 |
Beliefs | Future | Medical | Topics | Contact Us | Publications | Languages |
Enda nto
AKAMBO wa mɛtɛ wendana la na? Akambo wa mɛtɛ wendana la ambola amɔtshi woleki ohomba wayaoka anto. Ondo wɛ lawɔ amboyaokaka ambola wa ngasɔ wele oko wanɛ:
Lende ayoyoyanga ekadimwelo wa ambola anɛ na? Naka wɛ ntshɔ lo waa bibliɔtɛkɛ, kete wɛ ayokoka tana nunu di’abuku watawɔ ɔnɛ vɔ kokaka kadimola ambola anɛ. Koko mbala efula, abuku asɔ hawɔtɔnɛ lam’asawɔ. Amɔtshi mɛnamaka dia wekɔ l’awui wa mɛtɛ kam’atondjamawɔ, koko yema tshitshɛ l’ɔkɔngɔ vɔ ndjêtaka loowe ndo anto ndjotshikitanyaka awui wa lɔkɔ kana ndjahɛnyaka la abuku akina.
Koko, ekɔ dibuku dimɔtshi diele la ekadimwelo wa shikaa. Diɔ diekɔ dibuku di’akambo wa mɛtɛ. Yeso akate lo dɔmbɛlɔ dimɔtshi diakandalɔmbɛ Nzambi ate: ‘Ɔtɛkɛta ayɛ wekɔ mɛtɛ.’ (Joani 17:17) Ɛlɔ kɛnɛ, sho mbelɛka Ɔtɛkɛta ɔsɔ ɔnɛ Bible k’Ekila. Lo ndjɛkɛ yayela, wɛ ayokondja lo tshena pe, ekadimwelo w’oma lo Bible wokɛma hwe ndo wa mɛtɛ lo ambola wa la diko ango.
ƆKƆKƆ WONYIYAMA DIMBOLA NƐ: Tekɔ lo nsɛna lo andja wambolola tɔ l’awui w’esehe ndo l’akambo wa kɔlɔ. Ɛtɛmwɛlɔ efula mbetshaka ɔnɛ Nzambi mbalanga dia sho monga l’asui.
KƐNƐ KETSHA BIBLE: Nzambi bu pondjo kiɔkɔ y’akambo wa kɔlɔ. Jɔbɔ akate ate: “Dia ntsha kolo, eko etali uma le [Nzambi], dia munganela mbuka eko etali uma le Kanga-Wulu-Tshe.” Nzambi ekɔ la sangwelo dioludi la ngandji lo dikambo di’anto. Diakɔ diakatetsha Yeso dia sho nɔmbaka ɔnɛ: “Shesu le l’ulungu, . . . diulelu diaye diayi. Lulangu laye latshami la kete uku atshamalo l’ulungu.” (Mateu 6:9, 10) Nzambi ndjakiyanyaka efula dikambo diaso woho wele nde salaka tshɛ dia kotsha sangwelo diande.—Joani 3:16.
Enda nto Etatelu 1:26-28; Jakoba 1:13; ndo 1 Petero 5:6, 7.
ƆKƆKƆ WONYIYAMA DIMBOLA NƐ: Ata wekɔ lo tetemala ndjaka lofulo l’anto laheyama mbadia. Sho tshɛ diɛnɛka l’asui wasoya anto.
KƐNƐ KETSHA BIBLE: Nzambi akatewoyisha etena kayondodja wɔladi lo nkɛtɛ k’otondo. Lo ɛlɔmbwɛlɔ ka Diolelo diande, anto “haweka akambu wa ta ntu.” Koko, vɔ “wayutshula tombo tawo kungu.” (Isaya 2:4) Nzambi ayokomiya akambo wa kɔlɔ tshɛ ndo asui. Bible ndakaka ɔnɛ: “[Nzambi] ayukitula asoi tshe lu ashu awo; nyoi hayuyala ntu, delu hadiuyala ntu, kuyanga ndjawi, kuyanga kandji. Akambu wa ntundu wambushila.”—Enyelo 21:3, 4.
Enda nto Osambu 37:10, 11; 46:9; ndo Mika 4:1-4.
ƆKƆKƆ WONYIYAMA DIMBOLA NƐ: Ɛtɛmwɛlɔ efula wa lo andja ɔnɛ mbetshaka ɔnɛ ɛngɔ kɛmɔtshi kele lo demba di’onto tetemalaka la nsɛna l’ɔkɔngɔ wa nyɔi. Amɔtshi mbetawɔka ɔnɛ wavɔ kokaka salɛ wasɛna kɔlɔ kana ɔnɛ Nzambi mbishaka anto wa kɔlɔ dilanya lo mbadja lo ifɛrnɔ.
KƐNƐ KETSHA BIBLE: Etena kavɔ anto, vɔ hawɔsɛnɛ nto. Undaki 9:5 mbutaka ɔnɛ: “Wavo haweyi nduku dikambu.” Lam’ele wavɔ hawokoke mbeya kana mboka oseka dikambo tshɛ, vɔ hawokoke salɛ wasɛna kɔlɔ kana mbâkimanyiya.—Osambu 146:3, 4.
Enda nto Etatelu 3:19 ndo Undaki 9:6, 10.
ƆKƆKƆ WONYIYAMA DIMBOLA NƐ: Sho kombolaka nsɛna ndo ngɛnangɛna la lɔsɛnɔ kâmɛ la wakiso wa ngandji. Kema kɔlɔ sho kombola la nsaki ka wolo dia mɛnana nto la wakiso wa ngandji wakavu.
KƐNƐ KETSHA BIBLE: Efula ka wanɛ wakavu wayolwama. Yeso akalake ɔnɛ ‘wanɛ wele lo waombo wa eohwelo wayotomba.’ (Joani 5:28, 29) Lo ndjela sangwelo diaki Nzambi di’etatelo, wanɛ wayolwama wayonga la diɛsɛ dia nsɛna lo paradiso ka la nkɛtɛ. (Luka 23:43) Nshi yayaye yakalakema shɔ mendanaka nto la yônge ya demba ya kokele ndo la lɔsɛnɔ la pondjo layokondja anto w’okitanyiya. Bible mbutaka ɔnɛ: “Antu w’ololo wayukita kete, wayudjaseka loko pundju.”—Osambu 37:29.
Enda nto Jobo 14:14, 15; Luka 7:11-17; ndo Etsha 24:15.
ƆKƆKƆ WONYIYAMA DIMBOLA NƐ: Anto wa l’ɛtɛmwɛlɔ suke la tshɛ nɔmbaka. Koko efula mɛnaka dia alɔmbɛlɔ awɔ hawokadimɔma.
KƐNƐ KETSHA BIBLE: Yeso akatetsha dia mbewɔ dia kalolaka lo ɛtɛkɛta akɔ wâmɛ mbala tshɛ lo alɔmbɛlɔ aso. Nde akate ate: “Lam’ayunyolomba, tanyufudiaki aui w’anyanya lu alombelo anyu.” (Mateu 6:7) Naka sho nangaka dia Nzambi mpokamɛ alɔmbɛlɔ aso, kete sho pombaka nɔmbaka lo yoho yetawɔnde. Dia sala dui sɔ, sho pombaka mbeya lolango laki Nzambi ndo nɔmbaka lo yoho yɔtɔnɛ la lɔ. Joani ya ntondo 5:14 nembetshiyaka ɔnɛ: “Naka shu tayolomba engo uku lulangu landi, ndi ayutukela.”
Enda nto Osambu 65:2; Joani 14:6, 14; ndo 1 Joani 3:22.
ƆKƆKƆ WONYIYAMA DIMBOLA NƐ: Anto efula fɔnyaka dia falanga, lokumu ndo demba di’olangala mbayowasha ɔngɛnɔngɛnɔ. Diakɔ diawesawɔ akambo asɔ, koko vɔ ndjɛnaka dia vɔ bu la ɔngɛnɔngɛnɔ.
KƐNƐ KETSHA BIBLE: Yeso akɛnya woho wakokaso monga la ɔngɛnɔngɛnɔ etena kakandate ate: ‘Ɔngɛnɔngɛnɔ wayale le wanɛ weya ehomba awɔ wa lo nyuma.’ (Mateu 5:3) Dia kondja ɔngɛnɔngɛnɔ wa mɛtɛ, paka sho takola wanya wahombama dia kotsha ohomba aso woleki woke, mbuta ate ndjala k’akambo wa mɛtɛ wa lo nyuma wendana la Nzambi ndo sangwelo diande lo dikambo diaso. Akambo wa mɛtɛ asɔ tanemaka lo Bible. Mbeya akambo wa mɛtɛ asɔ kokaka tokimanyiya dia sho shihodia kɛnɛ kele mɛtɛ ohomba ndo kɛnɛ kele bu ohomba. Naka sho mbetawɔ dia akambo wa mɛtɛ wa lo Bible nɔmbɔla tɛdikɔ ndo etsha aso, kete tayonga la lɔsɛnɔ lele la oyango.—Luka 11:28.
Enda nto Tukedi 3:5, 6, 13-18 ndo 1 Timote 6:9, 10.
Tambɔsɛdingola lo tshena pe ekadimwelo washa Bible lo ambola asamalo. Onde wɛ nangaka nyomeya akambo akina lâdiko dia lâsɔ? Naka ndo wɛ mbele l’atei wa wanɛ ‘weya ehomba awɔ wa lo nyuma,’ kete aha la tâmu wɛ nangaka. Wɛ mbeyaka nyomoyaoka ambola akina oko wanɛ: ‘Naka Nzambi tokanɛka, lande na kamondotshika dia akambo wa kɔlɔ ndo asui ndjala lo edja tshɛ k’ɔkɔndɔ w’ana w’anto? Ngande wakokami ndowanya lɔsɛnɔ la nkumbo kami?’ Bible mbishaka ekadimwelo w’eshika lo ambola anɛ ndo lo akina efula.
Koko, ɛlɔ kɛnɛ anto efula mengengaka dia mbadia Bible. Vɔ kiɔsaka oko dibuku diele l’awui efula diele mbala mɔtshi wolo dishihodia. Onde wɛ nangaka kondja ekimanyielo dia mbishola ekadimwelo lo Bible? Ɛmɛnyi wa Jehowa wekɔ la dihomɔ dihende diakoka kokimanyiya.
Ntondotondo, dibuku Bible etshatɔ mɛtɛ? diakalɔngɔswama dia kimanyiya anto wele la elimu efula dia sɛdingola ekadimwelo wa hwe washa Bible lo ambola w’ohomba asɔ. Ehomɔ ka hende ele ekongelo k’ofele ka wekelo wa Bible wa la ngelo. Aha la futa falanga, Ɔmɛnyi ɔmɔtshi wa Jehowa wosukanyi la yɛ wele la yewo ya mbetsha Bible kokaka ndja lakayɛ kana lo dihole dikina dialangayɛ ndo mbetshaka la yɛ yema ya wenya lomingu tshɛ woho wa nyu mbeka Bible. Miliyɔ y’anto lo andja w’otondo wambokondja wahɔ oma lo ekongelo kɛsɔ. Efula ka l’atei awɔ wambokoma lo mbuta ɔnɛ: “Lamboshola akambo wa mɛtɛ!”
Ndoko ɛngɔ k’oshinga wolo kakokaso mbishola oleki akambo wa mɛtɛ. Akambo wa mɛtɛ wa lo Bible totshungolaka oma lo dikanyiyakanyiya, lofunge ndo wɔma w’anyanya. Vɔ toshaka elongamelo, oyango ndo ɔngɛnɔngɛnɔ. Yeso akate ate: ‘Nyu nyayeya akambo wa mɛtɛ, ko akambo wa mɛtɛ wayonyotshungola.’—Joani 8:32.
Akatondjama lo 2008 |
 |