Wetshelo la Mbekelo Yatona Nzambi - Adrɛsɛ wa l’Ɛtɛrnɛtɛ wa Ɛmɛnyi wa Jehowa

Adrɛsɛ wa l’Ɛtɛrnɛtɛ wa Ɛmɛnyi wa Jehowa

Beliefs

Future

Kakɔna Katɔlɔmba Nzambi?

Wekelo 11

Wetshelo la Mbekelo Yatona Nzambi
	Woho akɔna wa wetshelo la mbekelo yele kɔlɔ? (1)
	Onde Akristo pombaka mbetawɔ wetshelo w’ɔnɛ Nzambi ekɔ Losato l’Osanto? (2)
	Lande na kahasale Akristo wa mɛtɛ difɛstɔ dia Nɔɛlɛ, Pasaka, kana dia lushi l’eotwelo na? (3, 4)
	Onde anto wambovɔ kokaka salɛ wanɛ wasɛna kɔlɔ? (5)
	Onde Yeso akavu lo kurusɛ? (6)
	Onde ekɔ mɛtɛ ohomba ngɛnyangɛnya Nzambi? (7)

Nzambi kema Losato l’Osanto

1. Aha wetshelo tshɛ la mbekelo tshɛ mbele kɔlɔ. Koko Nzambi hetawɔ wetshelo la mbekelo y’oma l’ɛtɛmwɛlɔ wa kashi kana yahɔtɔnɛ la kɛnɛ kata Bible.—Mateu 15:6.

2. Losato l’Osanto: Onde Jehowa ekɔ Losato l’Osanto—Nzambi ɔtɔi etondo esato? Kema! Jehowa, Shɛso, ekɔ “Nzambi ɔtɔi ka mɛtɛ.” (Joani 17:3, NW; Mako 12:29) Yeso ekɔ Ɔnande l’enondo, ndo nde kitanyiyaka awui wa Nzambi. (1 Koreto 11:3) Papa ndeka Ɔna. (Joani 14:28) Nyuma k’ekila kema onto; tɔ kekɔ wolo wa Nzambi wakamba olimu.—Etatelu 1:2; Etsha 2:18.

Afɛstɔ wa Nɔɛlɛ la Pasaka ndja oma l’ɛtɛmwɛlɔ wa kashi w’edjedja

Sho kema ndooko l’ɔkɔkɔ ɔmɔtshi wa tɛmɔla anto wambovɔ kana mbaoka wɔma

3. Nɔɛlɛ la Pasaka: Yeso kombotɔ Ngɔndɔ ka Dikumi l’Ahende 25. Nde akotɔ oya lo Ngɔndɔ ka Dikumi 1, l’etena ka l’ɔnɔnyi katohotoyaka elami w’ɛkɔkɔ l’ɛkɔkɔ awɔ l’andja l’otsho. (Luka 2:8-12) Ndooko lushi lakalɔmbɛ Yeso Akristo dia sala fɛtɛ k’eotwelo kande. Koko, nde akatɛ ambeki ande dia vɔ mbohɔka lushi la nyɔi kande. (Luka 22:19, 20) Difɛstɔ dia Nɔɛlɛ la mbekelo yadiɔ tshɛ ndja oma l’ɛtɛmwɛlɔ wa kashi w’edjedja. Woho akɔ wâmɛ mbediɔ ndo lo kɛnɛ kendana la mbekelo ya Pasaka, ɛnyɛlɔ oko okambelo wa la ekele ndo l’etomba. Akristo wa ntondo kosalaka difɛstɔ dia Nɔɛlɛ kana dia Pasaka, ndo Akristo wa mɛtɛ wa nshi nyɛ hawosale afɛstɔ akɔ.

4. Afɛstɔ wa Nshi y’Eotwelo: Afɛstɔ ahende wa nshi y’eotwelo watɛkɛtama lo Bible wakasalema oma l’anto waki kɔtɛmɔlaka Jehowa. (Etatelu 40:20-22; Mako 6:21, 22, 24-27) Akristo wa ntondo kosalaka fɛtɛ ya nshi ya eotwelo. Mbekelo ya salaka fɛtɛ ya nshi ya eotwelo yakaye oma l’ɛtɛmwɛlɔ wa kashi w’edjedja. Akristo wa mɛtɛ mbishanaka weshasha ndo ngɛnangɛnaka kâmɛ lo tena dikina tshɛ dia l’ɔnɔnyi.

5. Wɔma w’Anto Wambovɔ: Anto wambovɔ hawokoke sala ndoko dui ndo haweye ndooko ɛngɔ. Sho hatokoke mbakimanyiya, ndo vɔ hawokoke tosalɛ kɔlɔ. (Osambu 146:4; Undaki 9:5, 10) Anima mvɔka, ndo hawotetemala la sɛna l’ɔkɔngɔ wa nyɔi. (Ezekiyele 18:4) Koko mbala mɔtshi, andjelo wa kɔlɔ welɛwɔ ɔnɛ ɛdiɛngɛ ndjasɛmaka ɔnɛ vɔ mbele ekishi w’anto wambovɔ. Mbekelo tshɛ yendana la mboka anto wambovɔ wɔma kana mbatɛmɔla yekɔ kɔlɔ.—Isaya 8:19.

6. Kurusɛ: Yeso komvɔ lo kurusɛ. Nde akavu l’otamba kana l’ekundji kosembwe. Tshɛkɛta ya lo Grɛkɛ yokadimwami ɔnɛ “kurusɛ” lo Bible efula nembetshiyaka etenyi ɔtɔi k’otamba. Djembetelo ya kurusɛ ndja oma l’ɛtɛmwɛlɔ wa kashi w’edjedja. Akristo wa ntondo kokambaka la kurusɛ kana kitɛmɔla. Ko lâsɔ, wɛ fɔnyaka ɔnɛ ekɔ ɔlɔlɔ sho kamba olimu la kurusɛ dia tɛmɔla Nzambi oka?—Euhwelu k’Elembe 7:26; 1 Koreto 10:14.

7. Mbeyaka monga wolo efula dia kakitɔna la wetshelo ndo la mbekelo mɔtshi ya ngasɔ. Ewotɔ ayɛ l’angɛnyi ayɛ mbeyaka kotshutshuya di’aha wɛ mangana la wetshelo wokoyêtawɔka. Koko, kɛnɛ koleki ohomba ele ngɛnyangɛnya Nzambi koko aha anto.—Tukedi 29:25; Mateu 10:36, 37.

Akatondjama lo 1996
Copyright © 2008 Watch Tower Bible and Tract Society of Pennsylvania. All rights reserved.