Ekambi wa Nzambi Pombaka Ndjâla Pudipudi

1. Jehowa Nzambi ekɔ pudipudi ndo ekila. Nde nongamɛka di’ekambi ande ndjâlaka pudipudi—lo nyuma, lo lɔkɛwɔ, lo yimba, ndo lo demba. (1 Petero 1:16) Pombaka mbidja welo efula dia ndjâla pudipudi lo washo wa Nzambi. Tekɔ lo sɛna l’andja wa mindo. Tekɔ lo ndɔshana ndo la nsaki yaso hita yatotshutshuya dia sala akambo wa kɔlɔ. Koko, tatohekɔke.

2. Pudipudi ka lo Nyuma: Naka sho kombolaka kambɛ Jehowa, kete hatohombe tetemala ndjela wetshelo kana mbekelo tshɛ ya l’ɛtɛmwɛlɔ wa kashi. Sho pombaka tomba oma l’ɛtɛmwɛlɔ wa kashi ndo aha mbasukɛ kânga lo yoho yakɔna tshɛ. (2 Koreto 6:14-18; Enyelo 18:4) Kam’ekaso mɛtɛ kendana la Nzambi, sho la dia ndjâlama ɔlɔlɔ di’aha kesama oma le anto wetsha akambo wa kashi.—2 Joani 10, 11.

3. Pudipudi ka lo Lɔkɛwɔ: Jehowa nangaka di’ekambi ande ndjalɔmbɔlaka nshi tshɛ oko Akristo wa mɛtɛ. (1 Petero 2:12) Nde mɛnaka awui tshɛ wasalaso, oyadi lo woshɛshɛ. (Heberu 4:13) Sho pombaka mbewɔ awui wa mindo wa dieyanelo, kâmɛ ndo ditshelo dikina dia mindo dia l’andja ɔnɛ.—1 Koreto 6:9-11.

4. Pudipudi ka lo Yimba: Naka sho ndodja yimba yaso la tokanyi ta pudipudi, kete lɔkɛwɔ laso layoyala pudipudi. (Filipi 4:8) Koko, naka sho kanyiyaka awui wa mindo, kete tayonga la ditshelo dia kɔlɔ. (Mateu 15:18-20) Sho pombaka mbewɔ weho wa filmɛ kana dienenda diakoka nanya timba taso. Sho kokaka ndodja timba taso la tokanyi ta pudipudi lo mbekaka Ɔtɛkɛta wa Nzambi.

5. Pudipudi ka lo Demba: Lam’ele vɔ wekɔ atomami wa Nzambi, Akristo pombaka namaka alemba awɔ l’ahɔndɔ awɔ pudipudi. Sho pombaka solaka anya lam’atombaso oma lo komba, la ntondo ka ndɛ diangɔ ndo la ntondo ka toka mma kana ka munanda ɛngɔ ka ndɛ. Naka wɛ kema la komba kele l’ɛlɔnda w’amɛna wakɛdia mindo ya lo komba, kete wɛ pombaka kifɛka. (Euhwelu k’Elembe 23:12, 13) Pudipudi ka lo demba kimanyiyaka onto dia monga la demba dia dimɛna. Luudu l’Okristo pombaka ndjâla pudipudi ndo kɔmba oyadi l’etei kana l’andja. Lɔ pombaka ndjâla ɛnyɛlɔ k’ɔlɔlɔ le anto akina.

6. Ɛtɛkɛta wa Pudipudi: Ekambi wa Nzambi pombaka mbutaka mɛtɛ keto nshi tshɛ. Akanga wa kashi hawotɔtɔ lo Diolelo diaki Nzambi. (Efeso 4:25; Enyelo 21:8) Akristo hawotondja ɛtɛkɛta wa kɔlɔ oma l’enyɔ awɔ. Vɔ hawohokamɛ ndo hawosanya asawo kana ɛkɔndɔ wa mindo. Oma l’ɛtɛkɛta awɔ wa pudipudi, vɔ ndjatshikitanyaka l’anto akina la kalasa, l’elimu, kana lo tenyi dia ngelo diodjashiwɔ.—Efeso 4:29, 31; 5:3.

Ekambi wa Nzambi pombaka ndjâla pudipudi l’akambo tshɛ

Copyright © 2008 Watch Tower Bible and Tract Society of Pennsylvania. All rights reserved.