoget engame, me oekae ura tekeiy ia oekae schafe me bocke. Me “schafe” ura ngabuna re nan oduwen ngaga ura an ngame ngabun edob. Ri nan ogok itsimor eko dogin eat eb. Me “bocke” ura ngabuna ri nan eo tengeiy Monibain Gott. (Matthaus 25:31-34, 46) Eat edae imur turen, Jesu nan oekeow ura memak ngabuna re tsietabo bocke. (Karuworin Thessalonika 1:6-9) Tsinia wo teng ekauwe ion inimagen won Jesu “schafe” wo nim kaiyot angogen Monibain Gott me makur ean mungana wo-giten kererieiy.—Matthaus 24:14.

Yongin monibain Jesu nan ekeow memak egaiyien oa ekekae

6. Ngage eb o baeowen eow eat eb ngan ebak. Ion o ion tsimine won dogor. Mungane eb edae inon re akake bet ea ura. Me Monibain Gott nan ngejubwin memak edogor wot engame. Nan eow tekeiy aiquet edogor eat eb memak. (Daniel 2:44) Mi nan ekeow eake, idura, me ibabaka. Engame memak ri nan epodan mek iat iow me ekewin.—Micha 4:3, 4.

7. Ean an moniba Jesu dogin 1,000 eobweni engame ngabuna dobweduwora ri nan omo, me eb memak ri nan eiyin paradis. Ean magit 1,000 eobweni, Jesu nan ogiten riring imin memak ngana Gott ogiten kongot tsinin bwe enim riring. Me inan oredoana etongin Monibain. (Adamonin Korinth 15:24) Ada wo eo pana dangom me ngabuna wo auwe angogen eken Monibain Gott inan riring?

Copyright © 2006 Watch Tower Bible and Tract Society of Pennsylvania. All rights reserved.