Itueb me Ear Ngana eo Oeiboki Gott

Gott deo eiy Aiyimen Ian

1. Deo memak itueb me egade ebaka. Me Gott eo epo burioun ea ura ia ro ngaun atsin eat etaramawir pwer oa ro boa an kereri Bibel.—Matthaus 15:6.

2. Aiquen ian Aiyimen: Ed Jehova eiy aiquen ian aiyimen—aiyimet engame ian aiquen Gott? Ekeow! Jehova ngea etongin aiy, “aiquet erak ngea iduwen.” (Johannes 17:3; Markus 12:29) Jesu eiy bowabin ngain, me ijon ken ea Gott. (Adamonin Korinth 11:3) Etongin gaganado eken ea ngain. (Johannes 14:28) Anin ebwigaga deo eiy engame; eiy kor oaioun Gott.—Oawit Imin 1:2; Makur 2:18.

Kristmas me Irieda ngaun atsin eat etaramawir opwer

Eko dogin ia wo nim taramawireiy ngabun eman oa miow ura

3. Kristmas me Irieda: Jesu eo pudu eat December 25 Opudu iwiwun kaiya ian October 1 edae eobweni ia ngaga amen ranga schafe ro oreit itamek ange me obereiy wangara epowin schafe anubumwin. (Lukas 2:8-12) Jesu eo bet pana amet taramawir ia re nim karamwen eiy an bumin pudu. Ta ngana opana ran an kereri bwe re nim omaran an ima. (Lukas 22:19, 20) Kristmas me egadein ngaun atsin eat etaramawir opwer bwain emewak. Ta tsietaboa bet deideit Irieda me earin, tekeiy ngane ouwenonet epetomo me erabits. Amebuna adamonit Kristians re eo karamwen eiy Kristmas oa Irieda ouga bet ngabuna Kristians iduwen ngage.

4. Ibumin Pudu: Karamwen eiyiet ibumin pudu aro (2) epatow eow ian Bibel eogok eow ituret engame ngabuna re eo taramawireiy Jehova. (Oawit Imin 40:20-22; Markus 6:21, 22, 24-27) Amebuna adamonit Kristians re eo karamwen eiy ibumin pudu. Egadein karamweneiyiet ibumin pudu ngaun atsin eat etaramawir pwer ngago emewak. Kristians iduwen re totow eadu me ogok edae omo me epoda eat edae inon eat eobweni eaeowaeow.

5. Miowen Ngabun Ema: Ngabun ema re eo gonan riring tamo imin oa nimon tamo imin. Ang eo gona buok ura, me re eo gona bet oturaiy gata. (Psalm 146:4; Ecclesiastes 9:5, 10) Itsimor ngea ima, eab tamek me tsimor iruwet ima. (Hesekiel 18:4) Me engel ibun ebaka, egora anin mwarere edae inon re eke ura engame ngabun eman. Tamo ear ngan nan towe bwe dogit imiow oa taramawireiyet engame ngabun eman pwer kor.—Jesaja 8:19.

6. Ekaibar: Jesu eo ma eow eat ekaibar. Ema eow eat edabwike oa ijor. Ian engokin Greek geidet ekaibar iat Bibel ebak ouge ta kor dabwike emaen. Itema bwe dogit ekaibar ngaun atsin eat etaramawir opwer emewak. Ekaibar eo ouwenot oa eke etaramawir turit adamonit Kristians. Ngagan, ed ia wo kamarareiy emwi ia enim ouwenot ekaibar iat etaramawir?—Garagauweiet Edogor 7:26; Adamonin Korinth 10:14.

7. Ogona bet oaio ia wo nim bwiriow inon mungane itueb me ear. Amen bwiom me dangom ro gona quoquon bwe re nim eneneiyuw bwe wo nim eo ewid am tueb. Me oeibibokieiyen Gott ogoganado eken ea oeibibokieyet engame.—Enogen Man 29:25; Matthaus 10:36, 37.

Copyright © 2006 Watch Tower Bible and Tract Society of Pennsylvania. All rights reserved.