Fan joŋ mai Masəŋ mo syiŋ ɓo - Za Syedowal Jehowa : Cok lwaa Gɓəzah Pa byak cokke matə wat pə Internet.

Za Syedowal Jehowa : Cok lwaa Gɓəzah Pa byak cokke matə wat pə Internet.

Beliefs

Future

Fan mai Masəŋ mo tə byak gin wo mana

Leesoŋ 10

Fan joŋ mai Masəŋ mo syiŋ ɓo
	Na foo ɓə fẽe tə fan joŋ mai mo ka pel Masəŋ pəsãh ya ne ? (1)
	Zahban joŋ ɓəə camcam kərəne. (2)
	Dəɓ Kristu mor foo ɓə fẽe tə ɓə gwah ber ne ? (3) Tə ɓə kyẽm ma joŋ ne lak solai ne ? (3) kiŋ nyin ne ? (3) bai zyii syee mor ɓə lai ne ? (4) tə ɓə joŋ kəndaŋne ne ? (5) tə ɓə təə ne yim ne ? (6)
	Za joŋ ɗii ka sob joŋ faɓe’ ne ? (7)

1. Za yeɓ Masəŋ a ’yahra joŋ fan masãhe. Ara mor syiŋ ɓəɓe’ ta (Ləŋni 97:10). Bə mai ’yah faa we sob joŋ fan mai Masəŋ mo syiŋ ɓo ɓoo. Fan joŋ mai Masəŋ mo syiŋ ɓo ko fẽene ?

2. Joŋ təkoi : Swan ne ŋwəəre wala ne za wəəre kəpel kanki, joŋ ɓəəre, swan ne faballe, swan ne zahzumɓo, dəwor ma joŋ ɓəə ne dəwor ki təgbana za moo swan ne ŋwəəre, fan joŋ mai daŋ maɓea’ lii yo pel Masəŋ (Lewitien 18:6 ; Romanen 1:26, 27 ; 1 Korintien 6:9, 10). Dəwor ne mawin ah mo kanra ki ɓo bai joŋ ɗerewol kan ki ɓe, ara mor woŋ ki, wala ara mor ga pel za luu sər ka joŋ ɗerewol kan ki ɓəəra. — Yahuduen 13:4.

Masəŋ syiŋ təə ne yimmi, kiŋ nyinni, kyẽm ma joŋ ne lak solai so ne bai zyii syee mor ɓə lai ɓo syiŋ.

3. Gwah ɓerre, kyẽm ma joŋ ne lak solai, kiŋ nyinni : Jehowa Masəŋ ka gwah ber a (Titus 1:2). Ka ako mo ’yah na ɓe, na sob gwah ber ɓoo (Ɓə Kikiŋ 6:16-19 ; Kolosien 3:9, 10). Fan cwaa a pə kyẽm ma joŋ ne lak solai pəlli. Mor ah za Kristu ka joŋra kyẽm ma joŋ ne lak solai təgbana in cahcah, lii zah madul pərri wala loto ya (Efesien 5:3-5). Za Kristu ka kiŋra nyin ya ta. Ka leera fan mai mo təəra ɓo fan kiŋkiŋ yo ya, so ka baŋra fan dəɓ bai fii zah pah ah ya ta. — Pəə Za Israel 20:15 ; Efesien 4:28.

4. Baŋ kpã ne bai zyii syee mor ɓə lai : Mo syii cak suu ɓo zah kpã ya ɓe, kpã kəə mo ciŋ dəɓ ma bai zyii syee mor ɓə lai (Tən Mor Fanne 4:5-8). Dəɓ ma joŋ kpã lii ka gak yea bai sãh Masəŋ ya (Ləŋni 11:5 ; Ɓə Kikiŋ 22:24, 25). Ka pəsãh mor faŋ val ya so we soo dəb ma joŋ ɓəɓe’ wo bii ne ɓəɓe’ ta ka. — Ɓə Kikiŋ 24:29 ; Romanen 12:17-21.

5. Kyeɓ mor dəɓ ne syiŋrĩ ne joŋ kəndaŋne : Za ki no a ɗiira cok syiŋ ka mo lab syem ɓəəra. Za maki ah a kyebra mor za syiŋ ɓəə ka mo lwaara syem ne wulli. Satan ye pa swah fan joŋ marai daŋ, ako ye uu ɓo fahfal ahe. Za Kristu ka mor juura fan marai ya syaŋsyaŋ (Cuu Ɓe Laini 18:9-13). Koo za mo tə kyebra mor ɓii ne syiŋ laŋ, cok muŋ suu ɓii ako ye yea gwari ne Jehowa. — Ɓə Kikiŋ 18:10.

6. Təə ne yimmi : Faɓe’ ye ka zwan yim tə ɓiŋ təgbana vin, bière wala yim zook ki camcam ya (Ləŋni 104:15 ; 1 Timoteus 5:23). Təə ne argué, ne yimmi ka pəsãh pel Masəŋ ya, faɓe’ yo (1 Korintien 5:11-13 ; 1 Timoteus 3:8). We tə zwan yim pəlli təə ne ɓe, zwan yim lii ga joŋ syem ne we so a ɓeɓ kal piicel ɓii ta. Zwan yim lii kəə we joŋ faɓe’ ki gwari ta. — Ɓə Kikiŋ 23:20, 21, 29-35.

7. Za ma joŋra fan maɓea’ ah pel Masəŋ daŋ “ ka ga rera goŋ Masəŋ ya ”. (Galatien 5:19-21.) We tə ’yah Masəŋ goŋga goŋga ɓe so we tə kyeɓ ka joŋ ’yah ah ɓe, we gak sob joŋ fan marai ɓoo no (1 Yohana 5:3). We fee tan fan mai mo ka pəsãh pel Masəŋ ya (Romanen 12:9). We syee ne za mai fan joŋ ɓəə moo’ nyah suu Masəŋ (Ɓə Kikiŋ 13:20). We gak lwaa gbah jol wo za mai mo swaara ɓo pə ɓə Kristu (Yakuɓ 5:14). Kal daŋ ah, we fii Masəŋ ne cok juu pel ɓii ka mo gbah ko jol ɓiiri. — Filipien 4:6, 7, 13.

Ŋwəə bo ne 1999
Copyright © 2006 Watch Tower Bible and Tract Society of Pennsylvania. All rights reserved.