Woho Wɔlɔngɔswami Ɛmɛnyi wa Jehowa - Adrɛsɛ wa l’Ɛtɛrnɛtɛ wa Ɛmɛnyi wa Jehowa

Adrɛsɛ wa l’Ɛtɛrnɛtɛ wa Ɛmɛnyi wa Jehowa

Beliefs

Future

Kakɔna Katɔlɔmba Nzambi?

Wekelo 14

Woho Wɔlɔngɔswami Ɛmɛnyi wa Jehowa
	Etena kakɔna kakatatɛ tshunda di’Ɛmɛnyi wa Jehowa dia nshi nyɛ na? (1)
	Ngande walɔmbwama nsanganya y’Ɛmɛnyi wa Jehowa? (2)
	Oma lende atomba falanga yasalawɔ elimu? (3)
	Akɔna alɔmbɔla etshumanelo l’etshumanelo? (4)
	Nsanganya yakɔna ya weke yasalema ɔnɔnyi tshɛ? (5)
	Olimu akɔna wakambema lo mbalasa kawɔ ka woke ka l’andja w’otondo ndo lo wa filialɛ? (6)

1. Tshunda di’Ɛmɛnyi wa Jehowa dia nshi nyɛ diakatatɛ l’ɛnɔnyi 1870. Ntondotondo, vɔ wakelamɛka ɔnɛ Ambeki wa Bible. Koko lo 1931, wakayɔsaka lokombo la l’Afundelo la Ɛmɛnyi wa Jehowa. (Isaya 43:10) L’etatelo, ɔlɔngɔswamelo waki l’anto yema tshitshɛ, koko ɛlɔ kɛnɛ vɔ waya la miliyɔ y’Ɛmɛnyi wasambisha l’ohetoheto tshɛ lo wedja ndekana 230.

2. Tshumanelo efula di’Ɛmɛnyi wa Jehowa nsanganaka mbala shato lo lomingu. Vɔ wambokelɛ dia wɛ mbɔtɔ lo nsanganya yakɔ shɔ. (Heberu 10:24, 25) Wetshelo washama lo nsanganya shɔ tomba oma lo Bible. Nsanganya tatɛka ndo komɛka la dɔmbɛlɔ. Lo nsanganya suke la tshɛ, vɔ membaka ‘esambo wa lo nyuma’ l’otema ɔtɔi. (Efeso 5:18, 19) Hawɔlɔmbɛ onto falanga dia nde mbɔtɔ ndo hawɔkɔngɔla ɛkɔngɔ.—Mateu 10:8.

3. Tshumanelo efula salaka nsanganya yawɔ lo Mbalasa ka Diolelo. Tɔ kekɔ luudu laha kawotake lakakama oma le Ɛmɛnyi wakayakimɔ la lolango lawɔ vamɛ. Wɛ hɛnaki pondjo mpingu kana alɛdi, kurusɛ kana weho ekina wa diangɔ diɔfɔnyi ladiɔ lo Mbalasa ka Diolelo. Weshasha wakimɔ anto la lolango lawɔ mbakimanyiya di’elimu ɛsɔ salema. Le wanɛ walanga kimɔ weshasha akɔ, tɔshɛtɛshɛtɛ tendana la weshasha tanemaka lɛkɔ.—2 Koreto 9:7.

4. Etshumanelo tshɛ kekɔ la dikumanyi, diele diɔ mbelamɛka nto ɔnɛ: emendji. Vɔ mbele l’ɔkɛndɛ wa nɔmbɔla wetshelo lo tshumanelo. (1 Timote 3:1-7; 5:17) Ekambi w’elimu mbakimanyiyaka. (1 Timote 3:8-10, 12, 13) Anto asɔ hawoleki anto akina wa l’etshumanelo. (2 Koreto 1:24) Vɔ kema la mpɛtɛ mɔtshi ya lânde. (Mateu 23:8-10) Vɔ hawɔlɔtɛ ahɔndɔ wotshikitanyi l’anto akina. Vɔ kema la difuto lo dikambo di’olimu wakambawɔ. La lolango tshɛ, dikumanyi salaka dia kotsha ehomba wa lo nyuma w’etshumanelo. Vɔ keketshaka ndo mbishaka alako naka dikambo dimɔtshi diambotomba.—Jakoba 5:14-16; 1 Petero 5:2, 3.

5. Ɛmɛnyi wa Jehowa nɔngɔsɔlaka nto nsanganya ya weke ɔnɔnyi tshɛ. Tshumanelo efula tosanganaka lo tena sɔ dia ndjela ekongelo ka lânde ka wetshelo w’oma lo Bible. Batismu k’ambeki w’eyoyo tanemaka l’atei w’ekongelo ka losanganya lakɔ mbala tshɛ.—Mateu 3:13-17; 28:19, 20.

6. Mbalasa ka woke kalɔmbɔla elimu w’Ɛmɛnyi wa Jehowa wa l’andja w’otondo kekɔ la New York. Lɛkɔ mbatanema ndo Olui-Walɔmbɔla, mbut’ate djui ya dikumanyi diambohokɔ olimu dienda etshumanelo k’andja w’otondo. Ndo nto, filialɛ ndekana 100 yekɔ l’andja w’otondo. L’ahole asɔ, wanɛ wayakimɔ la lolango mbishaka lonya dia funda kana toma ekanda wendana la Bible lo bɛkɛ la bɛkɛ. Oma l’ahole asɔ mbalɔmbwama nto olimu w’esambishelo. Lande na kahayɔsɛ yɛdikɔ ya ntshɔ la tenda filialɛ kosukanyi layɛ na?

Akatondjama lo 1996
Copyright © 2008 Watch Tower Bible and Tract Society of Pennsylvania. All rights reserved.