Testigonan di Jehova—Ken Nan Ta? Kico Ta Nan Creencianan?

Nan ta interesá den bo

Ken Nan Ta?

Testigonan di Jehova ta deseá pa bo siña conocé nan mas mihó. Por ta bo a conocé nan como bisiña of colega di trabou of den otro asuntunan di bida diario. Kisas bo a mira nan riba caya, ora nan ta ofrecé nan revistanan na hende cu ta pasa. Of tal bes bo a papia brevemente cu nan na bo porta.

Echo ta cu Testigonan di Jehova ta interesá den bo i bo bienestar. Nan kier ta bo amigu i conta bo mas en cuanto nan mes, nan creencianan, nan organisacion i nan punto di bista tocante hende i e mundu den cua nos tur ta biba. Pa logra esaki, nan a prepará e foyeto aki pa bo.

Den mayoria sentido Testigonan di Jehova ta manera tur otro hende. Nan tin problemanan comun—económico, físico i emocional. Tin bes nan ta cometé eror, pa motibu cu nan no ta perfecto, superior of infalibel. Pero nan ta purba siña di nan experencianan, i nan ta studia Bijbel diligentemente pa nan drecha unda cu ta necesario. Nan a dedicá nan mes na Dios pa haci su boluntad, i nan ta traha diligentemente pa cumpli cu e dedicacion aki. Den tur nan actividadnan nan ta busca guia dje Palabra di Dios i su spiritu santu.

Pa nan, ta masha importante pa nan creencianan ta basá riba Bijbel i no djis riba speculacion humano of credo religioso. Nan ta sinti mescos cu apostel Pablo cu bou di inspiracion a bisa: “Laga Dios ser hañá berdadero, aunke tur hende ser hañá mentiroso.” (Romanonan 3:4, Traduccion di Mundu Nobo*) Ora ta trata di siñansanan presentá como berdad di Bijbel, Testigonan ta respaldá fuertemente e curso cu e bereanonan a sigui ora nan a tende apostel Pablo predicá: “Nan a ricibí e palabra cu e mayor gana di mente, examinando cuidadosamente e Scritura diariamente en cuanto si e cosnan aki tabata asina.” (Echonan 17:11) Testigonan di Jehova ta kere cu tur siñansa religioso mester pasa dor dje test aki, esta cu e mester ta na armonia cu e Scritura inspirá, sea e siñansa ta bini di nan of di otro hende. Nan ta invitá bo, urgi bo, pa haci e test aki ora bo combersá cu nan.

Esaki ta mustra bon cla cu Testigonan di Jehova ta kere den Bijbel como e Palabra di Dios. Nan ta considerá e 66 bukinan di Bijbel aki inspirá i históricamente exacto. Loke hende comunmente ta yama e Testament Nobo nan ta yama e Scritura Griego Cristian, i e Testament Bieu nan ta yama e Scritura Hebreo. Nan ta dependé riba ámbos, tantu e Scritura Griego como esun Hebreo, i ta tuma nan literal a ménos cu e expresionnan of e situacion ta indicá bon cla cu nan ta figurativo of simbólico. Nan ta comprendé cu hopi profecia di Bijbel a cumpli caba, otronan ta cumpliendo, i algun mester cumpli ainda.

NAN NOMBER

Testigonan di Jehova? Sí, esei ta e manera cu nan ta yama nan mes. E ta un nomber descriptivo, indicando cu nan ta duna testimonio tocante Jehova, su Divinidad i su propósitonan. “Dios,” “Señor,” i “Creador”—mescos cu “presidente,” “rey,” i “general”—ta títulonan i por ser aplicá na diferente personahe. Pero “Jehova” ta un nomber personal i ta referí na e Dios todopoderoso i Creador di universo. Den e buki di Salmonan i Proverbionan na papiamento (Editorial Evangelica), nos por mira esaki na Salmo 83:18: “Y laga nan sabi qu Bo, Quen Su nomber solamente ta Jehová, ta e Altísimo ariba tur tera.”

Dios su nomber personal na hebreo antiguo

E nomber Jehova (of Yahwe, manera e Jerusalem Bible católico romano i algun erudito ta preferá) ta aparecé casi 7.000 bes den e Scritura Hebreo original. Mayoria Bijbel no ta mencioná e nomber, sino ta pone “Dios” of “Señor” na su lugá. Sin embargo, asta den e Bijbelnan aki, un hende hopi bes por bisa unda e texto hebreo original a usa Jehova pa motibu cu e palabranan substituto ta skirbí cu letter capital grandi i letter capital chikitu, esta: DIOS, SEÑOR. Vários traduccion moderno ta usa sea e nomber Jehova of e nomber Yahwe. P’esei, den e Traduccion di Mundu Nobo, Isaías 42:8 ta bisa: “Ami ta Jehova. Esei ta mi nomber.”

E pasashi di Bijbel cu Testigonan di Jehova ta basa nan nomber ariba ta den Isaías capítulo 43. Ei e esena di mundu ta ser mirá como un drama den un sala di corte: E diosnan dje nacionnan ta ser invitá pa trece nan testigonan dilanti pa proba nan supuesto casonan di husticia of pa tende e banda dje testigonan cu ta apoyá Jehova, i reconocé e berdad. Ei Jehova ta declará na su pueblo: “Boso ta mi testigonan, Jehova ta bisa, i mi sirbidó cu mi a scoge, pa boso por conocé mi i kere, i comprendé cu ami mes ta; promé cu mi ningun dios no a ser formá, ni lo no tin despues di mi. Ami, ami Jehova, i sin mi no tin ningun hende cu por salba.”—Isaías 43:10, 11, Versión Reina-Valera, 1960 (na spañó).

Jehova Dios tabatin testigonan riba tera durante e miles di añanan promé cu Jesus a nace. Despues di mencioná nomber di algun dje hendenan di fe aki na Hebreonan capítulo 11, Hebreonan 12:1 ta bisa: “Pues anto, dor cu nos tin un nubia asina grandi di testigo rond di nos, laga nos tambe kita tur carga i e picá cu fácilmente ta coge nos den trampa, i laga nos core e careda cu ta poné dilanti nos cu awante.” Jesus a bisa dilanti Poncio Pilato: “Pa esaki mi a nace, i pa esaki mi a bini na mundu, pa mi duna testimonio di e berdad.” E ta ser yamá “e testigo fiel i berdadero.” (Juan 18:37; Revelacion 3:14) Jesus a bisa su disipelnan: “Boso lo ricibí poder ora e spiritu santu yega riba boso, i boso lo ta testigonan di mi tantu den Jerusalem como den henter Hudea i Samaria i te na e parti mas lehano dje tera.”—Echonan 1:8.

P’esei, mas cu 6.000.000 hende awe cu ta bisa otronan tocante e bon nobo di e Reino di Jehova mediante Cristo Jesus den mas cu 230 pais ta sinti cu ta apropiado pa yama nan mes Testigonan di Jehova.

Mas cu 6.000.000 Testigo den mas cu 230 pais

* A ménos cu tin otro indicacion, texto di Bijbel citá den e foyeto aki ta traducí for dje traduccion aki na ingles.