Woho Wakokayɛ Mbeya Kɛnɛ Kakɔlɔmba Nzambi

1. Bible ekɔ losha l’ohomba efula l’oma le Nzambi. Tɔ kekɔ oko mukanda wofunde ombutshi wa ngandji anande. Tɔ totɛka mɛtɛ kendana la Nzambi, woho w’onto wende ndo woho wɛnande akambo. Tɔ nembetshiyaka woho wakokaso ndɔshana l’ekakatanu wa lo lɔsɛnɔ ndo woho wa kondja ɔngɛnɔngɛnɔ wa mɛtɛ. Bible twamɛ totɛka kɛnɛ kahombaso ntsha dia ngɛnyangɛnya Nzambi.—Osambu 1:1-3; Isaya 48:17, 18.

2. Bible kakafundama oma le anto oko 40. Olimu ɔsɔ wakatatɛ oma l’ɔnɔnyi 1513 N.T.D., ndo wakashile l’ɔkɔngɔ w’ɛnɔnyi ndekana 1 600. Tɔ kengama la tobukubuku 66. Wanɛ wakafunde Bible wakasokoyama oma le Nzambi. Tokanyi tande mbakawafunde, koko aha takiwɔ hita. Ɔnkɔnɛ, Nzambi ka l’olongo mbele Kiɔkɔ ya Bible, koko aha anto.—2 Timote 3:16, 17; 2 Petero 1:20, 21.

3. Nzambi akasale woho wa Bible sangɔma ndo mombama dimɛna. Tɔ mbele dibuku diamboleka fundama l’andja w’otondo. Aha onto tshɛ mbayokenda la sso di’ɔlɔlɔ lam’eyɛ lo mbeka Bible, koko dikambo sɔ diatokoshimbake dia wɛ tetemala. Dia wɛ kondja lɔsɛnɔ la pondjo, wɛ pombaka mbeka dia mbeya Nzambi ndo sala lolango lande oyadi ɔlɔshamelo akɔna wayokokomɛ.—Mateu 5:10-12; Joani 17:3.

Copyright © 2008 Watch Tower Bible and Tract Society of Pennsylvania. All rights reserved.