Ngande Wakokayɛ Mbishola Ɔtɛmwɛlɔ wa Mɛtɛ?

1. Kristo akahɔhɔla ɔtɛmwɛlɔ ɔtɔi oto wa mɛtɛ w’Akristo. Lâsɔ ɛlɔ kɛnɛ, sho pombaka monga paka la demba kana olui ɔtɔi w’atɛmɔdi wa mɛtɛ waki Jehowa Nzambi. (Joani 4:23, 24; Efeso 4:4, 5) Bible mbetshaka ɔnɛ paka anto yema tshitshɛ tsho mbele lo mboka ka tshitshɛ katɔla otsha lo lɔsɛnɔ.—Mateu 7:13, 14.

2. Bible akewoya ɔnɛ l’ɔkɔngɔ wa nyɔi k’apɔstɔlɔ, wetshelo wa kashi ndo ditshelo di’apanganu diayoyɔsɔsɔmɛ yema yema l’atei w’etshumanelo k’Akristo. Anto amɔtshi wayotshutshuya ambetawudi dia vɔ mbayela lo dihole dia vɔ ndjela Kristo. (Mateu 7:15, 21-23; Etsha 20:29, 30) Diɔ diakɔ diɛnaso ɛtɛmwɛlɔ efula wayata ɔnɛ Kristo mbayelawɔ. Ngande wakokaso mbeya Akristo wa mɛtɛ na?

3. Djembetelo ya woke efula yeyama Akristo wa mɛtɛ yɔ nyɛ: vɔ mbokanaka ngandji ka mɛtɛ lam’asawɔ. (Joani 13:34, 35) Vɔ hawetshama dia monga la tokanyi t’ɔnɛ vɔ ndeka anto wele la nkoho y’alemba yotshikitanyi la wɔ kana anto wa lo dibila dikina. Hawowaetsha dia mpetsha anto wa lo wedja ekina. (Etsha 10:34, 35) Omalɔkɔ, vɔ hawɔtɔ l’ata. Akristo wa mɛtɛ mbɔsanaka oko anto l’ɔnango.—1 Joani 4:20, 21.

Akristo wa mɛtɛ mbokanaka ngandji, mbɔsaka Bible la nɛmɔ, ndo sambishaka awui wendana la Diolelo diaki Nzambi

4. Djembetelo kina y’ɔtɛmwɛlɔ wa mɛtɛ yɔ nyɛ: anto wa lɔkɔ mbɔsaka Bible la nɛmɔ di’efula. Vɔ kietawɔka oko Ɔtɛkɛta wa Nzambi ndo mbetawɔka kɛnɛ katatɔ. (Joani 17:17; 2 Timote 3:16, 17) Le wɔ, Ɔtɛkɛta wa Nzambi ndeka tokanyi ndo mbekelo y’anto ohomba. (Mateu 15:1-3, 7-9) Lo lɔsɛnɔ lawɔ la lushi la lushi, vɔ salaka tshɛ dia kitanyiyaka kɛnɛ kata Bible. Omalɔkɔ, vɔ kema dungi pende, koko kɛnɛ kasambishawɔ mbasalawɔ.—Tito 1:15, 16.

5. Ɔtɛmwɛlɔ wa mɛtɛ pombaka nto nɛmiya lokombo la Nzambi. (Mateu 6:9) Yeso akeyanyaka lokombo la Nzambi, Jehowa, le anto akina. Akristo wa mɛtɛ la dia sala woho akɔ wâmɛ. (Joani 17:6, 26; Romo 10:13, 14) Naa anto wa lo ngelo kanyu wasala di’anto akina mbeya lokombo la Nzambi na?

6. Akristo wa mɛtɛ pombaka sambisha awui wendana la Diolelo diaki Nzambi. Yeso akasale ngasɔ. Nde akatatɛkɛtaka dikambo dia Diolelo nshi tshɛ. (Luka 8:1) Nde akadjangɛ ambeki ande dia vɔ sambisha losango lakɔ lâmɛ lɔsɔ lo nkɛtɛ k’otondo. (Mateu 24:14; 28:19, 20) Akristo wa mɛtɛ mbetawɔka ɔnɛ paka Diolelo diaki Nzambi to mbayela wɔladi wa mɛtɛ la lotui tshitshi la nkɛtɛ kɛnɛ.—Osambu 146:3-5.

7. Ambeki wa Yeso hawohombe ndjadja l’akambo wa l’andja wa kɔlɔ ɔnɛ. (Joani 17:16) Vɔ hawoyatambiya l’akambo wa pɔlitikɛ ya l’andja ɔnɛ ndo l’ɛlɔshanyelo w’atshunda w’anto. Vɔ mbewɔka lɔkɛwɔ la kɔlɔ, ditshelo, ndo mbekelo ya kɔlɔ yambodiangana l’andja ɔnɛ. (Jakoba 1:27; 4:4) Onde wɛ kokaka mbishola ɔtɛmwɛlɔ ɔmɔtshi wa lo ngelo kanyu wele la tolembetelo tɔsɔ ta Lokristo la mɛtɛ?

Copyright © 2008 Watch Tower Bible and Tract Society of Pennsylvania. All rights reserved.