Ele Diabolo?

1. Tshɛkɛta “diabolo” nembetshiyaka onto lahindɛ onto ɔmɔtshi awui wa kashi dia mbotshɛ kɔlɔ. Tshɛkɛta “Satana” nembetshiyaka otunyi kana ɔndɔshi. Yɔ mbɔtɔnɛka l’otunyi waki Nzambi wa woke efula. L’etatelo nde aki ondjelo wa kokele wakasɛnaka la Nzambi l’olongo. Koko l’ɔkɔngɔ diko, nde akayoyâkana efula ko akayokombolaka di’anto mbɔtɛmɔla ko tete le, Nzambi oto mbasungana tɛmɔma.—Mateu 4:8-10.

2. Ondjelo ɔsɔ, Satana, akasawola la Eva lo tshimbo y’olui. Oma l’awui wa kashi wakandawotɛ, nde akôkonya lo pindolɛ Nzambi. Ngasɔ mbakɔnyɔla Satana kɛnɛ kelɛwɔ ɔnɛ: “lowandji” la Nzambi, mbut’ate dihole diande dia Nkum’olongo. Satana akadje tâmu ɔnɛ Nzambi halɔmbɔla anto dimɛna ndo nde akadime anto Ande ɛngɔ kɛmɔtshi k’ɔlɔlɔ. Satana akate nto ɔnɛ ndooko onto layotshikala la kɔlamelo otsha le Nzambi. Lo sala ngasɔ Satana akayakonya ndamɛ otunyi wa Nzambi. Diakɔ diakandayelamɛka ɔnɛ: Satana Diabolo.—Etatelu 3:1-5; Jobo 1:8-11; Enyelo 12:9.

3. Oma lo lokeso lande, Satana nangaka tshutshuya anto dia vɔ mbɔtɛmɔla. (2 Koreto 11:3, 14) Yoho mɔtshi yakesande anto ele oma l’ɔtɛmwɛlɔ wa kashi. Naka ɔtɛmwɛlɔ ɔmɔtshi mbetshaka anto awui wa kashi lo dikambo dia Nzambi, kete mɛtɛ lolango laki Satana mbasalawɔ. (Joani 8:44) Ase ɛtɛmwɛlɔ wa kashi fɔnyaka ɔnɛ Nzambi ka mɛtɛ mbatɛmɔlawɔ. Tete le, mɛtɛ Satana mbatɛmɔlawɔ. Nde kele ‘nzambi k’andja ɔnɛ.’—2 Koreto 4:4.

Ɛtɛmwɛlɔ wa kashi la w’ɛdiɛngɛ, ndo ngandji k’otamanya ka wodja kesaka anto

4. Ɔtɛmwɛlɔ w’ɛdiɛngɛ ekɔ yoho kina yakamba la Satana dia mbahemɛka anto. Amɔtshi kokaka mbelɛ ɛdiɛngɛ dia mbâkokɛ, dia vɔ salɛ anto akina kɔlɔ, dia vɔ mbuta awui wahataye, kana dia vɔ sala ahindo. Satana mbele nkudu ka kɔlɔ kashama l’edia ka ditshelo sɔ tshɛ. Dia ngɛnyangɛnya Nzambi, sho la dia kakitɔna l’awui wɔtɔnɛ l’ɔtɛmwɛlɔ w’ɛdiɛngɛ.—Euhwelu k’Elembe 18:10-12; Etsha 19:18, 19.

5. Satana kesaka anto nto lo mbatshutshuya dia vɔ ndjâkana dikambo dia lokoho lawɔ la demba ndo dia vɔ tɛmɔla ɛlɔngɔswamelo wa pɔlitikɛ. Anto amɔtshi fɔnyaka ɔnɛ wodja awɔ ndeka ekina ndo lokoho lawɔ la demba ndeka l’anto akina. Tete le, ɔsɔ ekɔ kashi. (Etsha 10:34, 35) Anto akina mendɛka le ɛlɔngɔswamelo wa pɔlitikɛ ɔnɛ vɔ mbahomba shidiya ekakatanu w’anto. Lo fɔnya ngasɔ, vɔ mbokaka Diolelo diaki Nzambi ɔkɔngɔ, ko tete le diɔ to mbayokandola ekakatanu aso.—Danyele 2:44.

Hangakalɛ Satana lo tetemala la mbeka dia mbeya Jehowa

6. Satana kambaka nto la nsaki ya kɔlɔ dia kesa anto. Jehowa totɛka dia sho mbewɔ ditshelo dia kɔlɔ nɛ dia nde mbeyaka ɔnɛ diɔ koka tosalɛ kɔlɔ. (Ngalatiya 6:7, 8) Ondo anto amɔtshi koka kotɛ dia wɛ ndjakimɔ lo ditshelo dia kɔlɔ oko vɔ. Koko ohɔ dia, mɛtɛ Satana mbalanga dia wɛ sala awui asɔ.—1 Koreto 6:9, 10; 15:33.

7. Satana koka kamba la ɔhɛnyɔhɛnyɔ kana la ɔlɔshanelo dia wɛ mbɛkɔ Jehowa. Anto amɔtshi wokayɛ ngandji koka komalɛ efula ɔnɛ: lêngole wɛ kêka Bible. Akina mbeyaka kɔ̂la kana kɔsɔka. Ko alangayɛ ngɛnyangɛnya? Akɔna ele kiɔkɔ ya lɔsɛnɔ layɛ na? Satana kombolaka kokiya wɔma dia wɛ tshika mbeka awui waki Jehowa. Tetawɔke dia Satana kodja otshumba! (Mateu 10:34-39; 1 Petero 5:8, 9) Naka wɛ ayohangakalɛ Diabolo, kete wɛ ayɔngɛnyangɛnya Jehowa ndo ayɛnya ɔnɛ wɛ sukɛka lowandji Lande.—Tukedi 27:11.

Copyright © 2012 Watch Tower Bible and Tract Society of Pennsylvania. All rights reserved.