1. Polo ndo kakianɛ, wɛ ambeka akambo efula w’amɛna oma lo Bible. Ewo kɛsɔ la dia kosokoya dia wɛ kɛnɛmɔla lonto l’Okristo. (Efeso 4:22-24) Ewo kɛsɔ kekɔ ohomba dia wɛ kondja lɔsɛnɔ la pondjo. (Joani 17:3) Koko, anto akina wekɔ l’ohomba wa mboka lokumu l’ɔlɔlɔ woho wa ndo vɔ lawɔ kondja panda. Akristo tshɛ wa mɛtɛ pombaka sambisha anto akina. Ɔsɔ ekɔ didjango diaki Nzambi.—Romo 10:10; 1 Koreto 9:16; 1 Timote 4:16.
2. Wɛ kokaka tatɛ sambisha lo mbewoya asukanyi ayɛ awui w’ɛlɔlɔ weyɛ lo mbeka. Tɛ̂ nkumbo kayɛ, angɛnyi ayɛ, anyayɛ wa la kalasa, la anyayɛ wakamba la yɛ awui w’ɛlɔlɔ weyɛ lo mbeka. Onga onto ɔlɔlɔ ndo la lotutsha lam’awatɛyɛ awui akɔ asɔ. (2 Timote 2:24, 25) Ohɔ dia anto sɛdingolaka lɔkɛwɔ l’onto oleki ɛtɛkɛta ande. Omalɔkɔ, lɔkɛwɔ layɛ l’ɔlɔlɔ mbeyaka kotola anto akina dia vɔ nonga losango lawatɛyɛ.—Mateu 5:16; 1 Petero 3:1, 2, 16.
3. L’edjedja ka wonya, wɛ ayokotsha awui walɔmbama dia tatɛ sambisha l’ase etshumanelo k’Ɛmɛnyi wa Jehowa ka lo ngelo kanyu. Ɔsɔ ekɔ nna di’ohomba efula lo ehamelo kayɛ. (Mateu 24:14) Ande ɔngɛnɔngɛnɔ wayonga la yɛ lam’ayoyokoka kimanyiya onto okina dia nde lawɔ koma okambi wa Jehowa ndo ndjokondja lɔsɛnɔ la pondjo lee!—1 Tesalonika 2:19, 20. |
