Ditshelo Diahetsha Nzambi

1. Ekambi wa Nzambi nangaka kɛnɛ kele ɔlɔlɔ. Koko, vɔ pombaka nto mbeka dia mpetsha kɛnɛ kele kɔlɔ. (Osambu 97:10) Kɛdikɛdi vɔ pombaka mbewɔ ditshelo diahetsha Nzambi. Naa ditshelo dimɔtshi l’atei adiɔ na?

2. Monanyi: Dieyanelo dia la ntondo ka tshuki, loseka, dieyanelo dia la nyama, dieyanelo dia lam’asa wanɛ wotɔ, ndo dieyanelo dia lam’asa pami la pami, akambo asɔ tshɛ wekɔ pɛkato ya mamba le Nzambi. (Akambu w’Asi Lewi 18:6; Romo 1:26, 27; 1 Koreto 6:9, 10) Naka anto ahende hawotshukanyi koko wadjasɛkɔ kâmɛ, kete vɔ la dia kakitɔna kana tshukana lo ndjela ɛlɛmbɛ wa lɛɛta.—Heberu 13:4.

Nzambi mpetshaka wodjwelo wa wanu, wovi, tɔkɛnyɔ ta falanga, l’akambo wa ngala

3. Kashi, Tɔkɛnyɔ ta falanga, Wovi: Jehowa Nzambi hakoke mbuta kashi. (Tito 1:2) Anto walanga mbetawɔma le nde la dia mbewɔ kashi. (Tukedi 6:16-19; Kolosai 3:9, 10) Lokaki lekɔ lo weho tshɛ wa tɔkɛnyɔ ta falanga. Diakɔ diele Akristo hawɔkɛnya weho tshɛ wa tɔkɛnyɔ ta falanga, ɛnyɛlɔ oko lɔtɛri, tɔmbɔla, ɔsɛmanelo wa lowango la falasa, la longanda la falanga. (Efeso 5:3-5) Ndo, Akristo hawove. Hawosombe ɛngɔ keyawɔ ɔnɛ ka lova kana mbɔsa ɛngɔ kakana aha la dikimɔ.—Etumbelu 20:15; Efeso 4:28.

4. Nkɛlɛ ka Tshambandeko, Akambo wa Ngala: Nkɛlɛ ka tshambandeko kokaka konya onto l’awui wa ngala. (Etatelu 4:5-8) Kanga ngala hakoke ndjâla ɔngɛnyi wa Nzambi. (Osambu 11:5; Tukedi 22:24, 25) Ekɔ kɔlɔ sɔmbɔya kana kaloya kɔlɔ lo kɔlɔ lam’atondjɛ anto akina.—Tukedi 24:29; Romo 12:17-21.

5. Ɔtɛndɛlɔ w’Asombo la Ɔtɛmwɛlɔ w’ɛdiɛngɛ: Anto amɔtshi tɛndɛ̂ka ɛdiɛngɛ dia vɔ kondja wolo wa kɔnɔya anto hemɔ. Anto akina tɔtshaka atunyi awɔ dia mbâtatsha hemɔ kana mbâdiaka. Satana mbatshutshuya anto dia ndjakimɔ lo ditshelo sɔ tshɛ. Diakɔ diahahombe Akristo ndjakimɔ lo ditshelo sɔ tshɛ. (Euhwelu k’Elembe 18:9-13) Wanɛ wayanga dia tosenga kana todja etshii hawotondoyaki pondjo, naka sho ndjâsukanya le Jehowa.—Tukedi 18:10.

6. Wodjwelo wa Wanu: Kema kɔlɔ nnɔ yema ya vinyɔ, biɛlɛ, kana alɔfu akina wa wolo. (Osambu 104:15; 1 Timote 5:23) Koko wodjwelo wa wanu kana ɔnwɛlɔ wa tshambandeko ekɔ kɔlɔ lo washo wa Nzambi. (1 Koreto 5:11-13; 1 Timote 3:8) Nnɔ wanu lo tshambandeko mbeyaka fukutanya yonge yayɛ ndo kohandjolɛ nkumbo. Dui sɔ kokaka kokonya esadi eto dia wɛ nkɔ l’ehemba ekina.—Tukedi 23:20, 21, 29-35.

7. Anto watsha awui wele kɔlɔ lo washo wa Nzambi ‘hawotokita Diolelo diaki Nzambi.’ (Ngalatiya 5:19-21) Naka mɛtɛ wɛ mbokaka Nzambi ngandji ndo nangaka mbɔngɛnyangɛnya, kete wɛ ayotondoya dia mboka ditshelo dia ngasɔ ɔkɔngɔ. (1 Joani 5:3) Eka dia wɛ mpetsha kɛnɛ kele kɔlɔ lo washo wa Nzambi. (Romo 12:9) Okanaka l’anto wele la mbekelo yangɛnyangɛnya Nzambi. (Tukedi 13:20) Diokanelo dia l’Akristo wambotshunda mbeyaka ndjâla kiɔkɔ y’ekimanyielo le yɛ. (Jakoba 5:14) Lâdiko di’akambo asɔ tshɛ, yaɛkɛ l’ekimanyielo ka Nzambi kakokayɛ kondja oma lo dɔmbɛlɔ.—Filipi 4:6, 7, 13.

Copyright © 2008 Watch Tower Bible and Tract Society of Pennsylvania. All rights reserved.