Bə lai matə ɓə cee ne ɓə syimmi - Za Syedowal Jehowa : Cok lwaa Gɓəzah Pa byak cokke matə wat pə Internet.

Za Syedowal Jehowa : Cok lwaa Gɓəzah Pa byak cokke matə wat pə Internet.

Beliefs

Future

Fan mai Masəŋ mo tə byak gin wo mana

Leesoŋ 12

Bə lai matə ɓə cee ne ɓə syimmi
	We foo ɓə fẽe tə ɓə cee ne ? (1) tə ɓə sye ɓil ne ? (1)
	Ɗəɓ Kristu a joŋ fẽe ka cuu tə syee ko mor ɓə lai no ne ? (2)
	Ik fabal ga lal pə wul ɓəɓe’ ye ne ? (3)
	We kee fan mai moo cuu za ka tə duu ɓə lai matə ɓə cee ya. (4)
	Bə lai fẽe Masəŋ nyi ɓo tə ɓə syim ne ? (5)
	Bə ah a nai tə ɓə nyi syim nyi ki ta ne ? (6)

1. Jehowa yee nyi cee. Fan ma ne nah nən daŋ mo nyira suu ɓəə nyi Masəŋ (Ləŋni 36:9). Mə Masəŋ, cee fan matə daŋdaŋ yo. Koo cee wel ma ɓər mamme a pəyək wo Jehowa. Sye ɓil ne’ yah zahzyil ɓo ga lalle, ɓəɓe’ yo pel Masəŋ. — Pəə Za Israel 21:22, 23 ; Ləŋni 127:3.

Ka na ’nyah suu Masəŋ ɓe, na sob ɓaŋ syim ga wo suu mana, təkine joŋ ɓəɓe’ ne bai laa zah daŋ ɓoo.

2. Za Kristu matə goŋga a joŋra yella ne ɓə syee mor ɓə lai. A ẽera muŋta ɓəə təkine yaŋ ɓəəra, ka com ki ɓe, mo ge nyira ne ɓə gab ka (Cuu Ɓə Laini 22:8). Za yeɓ Masəŋ ka ɓaŋra suu ɓəə joŋ kyẽm zah wul ne o, gam kyẽm laa pə’nyah yo ya. Mor ah ka feera kyẽm ma in wul ya. A syiŋra kyẽm mai za ma bai zyii syee mor ɓə lai moo joŋra. — Ləŋni 11:5 ; Yohana 13:35.

3. Cee fabal a daŋdaŋ pel Masəŋ ta. Ɗəɓ Kristu gak ik fabal ka re nəə ahe, wala ka cakko gin zah syemme wala zah gabbe (Təŋ Mor Fanne 3:21 ; 9:3 ; Pəə Za Israel 21:28). Ka pəsãh mor ka cuu syak nyi fabal wala ka ikra mor joŋ kyẽm ya. — Ɓə Kikiŋ 12:10.

4. Zwan təpəə, mãa bétel ne drogue daŋ, ka pəsãh mor dəɓ Kristu ya. Fan joŋ marai a pəɓea mor ɓə sai : 1) we ciŋ byak ɓəəra, 2) a ɓeɓra suu dəɓɓi, so 3) ara ne’ namme (Romanen 6:19 ; 12:1 ; 2 Korintien 7:1). Maki ah, a yea ne we pəgaɓ ka sob fan joŋ marai daŋ ɓooni. Na ’yah ka ’nyah suu Jehowa ɓe, na mor ka sob ɓonni.

5. Syim fan matə daŋdaŋ ye pel Masəŋ ta. Masəŋ faa, syim cee yo. Ka pəsãh mor re syim ya. Soo ka pəsãh mor re nəə mai syim ah mo duu ge lal ya ta. Nəə fabal mai fan mo kokõo ɓo wala məmməə mo gbə we lwaa ŋgoŋ kyaŋ ah ka syim ah mo duu ge lal ya daŋ, we re ka. Koo we jwəəra ne guu, ne wii, we duu syim ah ge lal daŋ ɗao ka we re ba. — Təŋ Mor Fanne 9:3, 4 ; Lewitien 17:13, 14 ; Yeɓ Za Pee 15:28, 29.

6. Ka pəsãh mor ɓaŋ syim ga wo suu ya ta ne ? Na yaŋ ka, Masəŋ faa na juu syim ka. Bə ah’ yah faa na ɓaŋ syim dəbki ge wo suu man laŋ ka, koo syim man mo ɗuu ge lal ɓe laŋ, na jin ɓaŋ ge wo suu man kao ta (Yeɓ Za Pee 21:25). Za Kristu matə goŋga, ka zyiira ɓaŋ syim ga wo suu ɓəə ya. A zyiira re syiŋ l’hôpital no ; ɓaŋ ɓii ga wo suu təkine syiŋ mai syim mo ka gŋ ya daŋ, a zyiira no. Ka tə’ yahra wul ya, soo ka kyebra əə suu ɓəə zah wul ne joŋ ɓəɓe’ wo Masəŋ ya ta. — Mateus 16:25.

Ŋwəə bo ne 1999
Copyright © 2006 Watch Tower Bible and Tract Society of Pennsylvania. All rights reserved.