Yasukanya le Nzambi lo Dɔmbɛlɔ

1. Dɔmbɛlɔ kɛdikɛdi sawola la Nzambi la ndjakitshakitsha tshɛ. Wɛ la dia nɔmbaka Nzambi mbala la mbala. Ngasɔ mbayondokoma ɔngɛnyi ayɛ wa mamba. Kânga mbende onto la woke efula ndo kanga nkudu k’efula, Jehowa mpokamɛka alɔmbɛlɔ aso! Onde wɛ nɔmbaka Nzambi mbala la mbala?—Osambu 65:2; 1 Tesalonika 5:17.

2. Dɔmbɛlɔ diekɔ etenyi kɛmɔtshi k’ɔtɛmwɛlɔ aso. Ɔnkɔnɛ, sho pombaka nɔmbaka paka Jehowa Nzambi ndamɛ oto. Lam’aki Yeso la nkɛtɛ, nde akalɔmbaka She nshi tshɛ, koko aha onto okina. Sho pombaka tshaka ngasɔ. (Mateu 4:10; 6:9) Koko alɔmbɛlɔ aso tshɛ pombaka salemaka lo lokombo la Yeso. Ngasɔ mbayotɛnyaka ɔnɛ sho nɛnyaka dihole dia Yeso ndo ɔnɛ tekɔ la mbetawɔ l’olambo ande w’etshungwelo.—Joani 14:6; 1 Joani 2:1, 2.

3. Lam’alɔmbaso, sho pombaka mbutɛ Nzambi awui w’oma k’ɛs’otema. Tatotake alɔmbɛlɔ wakatakimɛ tsho l’ɛtɛ aso kana mbadia alɔmbɛlɔ akɔ lâdia oma lo dibuku dimɔtshi di’alɔmbɛlɔ. (Mateu 6:7, 8) Sho kokaka nɔmba lo kiongamu tshɛ yele la dilɛmiɛlɔ, lo wenya tshɛ, ndo l’ahole tshɛ. Nzambi kokaka mboka kânga alɔmbɛlɔ wataso l’otema. (1 Samuele 1:12, 13) Ekɔ ɔlɔlɔ nyanga hiole yanganyi l’anto akina dia sho sala alɔmbɛlɔ aso shamɛ.—Mako 1:35.

4. Akambo akɔna wakokayɛ nɔmba Nzambi? Dikambo tshɛ diendana la diokanelo diasayɛ la nde. (Filipi 4:6, 7) Dɔmbɛlɔ di’ɛnyɛlɔ mɛnyaka ɔnɛ sho pombaka nɔmbaka lo dikambo dia lokombo la Jehowa ndo dia sangwelo diande. Sho kokaka nɔmba nto dikambo di’ehomba aso wa l’emunyi, di’edimanyielo ka pɛkato yaso ndo dia kondja ekimanyielo ka shika ekolo la ntondo k’ohemba. (Mateu 6:9-13) Sho la dia nɔmbaka ndo lo dikambo di’anto akina. Sho la dia nɔmbaka paka diangɔ diɔtɔnɛ la lolango la Nzambi.—1 Joani 5:14.

5. Wɛ kokaka nɔmba etena tshɛ kakosokoya otema ayɛ dia mboka Jehowa losaka kana dia mbotombola. (1 Ekondo 29:10-13) Wɛ la dia nɔmba etena keyɛ l’ekakatanu ndo kambɔtɔ mbetawɔ kayɛ l’ohemba. (Osambu 55:22; 120:1) Ekɔ dimɛna nɔmba la ntondo ka ndɛ. (Mateu 14:19) Jehowa tokeketshaka dia sho nɔmbaka lo “tena tshe.”—Efeso 6:18.

6. Sho la dia nɔmba djekoleko naka tambosala pɛkato ka woke. L’etena kɛsɔ, sho la dia nɔmba Jehowa dia nde tôka kɛtshi ndo todimanyiya. Naka sho mbisholɛ Nzambi pɛkato yaso, ndo sala la wolo di’aha ndjisala nto, kete Nde ‘ayetawɔ todimanyiya.’—Osambu 86:5; Tukedi 28:13.

7. Jehowa mpokamɛka paka alɔmbɛlɔ w’akanga a losembwe. Dia Nzambi mboka alɔmbɛlɔ ayɛ, wɛ la dia sala la wolo dia nsɛnaka lo ndjela ɛlɛmbɛ ande. (Tukedi 15:29; 28:9) Wɛ pombaka monga la ndjakitshakitsha lam’alɔmbayɛ. (Luka 18:9-14) Wɛ pombaka sala la wolo tshɛ dia ndjaɔtɔnganyiya la kɛnɛ kalɔmbayɛ. Ngasɔ, mbayoyɛnya ɔnɛ wɛ ekɔ la mbetawɔ ndo wɛ mpotɔka kɛnɛ kalɔmbayɛ. Paka wɛ mbosadi ngasɔ ko Jehowa kadimola alɔmbɛlɔ ayɛ.—Heberu 11:6.

Copyright © 2008 Watch Tower Bible and Tract Society of Pennsylvania. All rights reserved.