Ele Yeso Kristo?

1. Yeso akasɛnaka l’olongo oko onto la lo nyuma la ntondo ka nde ndja la nkɛtɛ. Oko wende etongami ka ntondo kaki Nzambi, nde mbelamɛka ɔnɛ: Ɔna ‘enondo’ laki Nzambi. (Kolosai 1:15; Enyelo 3:14) Yeso mbele tshɔi y’Ɔna yakatonge Nzambi ndamɛ. La ntondo ka nde ndjôtɔ oko onto, Yeso aki ‘okambi wa kɔmba’ wele Jehowa akakambe la nde dia ntonga diangɔ dikina tshɛ dia l’olongo ndo dia la nkɛtɛ. (Tukedi 8:22-31; Kolosai 1:16, 17) Nzambi akakambe la nde nto oko yɛmb’awui Yande yoleki woke. Diɔ diakɔ dielamɛ Yeso ɔnɛ: “Diui.”—Joani 1:1-3; Enyelo 19:13.

2. Nzambi akatome Ɔnande lanɛ la nkɛtɛ lo sangola lɔsɛnɔ lande ko lidja l’otema waki Mariya. Omalɔkɔ, Yeso kombotɔ oma l’ekimanyielo k’ombutshi wa pami w’onto. Diɔ diakɔ diakinde kompowɔ pɛkato la demba diele kema kokele. Nzambi akatome Yeso la nkɛtɛ lo ɛkɔkɔ esato ɛnɛ: (1) Dia tolakanya akambo wa mɛtɛ wendana la Nzambi (Joani 18:37), (2) dia nama kɔlamelo ya kokele woho wa tosha ɛnyɛlɔ ka sho ndjela (1 Petero 2:21), ndo (3) dia nambola lɔsɛnɔ lande woho wa totshungola oma lo pɛkato la nyɔi. Lande na kaki dikambo sɔ ohomba?—Mateu 20:28.

3. Lo pindola ɔlɛmbɛ wa Nzambi, Adama, onto la ntondo, akasale dikambo dielɛ Bible ɔnɛ: “Pɛkato.” Ɔnkɔnɛ, Nzambi akôfundɛ nyɔi. (Etatelo 3:17-19, NW) Lam’ele nde kokotshaka nto kɛnɛ kakalɔmbaka Nzambi, nde kondjala nto kokele. Yema yema nde akatatɛ tshunda osombe ko ndjovɔ. Adama akasambiya anande tshɛ pɛkato. Diɔ diakɔ diatshundaso esombe ndo diavɔso. Ngande wakoka anto kondja panda na?—Romo 3:23; 5:12.

4. Yeso aki onto la kokele oko Adama. Koko otshikitanyi la Adama, Yeso akakitanyiyaka Nzambi l’akambo tshɛ, oyadi l’atei w’ehemba wa wolo efula. Diakɔ diakandakoke nambola lɔsɛnɔ lande l’onto la kokele dia nemanya la pɛkato kakasale Adama. Olambo akɔ mbelɛ Bible ɔnɛ “tshungo.” Oma lo dikambo sɔ mbakakoke ana w’Adama tshungɔ oma lo nyɔi kakawâfundɛ. Wanɛ tshɛ wele la mbetawɔ le Yeso koka dimanyiema pɛkato yawɔ ko kondja lɔsɛnɔ la pondjo.—1 Timɔtɛ 2:5, 6, NW; Joani 3:16; Romo 5:18, 19.

Lam’akandakambaka olimu ande Yeso aketshaka anto, akasalaka ahindo, ndo akalambola lɔsɛnɔ lande l’ɔtɛ aso

5. Lam’akinde la nkɛtɛ, Yeso akakɔnɔla ɛkɔnyi, akalesha wanɛ waki la ndjala, ndo akɔ̂ladia mpɛpɛ ya wolo. Nde akôlola koyanga edo. Dikambo kona diakandasalaka ahindo na? (1) Nde akokaka amɛnyi fɔnu kɛtshi ndo akalangaka mbakimanyiya. (2) Ahindo ande wakɛnyaka ɔnɛ: nde aki Ɔna Nzambi. (3) Ahindo akɔ wakɛnyaka kɛnɛ kayondoyosalɛ akanga w’okitanyiya lam’ayondolɛ oko Nkumekanga lâdiko dia nkɛtɛ k’otondo.—Mateu 14:14; Mako 2:10-12; Joani 5:28, 29.

6. Yeso akavu, koko Nzambi akawolola oko etongami ka lo nyuma, ko nde akakalola l’olongo. (1 Petero 3:18) Oma k’etena kɛsɔ, Nzambi akawodje Nkumekanga. Kem’edja nto, Yeso ayonya akambo wa kɔlɔ tshɛ ndo asui oma la nkɛtɛ kɛnɛ.—Osambu 37:9-11; Tukedi 2:21, 22.

Copyright © 2008 Watch Tower Bible and Tract Society of Pennsylvania. All rights reserved.